楊千嬅

香港女歌手

楊千嬅粵拼joeng4 cin1 waa6)(英文Miriam Yeung,原名楊澤樺1974年2月3號—)係香港歌手同埋演員

楊千嬅

簡介

楊千嬅喺嘉諾撒聖家書院中學畢業,跟住入讀護士學校,攞到註冊護士資格。1995年參加新秀歌唱大賽攞第三之後入樂壇,簽約華星唱片。喺2000年約滿後,俾黃柏高邀請入咗新藝寶唱片。2004年,黃柏高喺新藝寶唱片同埋佢嘅聯營公司(正東唱片)度走咗,自立門戶成立金牌娛樂,楊千嬅亦跟住加入。2007年,藝人黎明嘅唱片公司A Music用高價請佢加盟。2010年,楊千嬅重投東亞娛樂旗下嘅華星唱片,同年開世界巡迴演唱會,隻演唱會DVD好賣到攞埋IFPI銷量大獎。

楊千嬅俾人嘅印象係大笑姑婆,乜都會笑一餐,但亦因為佢嘅真性情同埋努力,成功令佢得到觀眾嘅喜愛同埋支持。過去多年,楊千嬅先後多次得到唔同電視台同埋電台所頒嘅我最喜愛女歌手獎項,肯定佢喺香港樂壇嘅地位。

電影方面,楊千嬅第一套擔正女角嘅戲係2001年嘅《玉女添丁》。之後嗰一年,2002年,由楊千嬅同吳彥祖領銜主演嘅《新紮師妹》令佢傻大姐嘅形象更加深入民心。至於近年楊千嬅最為人知而又受熱棒嘅電影作有《志明與春嬌》系列嘅三套電影。2019年,楊千嬅以第一女主角身份,首次同天王影帝郭富城合作拍攝電影《麥路人》,入圍《第32屆東京國際電影節》「亞洲未來」單元。楊千嬅同郭富城,仲有導演黃慶勳喺10月出席《麥路人》全球首映及分享會。[1]

個人生活方面,楊千嬅2009年同丁子高結婚,2012年中生咗個仔。

爭議

因應佢本身嘅知名度,楊千嬅嘅演技同歌藝有時會成為香港人討論嘅對象,但係更加爭議嘅係佢嘅政治立場[2]

喺香港反送中運動入面,佢一度以R.I.P弔念喺運動期間墜樓身亡嘅抗爭者,但之後貼文遭刪除,佢話自己嘅Instagram俾人盜用,仲發表愛國聲明。去到2019年12月,佢參與澳門回歸20年文藝晚會嘅演出,喺全國直播之下,佢代表香港嘅歌手同中國國家主席習近平握手,結果引嚟好多網民嘅批評,甚至引用佢其中一首歌《烈女》嘅歌詞,話佢已經變成奸妃[3]

去到2021年1月,網絡媒體幫港發聲搞咗一個「滴答樂壇我最討厭的頒獎禮」,楊千嬅喺網民投票當中,攞到95,322票,成為「我最討厭的女歌手」,得票係第二至第五名(肥媽劉美君黎瑞恩同埋譚嘉儀)得票總和嘅兩倍[4]

參考

  1. "【麥路人】城城千嬅分享拍攝點滴 「香港電影係有熱心人嘅!」". 明周娛樂 (英文). 2019-10-30. 喺2019-11-05搵到.
  2. "由磊落做人去到心口得個「共」字:最後一次談論楊千嬅 | 逆嘶亭 | 立場新聞". 立場新聞 Stand News (英文). 喺2021-01-07搵到.
  3. 自由時報電子報 (2019-12-21). "低胸裝握手習近平 楊千嬅遭酸民諷「奸妃」 - 自由娛樂". 自由時報電子報. 喺2021-01-07搵到.
  4. "譚詠麟撼贏周柏豪奪「我最討厭的男歌手」 楊千嬅冇對手下奪女歌手獎 | 蘋果日報". Apple Daily 蘋果日報 (中文). 喺2021-01-07搵到.

出面網頁