- 1936柏林奧運男子馬拉松項目冠軍孫基禎，以時任南韓體育協會（大韓體育會）會長嘅身份擔任火炬手，將火炬帶入開幕儀式會場。
- 點燃奧運聖火嘅同時都會將白鴿放生，寓意和平，但係呢屆點燃聖火嗰陣，有啲啱啱放嘅白鴿飛咗上聖火台度，有好多白鴿被燒死，國際奧委會之後喺1992年嘅開幕禮開始，取消放白鴿嘅環節，以放汽球、煙花取代，同埋改喺夜晚舉行，呢屆亦因而成為最後一屆有「白鴿放生」環節嘅奧運開幕禮。
- 南韓政府因為喺1986年7月到1988年11月（喺呢2年4個月期間）先後舉辦亞運會同埋奧運會嘅壓力，而實現民主化，由第五共和國成功過渡到第六共和國。
- 南韓攞到主辦權之後，北韓要求以一半嘅比賽項目移到北韓境內舉行嘅方式合辦，但係南韓唔同意比賽項目响北韓舉行，兩國傾唔埋欄，北韓杯葛比賽，重搵埋特工金賢姬發動大韓航空858號班機空難，企圖影響奧運主辦。
- 响連續三屆嘅抵制後，呢屆奧運會再度遭到咗七個國家嘅杯葛：北韓、古巴、阿爾巴尼亞、埃塞俄比亞、馬達加斯加、尼加拉瓜同埋塞舌爾（都係第二世界成員國，其中阿爾巴尼亞由1976年開始已經連續缺席四屆奧運會）。
- 美國同埋蘇聯兩大陣營經歷八年嚟嘅互相杯葛後，第一次亦係最後一次同台出現，因為蘇聯已經响1991年尾隨住戈巴卓夫辭任蘇聯總統而解體。
- 開幕禮中國代表團入場嘅時候，背景音樂係《歌唱祖國》（當時，中國、南韓並冇外交關係）。
- 加拿大百米短跑運動員賓莊遜喺呢屆奧運會上刷新男子100米世界記錄，但喺事後被發現服用興奮劑，係奧運會歷史上最哄動嘅禁藥醜聞。
- 來自東德嘅女子游泳運動員姬絲甸·奧圖連續攞到6面金牌（呢屆亦係民主德國喺東西德統一前嘅最後金牌），而美國游泳名將馬菲拜安迪亦都贏得5面金牌、1面銀牌、1面銅牌。
- 美國田徑運動員姬菲芙贏得女子100米、女子200米同埋女子4乘100米接力3面金牌，重刷新女子200米世界記錄。
- 蘇聯運動員華迪美·阿迪莫夫（Vladimir Artemov）喺男子體操比賽裡面，攞到4面金牌（包括男子體操團體、男子體操個人全能、男子單槓、男子雙槓）。羅馬尼亞嘅女子體操選手丹妮娜·施莉華絲（Daniela Silivaș）攞到3面金牌、2面銀牌、1面銅牌。
- 乒乓波首次成為咗奧運會項目，中國大陸同埋南韓各領風騷，獲2面金牌（中國大陸有陳靜、韋晴光、陳龍燦，南韓就有梁英子、玄靜和、劉南奎）。
- 網球喺闊別64年後重返奧運會，西德女子網球運動員施特菲嘉芙創下咗網球史上到目前為止唯一一次嘅年度金滿貫。
- 兩名保加利亞舉重選手喺被查出食運動禁藥後被褫奪金牌，保加利亞舉重隊宣佈退出比賽。
- 美國跳水運動員盧根尼斯喺男子3米彈板跳水、男子10米高台跳水成功冧莊，當中喺男子3米彈板跳水裡面，雖然喺3米板初賽中頭獎，血染泳池，但最後仍然喺3米板決賽打低兩名中國大陸選手譚良德、李德亮。
