鬼屋
鬼屋（粵讀：gwai2 uk1；英文：haunted house / ghost house）係有人話／認為有鬼存在嘅屋，廣義上仲可以包埋屋以外嘅鬧鬼建築物。世界各地由古至今都有鬼屋嘅講法。
第二啲鬼屋 編輯
主題公園或者遊樂場會有「鬼屋」，裏面用真人或者公仔扮鬼，有時加上恐怖音效嚟嚇人。例如香港海洋公園哈佬喂就有「鬼屋」[1] 。
出名嘅鬼屋 編輯
香港 編輯
香港有好多鬼屋。香港經歷過第二次世界大戰嘅日治時期，當時有好多人死咗。隨住年月過去，亡魂陰魂不散製造出一件又一件啲人覺得無法解釋嘅靈異事件。
- 高街鬼屋
- 地址：西營盤高街2號
高街鬼屋係香港最出名嘅鬼屋之一。而家嘅西營盤社區綜合大樓，前身係精神病院。據講喺二戰之前就已經係一間精神病院，所以被稱為「舊精神病院」。根據傳言，被送入去嘅病人唔單只會被隔離，而且仲要係「有入冇出」。傳聞地庫有唔少嘅精神病人撼頭埋牆自殺，所以一到咗夜晚，就會傳出撞擊聲；後嚟喺二戰嗰時，日軍佔領咗香港，將病院當咗做刑場，殺咗好多人，俾人指搞到怨氣係十分之重。而且據講，鬼屋撞正位於香港龍脈嘅最陰處，係靈體嘅「好去處」。打後改建做西營盤社區綜合大樓嗰時，原建築物嘅大麻石外牆同埋走廊得以保留，而且仲被列為香港嘅一級歷史建築。2015年10月23號被列為香港法定古蹟。
屏山達德學校由屏山鄧族出資興建，喺1931年創立，曾經係鄧氏宗祠修建嘅子弟學校，依家已經荒廢咗好多年。呢棟建築有關於紅衣女鬼嘅傳聞。傳聞曾經有校長著住紅衫褲紅裙喺校舍南幢某一層嘅女廁自殺，自此之後傳聞學校就成日有紅衣女鬼出現。
據稱喺1941年日本攻佔香港期間，有大批抵抗日軍嘅屏山村民喺呢個地方被殺，屍骸就被葬咗喺25校址旁嘅嗰一處地方，成為咗亂葬崗，因此陰魂不散；另一種嘅講法，係指嗰一處地方已經變成亂葬崗，係因為1899年英國租借新界時，屏山村嘅村民為咗抵抗英軍，最後搞到有好多村民死亡所致嘅。
喺 19 世紀，摩星嶺一直都係軍事重地，抗日嗰段時期鎮守住香港西面嘅要塞。所以，喺摩星嶺密林裏面收埋咗好多碉堡、防空洞，傳聞有好多去嗰度打War Game嘅人會見到自己隊友以外嘅「軍人」加入，嗰啲「軍人」傳聞冚唪唥都係上世代嘅日軍、英軍。
摩星嶺有四座無街號、甚至無門牌嘅白色屋仔。傳聞話，呢啲「白屋」都係港英政府年代嘅政治部辦公室，用嚟囚禁政治犯嘅。由於屬高度敏感地方，所以先會無街號，加上俾高牆鐵絲包圍住，所以外界淨係能夠用外牆嘅顏色嚟分別。隨住港英年代嘅結束同埋政治部嘅解散，「白屋」已經荒廢咗好多年。以前有好多政治犯喺度被嚴刑拷問，甚至係俾人毒打致死，加上嗰度位於猛鬼地帶摩星嶺，所以「白屋」亦俾人認做鬼屋，吸引咗唔少嘅後生仔為咗測試膽量，闖入去裡面靈探。
2010年，「白屋」被評為三級嘅歷史建築；2013年，教育局宣佈將「白屋」分配畀芝加哥大學布斯商學院，改建嚟做校舍。
- 南固台
- 地址：船街55號
