學名

學名即係生物學家對某一組生物嘅稱呼，爾組生物可以大到一個界，或者細到一個亞種。但係無論範圍大細，原則上，有一組生物衹會有一個學名，一個學名亦只能夠指一組生物。但係由於目前嘅命名規則有幾種，所以間而中會有一組多名或者一名多組嘅情況。學名一般用拉丁文，中文嘅所謂「學名」，就算係官方認證同使用，都唔可以算真正嘅學名。

目前學名用得最多嘅係二名法。

概論

每一個生物物種都會有一個學名，一個學名通常會由兩個拉丁文寫嘅字組成，例如係人類噉，人類嘅學名係 Homo sapien；通常一個學名嘅第一個字會反映咗嗰種物種所屬嘅屬，而第二個字指個種。呢兩個字未必一定係源自拉丁文，例如係喺四川嗰頭發現嘅恐龍屬華陽龍噉，佢個學名係 Huayangosaurus－當中 Huayang 係「華陽」－四川嘅別名－呢兩個漢字喺普通話入面嘅讀音。學名全球共通，唔會因地區而異。

有一啲物種因為地區唔同或者突變而有亞種（subspecies），為咗分得清楚啲，廿一世紀嘅科學界又多咗一套叫三名法（trinomial nomenclature）嘅學名：呢啲學名只係得有亞種嘅生物先至有，顧名思義有三個字，例如有啲人會叫喺香港嘅中華白海豚做 Sousa chinensis chinensis，印尼嘅中華白海豚做 Sousa chinensis plumbea。不過呢套做法到咗廿一世紀初都仲未受全世界認可。