回族粵拼wui4 zuk6小兒經حُوِحُوِحواري;中國標準羅馬字:Hui,字母代碼:HU,數字代碼:03[2]),又叫回回人wui4 wui4 jan4回民wui4 man4中華人民共和國少數民族,係中國最大嘅穆斯林族群。回族從語言到遺傳體質都同漢族好似,唯一唔同嘅地方就係佢哋信清真教,呢點凝聚咗成個回族。回族向中國各地都有,分佈得比較平均,人口1058萬(2010年數據),佔中國穆斯林人口一半。

回族
حواري / حُوِحُوِ
總人口
1058萬6087人[1]
分佈地區
中華人民共和國 中華人民共和國
語言
回回話
宗教信仰
清真教

歷史同文化 編輯

回族起源於外貿興盛嘅兩代,當時有好多阿剌伯人、波斯人呢啲外國穆斯林經中亞印度洋來中國定居,同中國人(主要係漢人)彼此通婚,慢慢形成回族。喺回族社區入邊往往會有清真寺呢啲聖廟。語言上講唐話,但涉及宗教時(清真)會有阿剌伯話波斯話突厥話嘅語彙。人名上同漢人唔會好唔同,不過其中姓馬嘅人好常見,呢個姓係取自清真先知模罕默德個名。回族同其他民族如漢族混居而和平共處,佢哋據清真教法生活,所以從飲食習慣到冠婚葬祭,生活方式同漢人好唔同,就呢啲唔同成為民族區分嘅根據。佢哋嘅文化特點相近於伊朗嘅波斯人。

清朝時對漢族出身嘅穆斯林默認爲「回民」或者「漢回」。到共和國時期就要喺班穆斯林中做民族識別。喺民族識別之初,應回民要求設咗「回族」呢個民族範疇[3],不過嗰時民族政策睇血統,有唔少唔信清真教嘅人因為血緣劃咗去回族。亦都有啲人因為中國法制上少數民族有優待政策而叫自己做回族,於是有啲「回族」係唔信教、唔屬回族文化,有啲穆斯林反而叫係「漢族」。

清末時中國西部如甘肅有回民造反,畀清朝鎮壓後,有部分回民去咗沙俄治下嘅中亞定居。佢哋嘅子孫家下叫做東干人,住喺蘇聯曾經統治嘅哈薩克吉爾吉斯俄羅斯(大部分喺韃靼共和國)。

廣府回民 編輯

內文:蕃坊

廣府好早就有回民,廣州作為海上絲路起點,自唐朝開始就係個國際都會,形成咗蕃坊呢個僑民區,其中大部分係中東穆斯林,自此,廣州成為中國最早傳入伊斯蘭文化嘅地方之一,伊斯蘭文化亦都有貢獻到廣府文化。

廣府回民來源有二,一係唐宋落籍嘅中東後裔,二係元明從國內其他地方遷來嘅回民。[4]

而家廣州回民唔算聚居,喺懷聖寺一帶多啲。雖然廣州係中國最早有回民嘅地方之一,但而家係最少回民嘅地方,原因在於[5]

  • 最大嘅原因:明末時,清軍攻打廣州,當時有回民三將領(後譽教門三忠[6]):馬承祖、羽鳳麒、撒之浮死守廣州,城破殉職,喺廣州屠城時對回民大開殺戒,毀壞經堂,到康熙時先恢復。
  • 回民聚居喺各清真寺,其中南勝里最多,稱之為回回村,後來開馬路,遣散咗族群。

飲食 編輯

回民飲食最典型係唔食豬肉,此外重有諸多講究,同選料不拘一格嘅粵菜大不同,比如禁酒,唔食自然死嘅嘢、,唔食勒、打、跌而死嘅畜生,唔食清真教視之為污糟、有害、古怪嘅嘢。舊時回民買得禽畜,都要送清真寺請人劏,限制好多。

但限制之下亦都發展出清真粵菜。清真菜口味比較濃,整牛羊肉之類嘅嘢一流,而清真粵菜就回菜粵做,融匯一濃一淡嘅風味,另外就係從選料到製作、出品會合乎教法。目前廣州西門口嘅回民飯店係全國唯一嘅清真粵菜飯店。[7]

回民亦都創造出獨具特色嘅點心小食,比如清真月餅,其中最出名嘅有油香餅(又叫教門油香餅)[8]牛雜[9]和味蘿蔔

教育 編輯

回民重視教育,廣州嘅清真寺曾經專門開辦經堂,類似於教會學校噉設宗教、文化兩類科目,教經文、教義、阿剌伯文。到咗共和國時期就成立回民小學,不過就驅除宗教。

歷史遺跡 編輯

  • 懷聖寺:中國第一間清真寺,由模罕默德親信宛葛思帶住四十先賢來華傳教創辦。喺光塔路。
  • 光塔:懷聖寺嘅宣禮塔,唐代遺物,矗立鬧市千年重保存落來,中國罕見。
  • 宛葛思墓:又叫聖墓、大人墳,俗話回回墳,而家起咗間先賢清真寺。喺流花橋(蘭圃之北)[10]
  • 東營寺:喺小東門。緣起自明成化年間,憲宗派韓雍率四營回兵鎮廣州,一時回教大興,分駐於大南、濠畔、小東門等處,廣州一下子多咗幾間清真寺,呢啲回回軍戶當時又叫達官兵,後來喺明末抗清衛穗有好大貢獻[11]
  • 南勝寺:喺大南路。
  • 濠畔寺:喺濠畔街。
  • 東郊寺:喺東較場。
  • 舊日蕃坊地區嘅街巷名源自阿剌伯話

自治地方 編輯

  • 自治區
  • 自治州
  • 自治縣
    • 河北大廠回族自治縣
    • 河北孟村回族自治縣
    • 青海門源回族自治縣
    • 青海化隆回族自治縣
    • 青海民和回族土族自治縣
    • 青海大通回族土族自治縣
    • 雲南巍山彝族回族自治縣
    • 雲南尋甸回族彝族自治縣
    • 新疆焉耆回族自治縣
    • 甘肅張家川回族自治縣
    • 貴州威寧彝族回族苗族自治縣
  • 回族區

睇埋 編輯

編輯

  1. China - The Hui Ethnic Group
  2. . 中國社會科學院民族研究所. 1992年4月1號. 原著喺2011年11月15號歸檔. 喺2015年4月6號搵到.
  3. 回族嘅民族意識源自回族經歷到嘅自清代到民國嘅歷史背景、政治經濟狀況,以及佢個族群喺語言、血統、宗教上意識到嘅嘢。另外漢人對回民嘅差別意識、中華人民共和國嘅民族自決意識都促成回民嘅族群意識。
  4. 廣州回族文化雜錦[失咗效嘅鏈]
  5. 50年前的廣州回教. 原著喺2016年3月4號歸檔. 喺2013年9月23號搵到.
  6. . 原著喺2013年4月6號歸檔. 喺2013年9月23號搵到.
  7. 州回民飯店 促進民族團結的窗口. 原著喺2016年3月4號歸檔. 喺2013年9月23號搵到.
  8. 廣州最愛油香餅 童年美味回憶何處尋. 原著喺2015年6月7號歸檔. 喺2013年9月23號搵到.
  9. . 原著喺2016年1月2號歸檔. 喺2013年9月23號搵到.
  10. 國伊斯蘭教重要古蹟 清真先賢古墓. 原著喺2013年6月1號歸檔. 喺2013年9月23號搵到.
  11. . 原著喺2013年4月11號歸檔. 喺2013年9月23號搵到.