收藏

收藏sau1 cong4（英文名叫 collecting，粵拼：ko6 lek1 ting4）係種嗜好，指玩收藏嘅人（收藏家sau1 cong4 gaa1）走去搵某一個類型嘅物品，搵咗返嚟之後會將呢啲物品（收藏品）分類儲好，仲會對佢搵咗返嚟嗰啲物品進行維護同保存，即係唔淨只想自己啲收藏品有咁齊得咁齊，仲想確保自己啲收藏品企企理理，可以攞去展示畀人睇。好多細細件嘅物品都會畀人攞嚟收藏，例子有郵票、銀仔或者某啲畀人覺得好睇嘅昆蟲（好似係蝴蝶同各種甲蟲）... 呀噉，大件啲嘅到古董同傢俬都可以畀人攞嚟收藏。

2015 年有個人展示佢搜集返嚟嘅昆蟲標本，包括咗好幾種嘅蝴蝶同甲蟲。

2009 年有個人收集咗拃公仔合桃鉗，依幅相展示佢啲收藏品。

喺廿一世紀初嘅世界，集郵係一種常見嘅收藏嗜好，顧名思義就係指搜集郵票。

收藏依家嘢都涉及唔少學問：首先，收藏品可以係啲唔多襟擺嘅嘢，例如想像有人收藏昆蟲標本，昆蟲標本原則上係昆蟲嘅屍體，屍體就噉擺喺度會腐爛，所以收藏家有必要同啲標本做啲工夫以便保存；除此之外，某啲形式嘅收藏仲可以升值，因而可以攞嚟做一種投資。

常見搜集品

一個人要玩收藏，首先就要界定佢想收藏啲乜。會畀人攞嚟收藏嘅嘢多數都係啲有欣賞價值嘅嘢，當中話一樣嘢有「欣賞價值」可能係因為呢樣嘢畀人覺得好睇，又或者係一樣嘢有某啲特殊嘅文化價值。最基本上，收藏品可以分做兩大類：

• 自然物品
  • 生物標本
    • 昆蟲，尤其係蝴蝶同甲蟲等色水鮮艷形態多變嘅昆蟲（昆蟲搜集）；
  • 岩石同礦物，呢啲嘢喺化學成份同外形上又係可以好多變；睇埋地質學。
  • 葉，唔同植物物種嘅葉形狀可以好唔同，廿一世紀初有方法保存植物嘅葉，防止佢哋腐爛；
  • 貝殼，又係喺外形上可以多變得好交關；
• 人造物品
  • 好似係畫、雕塑或者花樽等嘅視覺藝術作品；
  • 古董；
  • 銀仔；
  • 好似係公仔同陀螺等嘅玩具；
  • 樂器；
  • 音樂盒；
  • 郵票（集郵）；
  • 黑膠碟；
  • 集換式咭；
  • 懷舊嘅電子遊戲；
  • 隨住廿一世紀初互聯網相關科技普及化，唔少人開始收藏虛擬物品，例如係網上遊戲裏面啲武器呀噉；睇埋虛擬經濟嘅概念。

... 呀噉。

收藏家可以响好多方面有個體差異：有啲收藏家係所謂嘅完成主義者（completist / completionists），堅持一定要將佢哋啲目標物品冚唪唥儲齊嗮，仲會肯畀高價買自己想收藏嘅嘢，但又有好多收藏家淨係「收藏到咁上下數量」就已經心滿意足嗰隻；除此之外，收藏家又可以喺「有幾擏geng6惜啲收藏品」依點上有差異－有啲收藏家會好小心翼翼噉保養住自己啲收藏品，會（例如）將啲收藏品收埋喺玻璃造嘅箱入面，想確保啲收藏品唔會整污糟，同時又有啲收藏家會攞自己啲收藏品去用，例如係收藏公仔合桃鉗嘅人攞住自己啲收藏品去開合桃。

依幅圖入面有 Gotta Catch 'Em All 依句嘢（要捉嗮佢哋噉解）－句嘢係《寵物小精靈》嘅 slogan，叫玩家盡力捉精靈，以求將所有物種嘅精靈全部捉到嗮。

