黎鏗
黎鏗（1928年—1965年2月9號）係中國電影男演員，1930年代童星，香港電影先驅黎民偉個仔。佢祖籍廣東新會，喺上海出世。自細受阿爸薰陶，鍾意電影同表演藝術。1949年返中國大陸定居後，鬱鬱不得志，加上受感情困擾，最後自縊身亡。2015年，時值黎鏗逝世50週年，佢細佬黎錫、生前好友費明儀及多名電影研究工作者，合力整理黎鏗生平資料，出版咗《著名童星、朗誦藝術家黎鏗》，以茲紀念[1]。
| 黎鏗 | |
|---|---|
| 出生日 | 1928年  |
| 出生地 | 上海 |
| 死亡日 | 1965年2月9號 |
| 死因 | 吊頸 |
| 母校 | 嶺南大學 |
| 職業 | 演員 |
| 阿爸 | 黎民偉 |
| 阿媽 | Cho-Cho Lin |
[改維基數據] | |
_1.jpg)
生平
編輯佢亞爸黎民偉早喺1920年代初就喺香港同兄弟合作開設戲院同「民新影畫公司」。之後又到上海同友人創辦「聯華影業公司」。阿媽林楚楚係1920至1930年代中國著名影星。黎鏗3歲半就喺電影《人道》扮演一個惹人憐愛嘅男仔。之後，又喺阮玲玉主演嘅《城市之夜》、《人生》、《歸來》同《香雪海》等影片，扮演女主角個仔。佢細路哥幾得戚，演繹自然，成為童星。當時嘅觀眾對佢印象深刻，報導稱呼佢係「銀幕上的小天使」、「影界神童」。除咗演出，佢仲時不時參與公益活動。1937年抗日戰爭爆發，佢試過同幾位童星一齊到電台廣播，宣傳抗日。
由於戰火迫近，黎跟隨父母到香港。1940年演出香港第一齣由童星擔綱嘅電影《小英雄》。香港淪陷後，佢跟父母輾轉到湛江、桂林等地。顛沛流離之中，佢繼續協助阿爸嘅電影工作及演出話劇。抗日勝利後，佢喺廣州入讀嶺南大學。1949年畢業後由香港轉往北京，喺北京電影制片廠做演員，參演《民主青年進行曲》、《一貫害人道》等影片。工作之餘，佢積極投入朗誦表演，間中到學校及劇團指導朗誦技巧，深受文藝青年歡迎。1958年底，佢調到廣州嘅珠江電影製片廠做演員兼副導演，曾協助導演王為一攝製經典粵語電影《七十二家房客》。
費明儀同黎鏗自細就係好朋友，因為費明儀阿爸係導演費穆，同黎民偉一樣喺上海做電影，互相熟絡。據費明儀回憶，佢最後一次見到黎鏗係喺1960年1月，黎鏗從廣州到香港探望患病嘅阿媽。嗰時黎已結婚7年，有一個女，原本性格開朗嘅黎鏗變到好憂鬱。費再三追問，黎先答佢，「我很不快樂，我的婚姻出現問題，但又不能離婚，她不願意，而且組織上也不批準[1]！」
1965年2月9號，黎鏗被發現喺廣州東湖公園一樖樹上吊頸死咗，終年37歲。佢有留低遺書。消息傳出之後，政府對黎鏗死因諱莫如深，海內外則有各種傳聞[1]。
五邑大學學者鳳群話，黎鏗後生嗰時滿懷理想返共產中國，想一展藝術抱負，但佢留喺香港嘅父母，同國民黨有深厚淵源。佢姐夫沈昌煥仲係國民政府外交高官。喺「以階級鬥爭為綱」嘅年代，黎鏗噉嘅背景喺中國大陸根本難以受到重用。1962年底掀起「四清運動」（清政治，清經濟，清組織，清思想），黎鏗已受到衝擊，加上感情失意，身心飽受折磨，令佢走入絕境[1]。
參考
編輯- ↑ 1.0 1.1 1.2 1.3 〈三十年代著名童星黎铿的一生〉。gbcode.rthk.hk。喺2018-06-26搵到。