香港特別行政區區旗
中華人民共和國香港特別行政區區旗（英文：Regional Flag of the Hong Kong Special Administrative Region of the People's Republic of China）係五星花蕊嘅洋紫荊花紅旗（注意唔係基本法所講嘅「紫荊花」）[1]，用紅色做底色，中間有一朵五星花蕊嘅白色洋紫荊花圖案。底色用中華人民共和國國旗嘅紅色做標準[2]，而洋紫荊花係香港嘅象徵。
香港特區區旗設計喺1990年2月16號定案，1990年4月4號喺第七屆全國人民代表大會第三次會議中通過[3]，1996年8月10日由特區籌委會通過使用暫行辦法。1997年7月1號嘅香港主權移交典禮上，特區區旗第一次正式飄揚，取代主權移交以前用嘅香港旗。
設計 編輯
香港特區區旗嘅形狀、顏色、同埋洋紫荊圖案，無論喺旗幟正面定係背面睇都係一樣，只係方向有啲唔同。區旗同區徽嘅規格同使用方法，由1997年7月1號生效嘅《區旗及區徽條例》[4]具體訂出。香港政府同時制定咗展示區旗同區徽時必須遵從嘅條件。
象徵意義 編輯
旗嘅底色係紅色，同中華人民共和國國旗嘅底色一樣，象徵香港係中華人民共和國嘅一部份。同時，中華文化將紅色視為喜慶嘅顏色，因此紅色亦有慶祝同埋愛國嘅意思。
洋紫荊圖案、花蕊用五粒星表示，再次同中華人民共和國國旗上嘅五星相對應，有中國同香港唔可以分開嘅關係。花瓣上嘅五星，代表香港人熱愛祖國。區旗淨喺用紅白兩色，象徵香港實行一國兩制。
早喺1965年，香港已經採用洋紫荊作為自己嘅市花，八年後（1973年）嘅市政局就用咗洋紫荊做標誌。1997年之後用嘅香港特區區旗設計繼續有洋紫荊花嘅元素。
詳細標準 編輯
繪製香港特區區旗嘅定位圖如下：
《區旗及區徽條例》[4]訂明咗香港區旗嘅繪畫方式。旗幟長闊比例係2:3，矩形，所有旗幟必須以指定比例同定位繪畫，先至符合規格。
法例訂明區旗旗面嘅通用尺寸如下：
| 式號 | 1號 | 2號 | 3號 | 4號 | 5號 | 車旗 | 簽字旗 | 桌旗 |
|---|---|---|---|---|---|---|---|---|
| 長度 × 高度（厘米） | 288 × 192 | 240 × 160 | 192 × 128 | 144 × 96 | 96 × 64 | 30 × 20 | 21 × 14 | 15 × 10 |
以下係區旗用色嘅大概標準，分別用HTML RGB 16進位代碼網頁顏色模式、印刷四分色模式（CMYK）、染料顏色、HSL顏色模式、以及彩通色板號數表示：
| 顏色 | HTML | CMYK | 染料顏色 | HSL | Pantone |
|---|---|---|---|---|---|
| 紅色 | #FF0000 | 0-87-99-0 | Chinese red | 0°,100%,50% | 186 |
| 白色 | #FFFFFF | 0-0-0-0 | White | 0°,100%,100% |
歷史 編輯