行為理論

有唔少學術領域嘅研究者都有興趣剖析「點解人會有興趣收藏嘢」依條問題－動物行為學同心理學响定義上就係鑽研行為嘅，而且事實表明，收藏會影響物品嘅市場價值，令到冇乜實用價值嘅物品都可以以高價賣出，所以經濟學同市場學等領域嘅工作者都有興趣想理解收藏依種行為。

人類以外嘅動物物種都有類似收藏噉嘅行為。對動物行為做嘅研究表明，有多種嘅雀鳥同哺乳類都會將搵到嘅嘢食儲喺同類搵唔到嘅地方（藏食行為），仲有足夠嘅認知能力，記得自己收埋咗嘅嘢食收埋咗喺邊，有需要嗰時會搵返啲嘢食出嚟。依點仲同動物嘅智能息息相關－隻動物要能夠搵返儲起咗嘅嘢食，表示佢實要有返咁上下嘅記憶能力，而且仲有證據指，動物要有能力想像未來，能夠（例如）預估啲未熟嘅果實要過幾耐時間先熟，做到「喺收埋咗嗰粒果實啱啱熟嗰陣掘返佢出嚟」，所以藏食行為被指可能係間接促進咗智能嘅進化。

2009 年有隻鴉科雀鳥喺度囤積嘢食。  依隻松鼠喺度儲起啲嘢食，準備過冬。  唔同甲蟲物種喺形狀同色水上可以爭好遠。

對於人類嘅收藏行為，有經濟學家提出可以由新穎度（novelty）嘅角度思考。佢哋指出，會有人想攞嚟收藏嘅嘢，實係有返上下內部差異嘅－例如甲蟲噉，甲蟲嘅標本吸引到好多愛好昆蟲嘅人收藏，而事實係甲蟲同時亦出晒名係最多樣化嘅目之一，淨係一個目已經有成超過 400,000 種物種（相比之下，人類所屬嘅靈長目物種數量得嗰幾百種），唔同甲蟲物種喺顏色同形狀上可以好唔同。噉想像以下嘅過程：

1. 一個人喺度收藏緊 X 依類物品；
2. 有日，佢見到一件物品 A，A 屬於 X；
3. A 同嗰位收藏家打前見過嘅 X 相當唔同，設新穎度 $n$ 做「A 同收藏家打前見過嘅 X 之間嘅差異」；
4. 如果 $n$ 嘅數值有咁上下大（$n$ 太細嘅話收藏家會覺得悶）但又唔係大得滯，位收藏家攞到 A 就會好過癮；
5. 上述過程一路重複，收藏家手上擁有嘅 X 越嚟越多；

－而提出依套諗法嘅經濟學家指出，推出可收藏商品嘅企業應該要好好噉控制產品嘅新穎度嘅「劑量」，以求達致「夠新穎，但又唔會新穎得滯」嘅理想狀態（睇埋最佳差異嘅概念）。

亦可以睇吓收藏嘅心理學。

睇埋

• 經濟學上講嘅囤積：一種喺通脹等嘅情況下零舍常見嘅行為，都係涉及有人係噉儲起某啲物品。
• 投資：收藏藝術品等嘅嘢可以用嚟保值，作為投資嘅一種。
• 集換式咭遊戲
• Collect-athon
• 博物館、古蹟保留同文獻保養

一個人喺度收藏《魔法風雲會》嘅咭，而且仲用膠套好好噉保養住啲咭。佢第時有可能可以用高價賣出佢啲收藏品。

文獻

• Andersson, M., & Krebs, J. (1978). On the evolution of hoarding behaviour. Animal Behaviour, 26, 707-711.
• Carey, C. (2008). Modeling collecting behavior: The role of set completion. Journal of Economic Psychology, 29(3), 336-347.
• Ijams Spaid, B. (2018). Exploring consumer collecting behavior: a conceptual model and research agenda. Journal of Consumer Marketing, 35(6), 653-662.

拎

• Our Brains are Wired to Collect Things | Daniel Krawczyk. TEDxSMU.
• Fine Art Can Be a Fine Investment. Investopedia，依篇文講收藏藝術品嚟做投資。
• 10 Reasons to Invest in Rare Pokémon Cards. Entrepreneur，依篇文講收藏寵物小精靈咭做一種投資。