鸚鵡螺

鸚鵡螺科（學名：Nautilidae），簡稱鸚鵡螺，係頭足綱鸚鵡螺目嘅一科，係一類擁有大量觸手、壽命好長、有小孔成像眼嘅深海軟體動物，係現存唯一具有完整貝殼嘅頭足類。鸚鵡螺目前生長喺印度洋同太平洋海區，北至日本南方、南至大堡礁、西至安達曼海、東至斐濟等海域，位於鸚鵡螺主要產地嘅法屬新喀里多尼亞更加以鸚鵡螺作為國徽主要圖案。

鸚鵡螺已經喺地球上經歷咗幾億年演變，佢嘅直系祖先喺奧陶紀嗰時係海洋中嘅頂級掠食者。現代定義上嘅鸚鵡螺從三疊紀晚期開始演化出嚟，並且靠住平均80年嘅長壽、同少而精嘅繁殖策略挺過地球上所有嘅大滅絕事件。而家，佢哋嘅外形同習性依然同遠古祖先相差無幾，而佢嘅出現時間甚至比大多數已滅絕嘅古生物（例如恐龍）長好多，所以被稱為「活化石」。因此，鸚鵡螺喺研究生物進化同古生物學等方面有好高價值。

文獻

根據唐人劉恂喺《嶺表錄異》卷三記載：「鸚鵡螺，旋尖處屈而朱，如鸚鵡嘴，故以此名。殼上青綠斑文，大者可受三升，殼內光瑩如雲母，裝為酒杯，奇而可玩。」