黃柏高

黃柏高（英文：Paco Wong Pak Ko，1951年7月29號—）係香港著名藝人經理人，有「金牌經理人」之稱。佢曾經喺金牌大風、華納唱片同正東唱片等唱片公司出任要職。2012年，佢加入太陽娛樂文化出任董事總經理直到2020年。黃柏高曾一手提攜無數著名歌手同藝人，有唔少歌手藝人都會喺攞獎嘅時候公開話『多謝Paco』，成為香港娛樂圈嘅名句。

經歷

華納唱片時期

黃柏高喺中學讀書嘅時候，成績唔算好好，之後出咗嚟做嘢。1978年華納唱片喺香港設立分公司，黃柏高去見工，但係就俾老闆話佢英文唔好，結果華納只係畀佢去貨倉部工作負責管倉，後嚟因一次偶然下講咗一句不屑當時香港中文音樂嘅說話，結果反而被唱片公司老闆賞識，之後就被調任中文唱片部擔任唱片製作工作，展開佢嘅娛樂事業生涯，而第一首歌要負責製作嘅，就係陳百強嘅《漣漪》。黃柏高曾經透露，其實當時佢乜都唔識，但就邊學邊做盡量吸收，結果唱片大受歡迎，賣到超過15萬張。喺華納工作期間中，佢簽咗劉德華、郭富城、王傑等歌手，亦處理過林子祥、葉蒨文、馬浚偉等藝人嘅唱片工作。

黃柏高亦透露過，喺呢段時期，林子祥教識咗佢好多製作技巧，而佢哋亦一齊合作製作唱片長達三年。

正東唱片／金牌經理人時期

去到1996年，黃柏高就同鄭中基嘅老竇鄭東漢合作，喺寶麗金旗下成立咗正東唱片，佢形容相比起喺華納嗰陣，係『真正打天下』。喺正東嘅時期佢就捧紅咗陳慧琳、許志安、楊千嬅，製作人方面亦提攜咗雷頌德。

1998年黃柏高成立金牌經理人有限公司（金牌大風前身），正式為各個藝人提供經理人服務。

雖然佢喺正東嗰陣捧紅過唔少藝人，但亦曾經試過走漏眼，例如後嚟成為樂壇天后嘅容祖兒，最初就係簽咗畀黃柏高嘅正東唱片，但後來正東同佢解約，當時就有傳黃柏高嫌佢樣衰，黃柏高後來喺2014年一次訪問中話當時係另一個同事負責容祖兒嘅工作，而且當時正東面對嘅條件好困難，由頭到尾都係另一個同事負責。

金牌娛樂／金牌大風時期

2002年，佢宣佈離開正東，成立金牌娛樂。

除咗一啲喺正東跟住佢過檔嘅藝人之外，佢喺金牌娛樂嘅時候，亦主理過梁漢文、側田、方力申、鄧麗欣、傅穎、楊愛瑾、RubberBand同吳雨霏等嘅音樂事業。

2009年5月，佢轉任金牌大風嘅主席，名義上發展電影事業，但就有傳佢喺公司失勢，而金牌當時嘅經理人業務，就交咗畀陳輝虹主理。

2011年，黃柏高宣佈離開金牌大風。

太陽娛樂文化時期

2012年，黃柏高宣佈加入太陽娛樂文化，期間佢曾經簽過薛凱琪，仲有之前合作過許志安、鄧麗欣、方力申等。

去到2020年，佢離開咗太陽娛樂文化。

碎料

黃柏高好鍾意飲酒，但喺2020年就試過飲酒飲到患病，但係搵到好醫生大步檻過。

爭議

黃柏高曾經被黃偉文批評，未問過佢就亂咁將佢填詞嘅歌改名，唔尊重佢。