香港民主女神像
香港民主女神像（英文：Lady Liberty Hong Kong）係2019年香港反修例運動一件藝術品，啟發自八九民運嗰陣嘅民主女神像，用反修例前線示威者嘅形象去製作。
香港民主女神像形象係位香港後生女，着住短袖T裇同長褲，孭住背囊，頭戴安全頭盔，面戴眼罩同豬嘴，右手揸住把遮，左手揸住支寫有「光復香港，時代革命」黑底白字旗。
香港民主女神像喺8月底製作咗個實物，高4.5米，喺香港中文大學校園同反濫捕抗威權集會會場展出過，10月13號製作團隊將佢搬到獅子山頂諗住長期豎立，但第二日已經畀人推冧破壞。
