驚嘅生態學

驚嘅生態學（粵拼：geng1 ge3 sang1 taai3 hok6；英文：ecology of fear），或者叫恐懼嘅生態學，係 2020 年代興起嘅一個動物生態學概念，講緊獵食者之所以能夠令獵物嘅數量下降，唔單只係因為「殺獵物，獵物數量自然跌」咁簡單，仲係因為獵食者對獵物產生長遠嘅情緒影響。

一隻貓望落似係覺得有啲驚：已知動物可以感受恐懼等嘅情緒，住喺野外嘅動物係咪成日都會覺得驚呢？

一隻猛禽擔住佢隻獵物個頭。隻獵物臨死前有咩感受呢？

基本諗頭

内文：天敵同恐懼

首先好顯然易見嘅係，唔同嘅物種嘅動物之間好多時有住獵食者同獵物嘅關係，例如狼係好多種細隻哺乳類嘅天敵，一隻狼要填飽個肚，就梗要去捉兔仔等嘅獵物嚟食（捕食）。喺廿世紀嘅生態學當中，研究者想像「獵食者點樣影響獵物」嗰陣，往往係單純噉諗「獵食者殺獵物，令獵物數量下降」。但係自從廿一世紀初，啲人開始研究動物入便嘅情緒現象，發覺獵食者對獵物嘅影響，仲有喺心理層面浮現。

舉例說明，有廿一世紀初嘅研究指出，獵物畀獵食者追殺嗰陣唔淨只會即刻出現戰鬥定逃走反應。就算喺件事過咗好耐之後，啲獵物仲會出現一連串嘅行為同生理變化，例如野生嘅兔乸多次畀獵食者（例如狼同狐狸）追但大難不死之後，會不時提高警戒，好似係成日仍住有獵食者喺左近噉，亦會因而食少咗嘢，生少咗兔仔，甚至湊仔女嘅能力（由啲仔女成功長大嘅機率反映）會下降—即係話獵食者嘅存在唔單只會短期噉「殺獵物，令獵物數量跌」咁簡單，仲會長遠噉透過佢哋製造嘅恐懼，壓抑獵物嘅數量。

人類相關

睇埋：創傷後壓力症

呢種噉嘅情況，被指好似係獵食者令獵物出現創傷後壓力症（PTSD）噉：PTSD 係指人响遭遇過極大壓力（例如上沙場打仗）之後，出現一啲心理上嘅失調，會成日發惡夢同焦慮呀噉。有研究者指出，獵物遇上獵食者大難不死（極大壓力），出現一系列行為異常，最後搞到佢哋繁殖嘅能力下跌，彷彿就好似係呢啲獵物患上咗 PTSD 噉。有理論家進一步指出，呢種現象表示人類身上見到嘅 PTSD 係一種進化出嚟嘅適應機能，令到一個人或者一隻動物面對「四圍都危險」嘅環境嗰陣能夠調節自己行為同生理，變到成日都緊張，犧牲少少繁殖能力但提高警戒，整體嘅生存能力提高。

睇埋

• 捕食
• 死亡
• 野生動物嘅痛苦
• （香港繁體） 創傷後壓力症 Post-Traumatic Stress Disorder (PTSD)，香港心理輔導中心。
• （英文） 野生動物會唔會患上 PTSD？，呢篇文簡介驚嘅生態學。