Wikipedia:是日正文/2022年9月
.jpg)
學習喺心理學同神經科學等嘅領域上係指一個個體吸收知識、技能、同埋行為嘅過程。學習包括獲取新知識、新技能、或者新行為，又可以係改變舊有嘅知識、技能、同行為。學習唔淨衹係人識得做，動物以及某啲品種嘅植物、甚至乎係專門機械都曉學習－動物絕大多數都曉學一啲簡單嘅「避開痛楚」動作，例如係一個人俾個煮食爐辣親一次之後，下次會識唔好搵手掂個爐。一啲智能高啲嘅動物，包括人，同某啲人工智能，仲有能力學做一啲複雜嘅行為或者理解啲複雜嘅概念，例如足球同芭蕾舞等嘅運動當中有極之高深嘅技法，而學深奧嘅科學知識要求高度嘅理解能力。
學習嘅現象無所不在：人喺未出世之前，神經系統經已發育得相當完善，會喺度同環境互動而學習，呢個過程仲會一路維持到死亡為止，例如臊孲子會學識認照顧者把聲同樣，等到再大少少會學行路同講嘢，細路仔係噉由佢周圍同身邊嘅大人嗰度學習，而大人都識得學嘢；就算係啲好簡單嘅動物都做到單純行為式學習，而喺好似人等智能高嘅動物當中仲可以睇到以玩呢啲複雜行為進行嘅學習；學習可以有意識做，又可以冇意識做，後者嘅例子可以舉返頭先俾個煮食爐辣親一次，下次識唔好掂個爐－呢種學習個人唔使特登去諗「點解隻手掂到個爐會痛」都會學得到。各式各樣嘅學習功能對動物適應環境來講好重要，之不過學習嘅機制喺某啲情況之下亦都可以造成一啲唔好嘅效果，例如係習得性失助噉，就涉及一隻動物反覆經歷過避無可避嘅痛苦之後學識「反抗冇用」而變到冇心機做嘢－所以對學習嘅研究仲要諗點樣確保學習嘅機制唔會出現反效果。
學習過程喺認知科學同教育學等領域上都重要嘅研究課題，而佢哋嘅研究對社會來講好有應用價值。 (成篇文章……)