龍虎豹

《龍虎豹》（英文：Lung Fu Pao）係一本香港出版嘅鹹書，1984年由已故嘅林國光創刊，第一期封面女郎係陳莉莉，以鹹濕內容為主。

《龍虎豹》初期係十日刊，逢8號、18號、28號出版，1990年代前以東南亞、唐人地方女性鹹相為主，主要專欄目有解答讀者來信嘅「華夫人」，重有「大男人物語」、「龍虎豹勁歌金曲」（改歌詞）等。

呢本嘢以鹹相出位、文詞大膽見稱，迎合讀者口味同主動發掘題材之下，創刊初期曾創下每月銷量超過25萬本紀錄，當時每月淨收入超過港幣一百萬，成為香港本地出產鹹書中嘅經典，曾熱銷至澳門同海外；之後相繼好多鹹書跟風推出，好似同樣係林國光創刊嘅《男子漢》（1997年停刊）、《火麒麟》等。差唔多同期創刊嘅鹹書重有《Playboy雜誌》、《閣樓》中文版（已停刊）等，而龍虎豹所走嘅係相對大眾化基層路線。

1989年六四事件後，本嘢加咗好多政治評論，之後重轉變為揭秘式文章，形式就好似而家啲周刊頭條報道咁；1996年開始，多咗好多以召妓內容為主嘅成人雜誌、「馬報」，搶咗唔小市場，重有好多小型成人小報、雜誌因財政出現危機紛紛停刊，而《龍虎豹》銷量已經無舊時咁勁，反而近年內地自遊行遊客會特登嚟香港買返當年嘅龍虎豹。

而家有啲學者都鐘意用呢本嘢作為參考資料，研究1980年代香港人性愛觀，本嘢而家重有得賣。

文化影響

龍虎豹可以話係鹹書代表，甚至龍虎豹本身已經係鹹書嘅代名詞，你話睇龍虎豹，即係話你睇鹹書，就算你根本唔係睇緊龍虎豹。

香港島中環蘇豪區有日式餐廳用龍虎豹雜誌名做舖名（lúng fu pào/Lung Fu Pao），內貼裸女相，於2021年開業。

連出去

• 李偉儀《搶救本土鹹書》、《鹹書文本的考古發掘》、《鹹鹹濕濕香港地》、《雅與俗的執著》，成報連載文章，2005年11月25～28日