Wikipedia:是日正文/2020年9月
太空，又有叫做外太空、宇宙空間、或者外層空間，指嘅係天體（包埋地球）之間嗰個好大好大嘅空間。太陽、月球、同埋八大行星冚唪唥都係喺太空入面飄嚟飄去嘅。太空好接近真空：宇宙大部份嘅空間都係空寥寥嘅星際空間，就連星系當中嘅空間都係以乜都冇嘅空間佔咗大半橛。佢當中啲嘢密度都好低：佢裏面有啲氣體，以等離子態嘅氫為主，呢啲氣體稀薄得好緊要，冇可能令人唞到氣；太空嗰度又有啲背景輻射（指太空度一啲來源不明嘅電磁輻射），佢哋估計係由大爆炸嗰度留落嚟嘅，令到太空叫做有些少能量喺度，但係太空嘅溫度平均仲係喺攝氏零下 268 度左右，凍到乜噉，差唔多去到絕對零度。除咗噉，太空嗰度仲有啲流星、宇宙射線、同眼睇唔到嘅重力場等嘅嘢。
地球同太空之間冇乜嘢好清楚嘅分界線，由地表嗰度計起，大氣層愈高就愈稀薄，冇話會喺某個高度啲空氣會突然之間唔見嗮。為咗方便起見，喺高空 100 公里嘅卡門線一般都喺航天等嘅領域嗰度俾人習慣性噉當做地球同外太空之間嘅分界線，而用卡門線做地球同太空分界呢個慣例喺國際法等嘅地方都會用到，包括咗好出名嘅喺 1967 年制定嘅《外太空條約》－呢條條約講明太空冇任何一個主權國家可以霸嗮，所有國家都有權自由噉探索佢，而佢對「太空」呢個詞嘅定義就係用咗「卡門線以外嘅空間」。(成篇文章……)