Amina 襲警案

Amina 襲警案係2010年香港一宗罪案。香港交易所獨立非執行主席夏佳理個姨甥女、香港法官包致金個侄女Amina Mariam Bokhary（1976年出世）喺2010年1月27號醉酒揸車、又唔肯吹波仔、重兜巴星男差人，全程畀電視台錄低。同年8月一審聆訊時，裁判官阮偉明判被告感化一年，被告雖然有兩次襲警案底入冊，有異同類襲警同埋醉揸案。

因Amina係夏佳理嘅姨甥女，判決引起香港公眾質疑司法公正。律政司提出咗上訴。嗰年12月，Amina因為違反感化令條件，判監六個禮拜，坐咗四個禮拜監之後按程序提早釋放。

前科

喺呢件事之前，Amina已經有兩次襲警前科。

2001年6月佢喺中環一間酒吧外同男朋友嘈交，用木盤打爆酒吧射燈，重襲擊趕去現場嘅警員，兼且俾人發現佢藏有微量可卡因，事後裁定刑事毀壞及襲警罪成，罰款九千蚊，藏毒罪就唔成立。

2008年7月，佢酒後打的返屋企，區區十幾蚊車錢，佢話要用信用卡找數，司機唔肯，Amina 就將信用卡掉落司機度，又用腳踢佢；有個女警到場時，Amina 照樣砌女警。佢承認普通襲擊罪同襲警罪，被判240小時社會服務令，向的士司機賠一千蚊。

過程

2010年1月27號，Amina 凌晨喺跑馬地司徒拔道，迎頭撞向一架巴士，車頭爛晒，但冇人受傷。警員接報到場，見到女事主成身酒除企埋一邊。

警方係咁叫Amina吹波仔（酒精測試），Amina唔肯，更同警員講：「我唔知你講乜」，警員用英語讀警告書，講明車禍司機一定要吹波仔，但佢依然唔理，起勢用英文講：「我唔理，我要走」，企圖轉身離開時，警員鄧文偉出手阻止，女事主大叫一聲：「咪掂我！」，然後兜巴星落鄧文偉塊面。

鄧文偉最初痴呆咗一陣；兩秒後，慢動作跌落路邊；又二秒後，大叫：「呀！」又隔幾秒，指住女事主話：「拉佢！」之後用對講機同控制室講：「我俾個女人打咗一下，隻耳仔溫溫聲，紅晒呀，依家聽唔倒嘢！」佢送院敷治後，無乜大礙。Amina 被扣上手扣，帶返差館，去到差館後，條女再星咗女警余嘉慧一巴。

事後，警方告 Amina 襲警、唔受呼氣酒精測試同埋醉駕共三宗罪，但佢喺差館內摑咗女警余嘉慧一巴，就算數唔告佢。

審訊

2010年8月2日，Amina Mariam Bokhary承認襲警、不小心駕駛同冇提供酒精呼氣樣本三宗罪，裁判官阮偉明睇佢個感化報告後話有美滿家庭同良好教育，大學時又一級榮譽畢業，但幾年前有精神問題而飲大咗。裁判官話佢本身冇暴力傾向，唔係壞人，而係病人，所以輕判噉話。

第二日，阮偉明判被告接受感化一年，頭3個月將要去美國加州一間治療中心接受住院治療，返到香港後會繼續跟進佢酗酒情況，每4個月聽取進度報告；而Amina唔肯吹波仔同不小心駕駛罪，就輕罰八千蚊兼停牌1年。

個官噉判，公眾狂鬧。警隊話以後見到有錢人就唔使執法，咁好打擊前線執法人員嘅士氣。Amina係終審法院常任法官包致金姪女，輿論同市民都批評判刑有瓜田李下之嫌。

律政司為回應社會呼聲，事後提出司法覆核，即係由個官去重申量刑，2010月8月6號，原裁判官阮偉明進行覆核時，質疑律政司點解唔直接上訴，而覆核時，佢重申被告係病人而唔係壞人，堅持維持原判。律政司當晚決定上訴，案件遲吓會由高等法院審理。

後續爭議

良好背景

法官判刑時，曾經指出Amina有「背景良好」及「一級榮譽畢業」，呢番論點引起唔少人質疑。有啲人將「法律面前，人人平等」改成「法律面前，窮人含𡳞」，發起印 Tee 抗議；「含𡳞」係粵語粗口，意思係「含賓周」，引申成「去死啦」。同年8月8日，大約300個市民著住象徵「香港法律已死」嘅黑衫，上街示威，抗議判決偏坦權貴。

