大路思想謬論

大路思想謬論（粵音：daai⁶ lou⁶ si¹ soeng² mau⁶ leon⁶；拉丁文：Argumentum ad populum），又叫主流思想謬論，係一種謬論，指啲人純粹因為個主張大路、多人信就覺得佢真確合理－犯主流思想謬論嘅人條思路係套主張多人信就係真確。社會大眾好多時都係噉樣諗嘢，而且有好多社會現象都係由呢種行為引起。之但係歷史一次又一次噉證明咗，好多曾經係「多數人都信」嘅諗頭最後都證實係錯，呢種思路依然係種謬論。

好多時人都有羊群心理，諗住跟大隊就等如係啱。

主流思想謬論喺英文有好多個名，包括以下呢啲：

• 訴諸群眾（Appeal to the masses）、
• 訴諸信念（Appeal to belief）、
• 訴諸主流（Appeal to majority）、
• 訴諸人氣（Appeal to popularity）、
• 共識論證（Argument by consensus）、
• 共識謬論（Consensus fallacy）

…呀噉。

例子

基督教 1

阿甲／A君：我改信咗基督新教，因為我睇到基督教係世界上最多人信嘅宗教，有成22億人信，佢應該係真㗎嘞。

阿乙／B君：但係信天主教嘅人數多過新教喎，點解你信新教唔信天主教？

阿甲／A君：噉呀…我去睇睇。

阿乙／B君：講開又講，天主教內部又有得細分做好多唔同教派，你係咪要查吓邊派最多人信先決定信邊派？

基督教 2

阿甲／A君：我改信咗基督新教，因為我睇到基督教係世界上最多人信嘅宗教，有成22億人信，佢應該係真㗎嘞。

阿乙／B君：2500年前，耶穌未出世，嗰陣時世界嘅各大文明幾乎冚唪唥係多神信仰主導。我諗嗰陣時啲人有好多都會話「多神論多數人都信，實啱」。

荷里活科學

荷里活科學（Hollywood science）講緊一種現象，指荷里活呢啲大眾媒體將佢哋對科學嘅種種誤解加落去佢哋啲戲同其他文化產品度，搞到社會大眾好多時跟住佢哋一齊有埋呢啲誤解。例如係黑洞喺好多科幻片都描繪成好似會將佢附近嘅嘢都吸嗮入去噉－但係讀過物理同天文嘅人會知呢種係對黑洞嘅誤解。荷里活科學令好多人都對科學知識有錯誤理解，但係當然，專業科學家做嘢要應付嘅係真嗰啲科學知識，如果佢哋信荷里活科學嘅話就會好大件事－荷里活科學多人信，但係依然係錯。

分析

衰乜

「嗰套主張多人信，佢就係真嘅」呢條思路有好多問題：

• 呢條思路查實根本自相矛盾，佢嘅基礎結構如下：

意見甲主流嘅人都信佢係真。

意見甲實係真嘅。（結論）

• 呢套論證假設咗「信主流意見嗰啲人唔會犯錯」，而呢項假設同佢成條思路嘅必然結果有所矛盾：一個無可否定嘅事實係，人同人之間好多時都會有意見分歧嘅情況；當兩個人持有互不相容嘅兩套見解嗰陣，佢哋應該是但一套係錯嘅（又或者兩套都錯）；犯主流思想謬論嘅人會揀信多啲人信嘅見解；既然佢認為「少人信啲嘅見解係錯嘅」，噉就表示佢認為「人有可能犯錯」；如果人有可能犯錯嘅話，噉擁護主流意見嘅人都有可能會犯錯－最後爾點同主流思想謬論嘅假設矛盾。

• 「點先算係主流」係大問題：有51%嘅人信嘅諗頭算唔算「主流」？定係要去到有成八、九成人信先算？兩者之間有乜分別？「主流」同「非主流」之間條界線要點畫？
• 歷史上人類多次噉運用咗呢條思路諗嘢，後嚟先至知自己錯咗，例如係中世紀歐洲嘅羅馬教會同佢哋信徒－都根據佢哋對聖經嘅解讀而主張地球係宇宙中心，仲迫害伽利略等主張日心說嘅科學家；呢班科學家嘅研究指出教會係錯嘅，但後嚟嘅科研證實咗伽利略佢哋先啱。
• 用呢條思路嘅人好多時都假設咗人曉分析自己嘅諗法同按照證據嚟改正自己，但係事實係心理學同社會學等多門領域嘅研究顯示，人好多時都唔係噉理性（詳情可以睇從眾效應）。
• 由此可見，意見嘅人氣有幾高同佢「係咪真確噉描述事實」呢兩樣嘢之間查實冇必然關係，所以主流思想謬論係唔啦更謬論嘅一種－當有人用「爾種意見人氣高」為由去撐某意見嗰陣，佢講緊嘅嘢其實根本唔能夠真係撐得到佢嘅意見。

類似情況

喺某啲情況，有啲類似訴諸群眾嘅思路係可以接納嘅，例如：

• 當討論各方喺度傾緊嘅係有關「某個意見有幾高人氣」或者類似嘅問題嗰陣，觀察嗰個意見嘅人氣可以答到條問題。呢類討論喺市場學等嘅領域嗰度零舍常見。但係當然，就算結果係「嗰個意見人氣極高」，都唔等如嗰個意見係可以真確噉描述現實嘅。
• 喺某啲情況下，揀跟大隊係可取嘅選擇：例如係對於好多中世紀嘅歐洲人嚟講，選擇跟大隊信羅馬教會講嘅嘢係有利嘅－可以唔使好似伽利略噉受迫害。但係當然，就算一個信念對自己有利，都唔等如佢係真確嘅，有大把人－好似係騙子－都會為咗自己嘅利益而散佈一啲虛假嘅諗法。
• 喺語言學上嚟講，語言呢家嘢查實冇客觀嘅啱同錯。如果某種句法或者用詞喺一個語言群體入面夠多人用，噉佢就可以算係「啱」嘅，能夠幫到嗰個語言群體互相溝通。相反，有一部份主張規範文法嘅人會主張無論一種用法幾多人用，如果佢得唔到官方認可，噉佢就係錯嘅。
• 上述嘅呢啲情況都有一個共通點：佢哋嘅「啱」唔係要求真確噉描述現實。「啱」係一個好主觀同一詞多義嘅字，可以指「真確噉描述到現實」，又可以指「對做決定嗰方最有利」或者「對大家有利」。當一個人追求嘅係要一個信念真確噉描述現實嗰陣，佢心目中嘅「啱」就係要「真確噉描述到現實」，但係現實世界好多人都唔係想追求真確嘅信念，所以對佢哋嚟講，「啱」呢個字可以有其他意思。

反面

• 有陣時又會有啲人主張「意見純粹人氣高就係錯」；呢種思路同訴諸仇恨有啦掕，好多時嗰個人睇唔起普羅社會大眾，覺得佢哋蠢就一定係錯；不過事實係，就算係蠢人有時都可以諗到啲真確嘅見解，而聰明人有時都會犯錯；所以「意見人氣高」唔等如佢一定錯。

睇埋

• 羊群心理
• 認知偏誤
• 情報操作
• 謬論
  • 唔啦更謬論
  • 草人謬論
  • 語境去除
  • 單方論證

參考

• Ronald Munson同Andrew Black《The elements of reasoning》第六版。
• FallacyFiles.org，Bandwagon Fallacy。