南固台位於灣仔船街同埋堅尼地道之間，俗稱「灣仔鬼屋」，1918年由嗰陣時嘅香港富商杜仲文起嘅。嗰陣時嘅灣仔係香港最早開發嘅地區，船街係華人嘅聚居地，莊士敦道已經係臨海馬路，南固台喺一個十米嘅高台上，係背山面海嘅超級豪宅。
1921年杜仲文將南固台賣畀佢嘅親細佬杜澤文，而且一直住喺裡面。1943年，日本佔領緊香港期間，七十四歲嘅杜澤文死咗喺大宅裏面。據講杜澤文死咗之後，南固台落入日軍嘅手上，日軍更喺船街一帶設立慰安所，南固台就係「貴賓廳」。歷年以嚟有好多關於南固台嘅鬧鬼傳聞，包括屋內成日傳出女人嘅慘叫聲之類，亦有話喺夜深嗰時，屋內就會有一團團綠色嘅怪火同怪光飄浮。呢間「鬼屋」喺廿一世紀初已經被列為一級歷史古蹟，將會以保育嘅用途嚟發展重修。
- 華富邨
- 地址：瀑布灣道8號
華富邨係廿世紀香港最出名嘅公共屋邨之一，其中一個原因係佢哋零舍多鬼故。80年代華富邨啱啱落成嗰陣時，住喺呢度嘅細路成日去瀑布灣嗰度玩。而呢個地區流傳住一個故事：喺傍晚時份到到瀑布灣會看見一名長頭髮白衫嘅女人喺度洗面，佢會反覆噉做住同一個動作；當有人行埋去嗰陣，個女人會擰轉頭，佢塊面係冇五官嘅無臉女。
傳聞指，自從入伙以嚟，年年都會有細路喺瀑布灣下面浸死，街坊認為係水鬼搵替身，呢種情況直到90年代仍然係噉，每隔一、兩年，就會有人喺嗰度浸死；之後政府嗰嗰度整咗個圍欄而且鎖上入口，立咗個「危險警告牌」用嚟提醒市民。據（廿世紀）老一輩嘅街坊所講，瀑布灣公園嘅岸邊有座小碉堡成日鬧鬼。更有傳某幢樓嘅23樓全層都無人住。不過當局解釋，全層空置係因為早年政府評估過華富村嘅呢啲舊樓宇嘅結構，認為樓齡雖高但樓宇仲係安全，唔使拆卸重建，不過為咗安全起見，就喺大樓加上鋼架加固，其中23樓就成為額外加咗上去做固定整個鋼架嘅「橫樑」。所以要全層丟空，不過丟空後俾人覺得無人嘅樓層鬼影曈曈。
- 其他
- 長洲東堤度假屋
- 坪洲戲院
澳門 編輯
星加坡 編輯
- 樟宜醫院[4]
檳城 編輯
北美洲 編輯
攷 編輯
- ↑ 新假期 (2019-10-08). 〈海洋公園哈囉喂全園祭 聯乘LINE FRIENDS＋六大鬼域＋厲鬼通街跑＋鬼屋（附門票詳情）〉. 《新假期》 (美國英文). 喺2020-08-08搵到.
- ↑ 新假期 (2019-08-09). 〈【膽小勿看】最陰最心寒 香港10大猛鬼勝地 | 熱話〉. 《新假期》 (美國英文). 喺2020-08-07搵到.
- ↑ 〈人食人？亂葬崗？澳門猛鬼恐怖實錄〉. memorymacau.blogspot.com. 喺2020-08-07搵到.
- ↑ 〈「樟宜醫院」鬧鬼事件，來自新加坡恐怖傳說！〉 (香港中文). 原著喺2020-08-08歸檔. 喺2020-08-07搵到.
- ↑ khamanwong (2015-07-31). 〈毛骨悚然！【檳城5大猛鬼熱點】竟然有人和死了9年的人做朋友，而且還….(內有影片)〉. Viral Cham (簡體中文). 喺2020-08-07搵到.