MIRROR.WE.ARE LIVE CONCERT 2022
《MIRROR.WE.ARE LIVE CONCERT 2022》係香港男子音樂組合MIRROR嘅第三個演唱會，係組合頭一個喺香港體育館搞嘅演唱會。而呢個演唱會亦係香港體育館頭一個用實名制賣飛嘅演唱會。主辦單位係MakerVille同大國文化。
| MIRROR嘅巡迴演唱會 | |
| 地點 |  香港紅磡體育館 |
|---|---|
| 開始日期 | 2022年7月25號 |
| 結束日期 | 2022年8月6號（原訂） 2022年7月28號（實際） |
| 場數 | 12（原訂） 4（實際） |
| MIRROR演唱會年表 | |
演唱會原定喺2022年7月25號到8月6號舉行，總共開12場，但7月28號第4場因為舞台上面嘅巨型屏幕跌落嚟壓傷兩個舞蹈員，結果要腰斬淨低嘅場次。原定有三場同時經網上直播平台MakeALive直播嘅安排，亦因相關場次被取消而未成事。
歌單
編輯| 歌名 | 主唱 |
| 《Innerspace》、《Reflection》、《All in one》 | 全員 |
| Rap | Tiger、Jeremy |
| 《黑夜不再來》 | Jer |
| 《半》 | Jeremy |
| 《鶴頂紅》 | Frankie |
| 《衝口而出》 | Stanley |
| 《狂人日記》、《九》 | Jer、Jeremy、Frankie、Stanley |
| 《作品的說話》 | 姜濤 |
| 《人類群星閃耀時》 | Jer |
| 《金星女孩》、《信之卷》 | Anson Kong |
| 《蝸牛》、《另一個諾貝爾》 | Anson Kong、Ian |
| 《King Kong》、《Mr. Stranger》 | Anson Lo |
| 講話 | Frankie |
| 《無盡》 | Frankie→全員 |
| 《12》、《神隊友》 | 全員 |
| Drum battle | Tiger、lokman |
| 《Yellow Fever》 | Jer、Tiger、Stanley、Lokman |
| 《黑之呼吸》 | Tiger |
| 《收聲多謝》 | Lokman、Jer、Tiger、Stanley |
| 《Distance》、《留一天與你喘息》 | Ian |
| 《鏡中鏡》 | 姜濤、Stanley、Tiger |
| 《E先生連環不幸事件》 | Edan |
| 《My Apple Pie》、《Elevator》、《Megahit》 | Edan、Anson Lo |
| 《虎道門》、《道路使用者的有型守則》、《Rebound》 | Anson Kong、Lokman、Alton |
| 《Boss》、《Ignited》、《We are》 | 全員 |
| （encore）《一秒間》、《蒙著嘴說愛你》、《One and all》 | 全員 |
爭議同事故
編輯今次演唱會由公開賣飛至到正式表演，都出現唔少爭議同事故[1]。
賣飛安排爭議
編輯只留較差嘅位畀公開發售
編輯演唱會約莫三分之二嘅飛都預留做內部認購同贊助商，只係得約莫三分之一嘅飛公開發售，而公開發售嘅位置都係後排同比較差嘅位置，即使有小量係前排嘅位，亦有粗電纜遮擋視線。
門票發售網站超出負荷
編輯演唱會喺5月31號朝早10點正式開售約莫37,700張飛，但因為門票發售網站超出負荷，好多人去買飛嗰陣都載入唔到，甚至等咗大半日最後都係買唔到。
捆綁式銷售壓榨歌迷
編輯部份贊助商攞到飛後藉住捆綁式銷售去增加自己嘅生意。其中香港電訊搞咗個門票抽獎活動，抽中後再選購至少過萬港紙嘅指定服務就可以攞飛，因為好多歌迷買唔到飛，逼住要幫襯去攞飛，令佢哋覺得呢種做法係搶錢。
意外頻生
編輯總綵排誤踩台板意外
編輯7月24號開騷前一晚嘅總綵排，因為各人唔熟悉舞台機關，有人誤踩台板而令一位舞蹈員受傷入院。意外之後因為有人將責任推到舞蹈員身上，一度令大量舞蹈員不滿，最後MIRROR成員出聲撐舞蹈員，先至平息事件。
舞台機關唔穩陣
編輯7月25號第一場，江𤒹生喺貨車型升降台跳唱，期間升降台突然搖動，佢要用手撐地企穩。同場後段，MIRROR一眾成員企喺吊起嘅天橋上面演唱，但橋板激烈搖動，亦有成員差啲跌倒。第二場開始將天橋演唱環節改喺平地演唱。
陳瑞輝失足跌落台
編輯7月26號第二場，陳瑞輝喺演講環節因為行得太近台邊而失足跌落台，好彩只係左手前臂擦傷，冇大礙。第三場開始陳瑞輝改喺平地演講。
冧巨型屏幕導致演唱會腰斬
編輯
7月28號第四場，呂爵安同盧瀚霆跳唱嗰陣，舞台上面一個4米乘4米、重600公斤嘅巨型屏幕突然冧咗，壓傷兩個舞蹈員，MIRROR經理人黃慧君上台向現場觀眾宣佈演唱會因發生重大事故而即時腰斬，而救護員到場將傷者送到伊利沙伯醫院。兩名傷者入面，一位重傷一位輕傷，重傷嗰位係女子組合COLLAR時任成員蘇芷晴男朋友李啟言（阿Mo），輕傷嗰位舞蹈員張梓峯。張梓峯喺29號晚已經出院；李啟言因為腦部同頸椎受傷，一路要留喺深切治療部同做多次手術。
後續
編輯- 演唱會腰斬後，MIRROR全面停工，到10月復工。因為冧屏幕事故嘅重傷者係COLLAR成員蘇芷晴男朋友，令到COLLAR亦全面停工，復工無期。
- 主辦機構MakerVille因應冧屏幕事故，取消原定喺事故第二日（7月29號）搞嘅新劇《那年盛夏 我們綻放如花》嘅開鏡拜神儀式[2]。
- 雖然今次演唱會嘅主辦機構係MakerVille同大國文化，ViuTV並冇角色，但因為MIRROR係經ViuTV出道，加上屬同一間母公司，令ViuTV亦成為被指責嘅對象。ViuTV因應事態，決定改動一啲原定嘅節目播映安排，包括抽起原定8月6號晚首播嘅《膠戰SSP》，就連禮拜六下晝重播嘅節目《今晚瞓酒店》亦因為有MIRROR成員呂爵安參與而臨時改為重播另一節目《餸情》。而ViuTV節目嘅社交媒體宣傳同實體記者會亦會一路暫停到8月中[3]。原定8月底首播嘅劇集《季前賽》，因為有多名MIRROR成員主演，亦延期到10月下旬播出。
- 7月30號商業電台嘅《903專業推介》跳咗唔播3首同MIRROR或COLLAR有關嘅上榜歌。
- 商業電台原定喺 9 月 3 號同 9 月 6 號舉行嘅《903 AllStar 籃球賽》同《拉闊音樂會 神の拉闊 鄭欣宜 x 盧瀚霆》因為有MIRROR成員參與而延期11月舉行。