2008年藏區騷亂

2008年藏區騷亂係2008年3月喺中華人民共和國多處地方發生嘅示威抗議，後來出現暴動，好多鋪頭同車被焚毀，多人死傷。騷亂主要喺3月14號西藏首府拉薩發生（中國官方稱為「三•一四事件」），除此之外，甘肅甘南藏族自治州、四川阿壩藏族羌族自治州亦有發生騷亂。喺騷亂啱啱發生嘅時候，中國政府嘅警察並未即時制止，而事後中國政府拉咗大量藏族民眾同埋喇嘛，聲稱係丹增嘉措同其它境外分離組織「有組織、有蓄謀、精心策劃和煽動起來"白勺"」。中國政府聲稱騷亂嘅起因係部分藏族示威者為咗紀念1959年3月初武裝反抗中華人民共和國49週年，喺西藏集體抗議。但後來演變成有藏族暴徒襲擊漢族、回族平民、鋪頭、車等民用設施，直接造成18名平民死亡。但係達賴喇嘛聲稱佢從來冇支持暴力嘅抗爭行為，認為騷亂嘅主因係因為中國政府唔公平嘅施政引起人民廣泛不滿，而且西藏近年來漢族大量移民，引發民族矛盾。喺印度、尼泊爾、歐洲同美國等多國都有人抗議中國政府，質疑中國以騷亂為名義鎮壓藏族人。2008年奧運會聖火接力過程中亦遭受各國示威者抗議。事後中國同西藏流亡政府各派代表進行會談，但係並未達成任何共識。

2008年藏區騷亂
係一個	起義
座標	31°42′N 86°56′E
日期	2008年
共享類	維基同享中有關2008 Tibetan unrest嘅同享資源
2008年藏區騷亂嘅位置
[改維基數據]

橙色嘅地方係藏人聚居嘅區域

喺騷亂期間，中國政府唔容許境外同埋香港傳媒進入藏區，而中國嘅官方媒體都企圖淡化事件，因此難以證實官方嘅報導有幾真確。而西藏流亡政府指有好多藏族人被暗中拘捕，亦未能夠證實。