主權移交前舉辦過區旗設計比賽，畀香港人參與特區區旗嘅設計。共收到7000份參賽設計，當中嘅作品有「HK」字母、幾粒代表「東方之珠」嘅圓珠，象徵金融中心嘅金錢圖案、白鴿等，作品嚟自美術界、農民、演員、戰士、軍官等。當中有唔少作品用洋紫荊做設計，但同市政局嘅標誌相似，因版權問題被淘汰。由政治人物組成嘅評審團選出其中六份，但中國方面最後否決全部設計，並另外邀請三名設計師（當時香港正形設計學校校長韓秉華、當時嘅基本法諮詢委員文樓同建築師何弢）重新設計。韓秉華：「我比較傾向以植物為旗，好似加拿大嘅楓葉旗，所以提出用（洋）紫荊花為主體」。韓秉華喺書中更指何弢當時隨即喺酒店嘅花園摘咗一朵洋紫荊花，帶返會議室，用嚟觀察佢嘅形態。原來區旗上嘅洋紫荊圖案，最初係星中有花，變成花中有星；由五角星演變成今日嘅小五星。最後採納原評審之一、香港建築師何弢嘅設計。上海出世嘅何弢憶述當時一啲頗為怪異嘅設計：「有一份設計一邊有鐮刀同錘頭，另一邊就有港元標誌。」。至於洋紫荊設計概念嘅來源，佢指留意到花瓣對稱，而且花紋迴轉富有動感，所以將佢加入區旗設計入面。
第一份設計嘅洋紫荊花瓣弧度由於難以繪製，主權移交前曾作出適度修改。最後使用嘅區旗設計中洋紫荊花瓣無之前初稿咁肥大。未改版前嘅區旗可以喺早期嘅《基本法》單行本搵到。由於特區區旗設計曾經改過，而區旗亦間唔中會出現錯體區旗同埋調轉掛嘅情況；好似2004年雅典奧運會奧運選手村入面，大會準備嘅區旗就唔合乎規格[5]。匯豐銀行2011年版本嘅100蚊紙嘅設計更出現倒掛區旗嘅錯誤，喺推出市面前及時改返啱[6]。
區旗使用禮節 編輯
香港政府每日喺行政長官官邸、香港禮賓府、香港國際機場同埋所有邊境管制同檢查站，展示國旗同區旗；至於喺各主要政府合署同建築物，好似行政長官辦公室、行政會議、終審法院、立法會同埋喺海外嘅香港經濟貿易辦事處展示，就會喺工作日掛起。政府會喺指定日子（國慶日、特區成立日同元旦），喺醫院、學校、部門總部、體育同埋文化場館等政府建築物展示國旗同區旗。國旗同區旗應該喺日出時升起，日落時降下。即係，旗幟喺上晝八點升起，大概下晝六點降下。
區旗法例 編輯
根據《基本法》第十條，香港嘅區旗係「五星花蕊嘅『紫荊花』紅旗」。《香港法例》第2602章《區旗及區徽條例》訂明，區旗係指1996年8月10號香港特別行政區籌備委員會第四次全體會議通過嘅香港特別行政區區旗。
舊史嘅香港旗 編輯
.svg)
香港喺英國殖民地時期嘅最後一面殖民地旗喺1959年7月27號至1997年6月30號期間用；設計同其他英國海外領地一樣，用英國藍色軍旗（Blue ensign，藍地、左上面配有英國旗）打底，右下做個白圓，入面加個香港紋章，係英國喺香港統治嘅重要象徵。
英屬香港旗喺1997年香港主權移交之後一度銷聲匿跡，但自2012年中港矛盾白熱化之後，支旗開始喺不滿中國同特區政權嘅集會遊行出現[7]，直至2020年實施咗國安法就永久停止使用。
參考 編輯
- ↑ 基本法第十條：香港特別行政區的區旗係五星花蕊的「紫荊花」紅旗
- ↑ 〈區旗規格〉. 原著喺2012年9月27號歸檔. 喺2012年8月4號搵到.
- ↑ 〈全國人民代表大會關於《中華人民共和國香港特別行政區基本法》的決定〉. 香港特別行政區政府. 1990-04-04. 原著喺2010-03-14歸檔. 喺2010-04-25搵到.
- ↑ 4.0 4.1 第2602章 區旗及區徽條例
- ↑ 〈（洋）紫荊花瓣弧度唔合規格 港隊即刻更正錯體區旗〉，《明報》2004年8月10號
- ↑ 〈匯豐百元新鈔「倒掛區旗」〉，《明報》2011年7月24號
- ↑ 打正旗號 鼓吹港獨 - 東方日報