大律師陸偉雄事後話，法官口中講家庭背景，係考慮家人會支持被告；而教育背景就反映對方會唔會放棄自己同作出個人努力，佢係咪有錢同係咪讀名校畢業無關；但香港人權監察話，良好背景呢種理據，通常用喺少年犯身上，法官將屢犯者嘅家境當成正面因素，唔係咁恰當。

控罪過輕

因為歷史原因，香港就襲警行為有兩條刑罰不一嘅法規，分別係《警隊條例》（第232章）第63條以及 《侵害人身罪條例》（第212章）第36(b)條。其中《警隊條例》最高罰5000元同監禁半年；而《侵害人身罪條例》因針對「襲擊、抗拒或故意阻撓」執勤警員，最高可判監兩年，冇得緩刑。

自2007年起，香港警方曾經24次檢控示威者襲警，無論案情係點，全數都用罰則較重嘅《侵害人身罪條例》檢控。相比之下，對普通市民，就用罰則較輕嘅《警隊條例》去起訴。包致金侄女雖然已經四度襲擊（其中一次不獲提控），但法官仍採用刑事較輕嘅《警隊條例》去檢控，民間人權陣線警權組召集人王浩賢批評警方同律政司亂咁嚟，又話裁判官阮偉明只係按照條例作量刑考慮。

輿論

一審判決除咗引起輿論嘩然，重搞到市民上街示威，香港資深大律師李柱銘話社會人士唔應該向法庭施壓，如果法庭見大家群情洶湧，就判包致金侄女坐監，就會變成暴民統治，咁就真係損害香港法治喇。

李大狀承認三次襲警但唔使判監，係「唔尋常」，但Amina今次第一次爆自己有躁鬱症，法官判刑時一定要諗下，判監會令佢變得更差定更好、對社會係咪有好處，佢更話如果由佢做法官，可能都咁判。

佢又話成件事最值得注意係包致金嘅角色，如果無證據話佢干預司法、影響判決，公眾根本冇理據懷疑阮偉明判決受干預。佢又話作為法官，一定要根據檢控方選擇嘅條例而量刑，又將個波推畀律政司，話律政司用罰則較輕、可判緩刑嘅《警隊條例》去檢控當事人，法官只好跟住條例去判案。

警隊反應

判刑喺警隊引起好大議論，好多差佬覺得咁好打擊士氣，日後對住呢班「有錢女」，都唔知點搞。至於被人兜巴星嘅警員鄧文偉事後接受蘋果日報訪問時，批評「法制腐敗」，又話自己當差廿年，面對呢啲「有背景有勢力又有錢」嘅人，早就預咗會咁判。

佢被摑嘅片段喺網絡上廣泛傳播，搞到好多人指住佢笑，班網民重笑佢被襲跌倒後喊出「啊」一聲時，演技太差，呢啲影片不斷俾網民拎嚟玩，搞到佢好困擾，喺大陸嘅女朋友話佢「懦弱無能」，分手收場；讀緊小五嘅囡囡上堂時，老師正好講起呢單案，同學馬上指著囡囡講：呢個咪係佢老竇囉，搞到囡囡好唔開心。

2010年8月9號，警司協會、警務督察協會、海外督察協會、警察隊員佐級協會代表，同警隊好多大粒佬高層開會，要求高層支持前線警員提出民事索償。而家工會聯絡緊兩名被襲警員，叫佢哋諗下要唔要提出民事索償。如果去馬，高層同工會都撐佢哋。

判監

2010年12月23號中午，Amina 因為違反7項感化令中5項，被判坐六個禮拜監。代表律師即時申請保釋，但被法庭拒絕。晏晝1點半左右，再向東區裁判法院提出保釋，再俾法庭駁回。隨即再向高等法院申請保釋。佢最後坐咗四個禮拜監，喺2011年1月22號按程序提早釋放。

2010年12月24號，高等法院拒絕接受Amina嘅保釋申請。法官話，Amina申請保釋等候上訴以時間緊迫為由，但法庭唔認為係有效理據，因為法庭重未收到裁判法院轉交嘅文件。法官又話，被告係保釋定係還押等候上訴，法庭唔理，加上被告已經有3次襲警紀錄，法官睇唔到佢有乜理由可以上訴得直。2011年1月11號，上訴庭決定將Amina嘅停牌期加長到三年。