魔法風雲會

魔法風雲會（粵音：mo1 faat3 fung1 wan4 wui2；英文：Magic: The Gathering，簡稱 Magic 或者 MTG），中文又有叫萬智牌，係一種集換式咭遊戲，響1993年由美國人 Richard Garfield 發明。呢個遊戲面世，受紙牌玩家喜愛，瘋魔各地玩家。玩遊戲嗰時，雙方各自用一副牌，亦可以三至四個人，或者更多嘅人一齊玩。目標係將對手嘅 20 生命分減到 0，可以透過出牌攻擊或者好多其他方法去贏。

基本

睇埋：集換式咭遊戲

《MtG》最基本嗰款對局係噉嘅：對局有兩位玩家，各有 20 點生命值，對局開始嗰陣兩位玩家分別由自己咭組度抽 7 張咭上手，佢哋跟住就會輪流行動，一位玩家喺自己回合開始嗰時可以由自己咭組嗰度抽 1 張咭上手；啲咭係可以以某啲方法嚟削減對手生命值嘅，生命值首先變成 0 嗰方就輸；雙方砌咭組嗰時要考慮咭之間互相配合，喺對局途中就要做「呢張咭應該喺咩時機用」噉嘅策略性思考。

上圖係一張 MtG 嘅範例：Card name－張咭嘅名；Mana cost－張咭嘅「法力成本」；Card art－會係一幅圖畫。

圖下面啲字就會講解張咭係做咩嘅，例如－

「咒語，出咗會對對手生命值直接噉造成 3 點傷害」

「咒語，出咗你可以即場抽三張咭」

「龍魔獸，攻擊力 5（每吓攻擊 5 點傷害）」

「結界，只要呢個結界喺場上，對手啲攻擊力 2 或以下嘅魔獸冚唪唥唔准攻擊。」... 呀噉。

概念

• 檯面狀態（board state）：MtG 會用「檯面上嘅嘢嘅狀態」嚟表示遊戲狀態；下圖係 MtG 嘅檯面佈置：
  • Library：雙方嘅咭組擺呢度；
  • Hand：對局雙方手上嘅咭，正路係私有資訊，唔使俾對手知嘅；不過可能有啲咭會有「容許玩家睇對方手牌」嘅效果－例如一張咒語咭，出咗嘅效果係「可以睇對手手上有乜牌」；
  • Battlefield：所謂嘅「戰場」，召喚咗出嚟嘅魔獸同結界就擺喺呢度，而且魔獸之間嘅攻防都係喺度進行嘅；喺多數嘅 TCG 當中，一張戰場上嘅咭「响戰場上邊個位」並唔重要，不過亦都有小部份嘅 TCG 會有機制，令一張咭喺戰場上嘅位置有某啲重要性，例子可以睇吓巫師之昆特牌－喺巫師之昆特牌裏面，每位玩家嘅戰場都會分兩至三排，而好多咭嘅效果都會視乎「玩家將呢張咭擺喺邊一排」而有異。
  • Graveyard：所謂嘅「墳場」，專擺啲廢棄咗嘅嘢，好似係用完嘅咒語、俾對手打死咗嘅魔獸或者俾對手破壞咗嘅結界呀噉。

• 徵兵模式（draft），又或者叫「渣虎」：如果話一班 MtG 玩家玩緊徵兵，意思係話佢哋唔係好似一般嘅對局噉，自己收集咭，砌自己嘅咭組，然後進行對局，而係若干個玩家輪流由一拃隨機抽嘅咭入面，揀自己要嘅咭，再即場用得到嘅咭砌咭組進行對局；例如一班 MtG愛好者約好，大家夾錢買十包 booster 一人攞一包上手，由手上嗰包揀一張咭用，然後將手上嘅包傳俾隔離嗰位玩家，再由攞到手嗰包嗰度又揀一張咭用... 如此類推，一路直至每個人都夠咭砌一副咭組為止，砌好就對局。

一個人喺度收藏《Magic: The Gathering》咭，而且仲用膠套好好噉保養住啲咭。等到第時依啲咭難搵嗰陣，物以罕為貴，位收藏家就有可能可以用高價賣出佢啲收藏品。

拎

• magic the gathering stats Magic online tournament archives and deck lists
• MTG Mint Card - 全球最大中文万智牌交易網站