黃巴士

  提示：呢篇文講嘅唔係皇巴士。

《黃巴士》（英文：Yellow Bus），係香港細路雜誌，經常刊載麥嘜同麥兜漫畫而出名。

《黃巴士》喺1993年跟住《星期天周刊》創刊，嗰時係隨《星期天周刊》附送嘅。其後《星期天周刊》因政治理由停刊，《黃巴士》亦喺市面上消失。

1996年，《黃巴士》獲得資助獨立創刊，兩年後改以雙周刊形式出版，之後改成月刊形式出版。

大概1997年，由於資助《黃巴士》嘅百樂門出版集團出現財政問題，要賣咗蝕錢嘅雜誌，包括《黃巴士》。所以麥家碧、謝立文幾個人喺1998年成立非牟利嘅春田花花教育基金，接手出版《黃巴士》。春田花花教育基金成立目的，係資助《黃巴士》以及其他從事兒童創作嘅個人同埋團體。