歌連臣角

歌連臣角（Cape Collinson），又寫做哥連臣角，土名黑角頭（Hak Kok Tau）係香港嘅香港島東便海邊一角，地方邊鄙。佢對住藍塘海峽，係去維多利亞港東便入口必經之路，所喺海角無幾遠，置有燈塔。

歌連臣角喺小西灣住宅左邊，草綠山頭盡處

史

1845年香港第一張精確地圖有Cape Collinson

歌連臣角個名，係畫第一張準確嘅香港地圖嘅量地官歌連臣命名嘅，張圖1845年英國出版。張圖上便都有呢個地名。

地理

佢喺市區柴灣同小西灣以東，離小西灣屋苑約510米。角西南離1,300米係砵甸乍山頂。

佢隔個藍塘海峽，東北行1,660米，係佛堂洲，遠啲重有清水灣半島。東行1,820米，係鐵篸洲。東南行2,710米，係東龍島。歌連臣角周圍都係石岸，南便隔籬有石灘叫銀灣。

歌連臣角向南1,450米左右，就係草堆灣，再向南行，就係大浪灣。

相關地名

歌連臣角道附近各墳場嘅路牌

歌連臣角只有條歌連臣角道可以行得近，無車可以通到去。因為以前歌連臣角道，行過嘅地方都極偏辟，無乜人煙，所以就算同歌連臣角好遠，所到之處都以歌連臣角為名。好似近草堆灣嘅歌連臣角懲教所，喺角南便1200米。而柴灣南便一大片墳場，個名都用歌連臣角起頭，最近嘅歌連臣角墳場，有920米。最遠嘅歌連臣角火葬場，有2790米。中間有歌連臣角回教墳場、歌連臣角軍人墳場同歌連臣角聖十字天主教墳場。另有墳場喺同一地方，但無用歌連臣角做頭嘅，就係柴灣華人永遠墳場、西灣國殤紀念墳場同埋香港佛敎墳場。以黑角頭命名嘅就分別有黑角頭石刻、黑角頭燈塔同黑角頭清真寺。而新巴9號線嘅「歌連臣角」巴士站，實際位置喺石澳道近歌連臣角道路口，距離真正嘅歌連臣角有成約莫2.9公里。

睇埋

• 歌連臣山