BCG 矩陣

BCG 矩陣（英文：BCG matrix）係策略管理上一種用嚟分析數據嘅工具，形狀似個矩陣。

一個 BCG 矩陣

概論

睇埋：市場研究

要用 BCG 矩陣，分析者要搜集有關自己公司每件產品嘅市場佔有率（market share）同增長率（market growth）嘅數據（睇埋市場研究），然後用呢啲數據畫出一個 BCG 矩陣。

一個 BCG 矩陣有兩條軸，打橫嗰條代表市場佔有率（愈左表示愈高），打戙嗰條代表增長率（愈上表示愈高），每一點代表間公司其中一件產品。

靠住呢個矩陣，管理者可以將間公司啲產品分做四種，並且制定跟住落嚟要採取嘅策略：

• 低增長、高市場佔有率嘅產品就算唔點樣落力做開發創新，都可以持續幫間公司賺錢；呢啲產品就係所謂嘅現金牛（cash cow）。
• 高增長、高市場佔有率嘅產品係最有潛力嘅，需要投資大量嘅資源做開發創新；呢啲產品係所謂嘅明星（star）。
• 高增長、低市場佔有率嘅產品需要做進一步評估，睇吓間公司有冇本事增加市場佔有率，令呢啲產品變得更加有利可圖；呢啲產品係所謂嘅問號（question mark）。
• 低增長、低市場佔有率嘅產品係最冇潛力嘅，需要考慮放棄；呢啲產品係所謂嘅狗（dog）。

睇埋

• 營商策略
• 管理學
• 營銷學