黃耀明
黃耀明（粵拼：wong4 jiu6 ming4；英文：Anthony Wong，1962年6月16號—）係香港出名嘅男歌手，香港樂隊「達明一派」嘅主音；進念二十面體嘅成員；人山人海音樂製作公司嘅董事長。
黃耀明喺香港出世，鄉下喺汕頭潮陽，喺九龍工業學校讀中學，1981年入娛樂圈，直到而家喺非主流音樂界影響深遠。黃耀明1984年喺香港商業電台做唱片騎師，1985年劉以達喺《搖擺雙週刊》登廣告搵歌手，黃耀明去咗試音，一拍即合。之後俞琤介紹佢哋入寶麗金唱片公司，重同佢哋改咗隊名「達明一派」。1990年因為同劉以達喺音樂理念出現咗分歧而分開（之後喺1996年同埋2004年做咗兩次紀念性重組）。個人發展之後嘅黃耀明成績都好好，喺1990年代中期佢去到事業嘅高峰，1996年佢憑住歌《春光乍洩》攞咗好多個獎。
黃耀明喺1999年6月16號同好多位出色嘅音樂創作人，包括蔡德才、梁基爵、李端嫻、亞里安、于逸堯一齊喺香港開咗人山人海音樂製作公司，培育更多音樂人才，好似at17、拜金小姐、Pixel Toy等等。