中央 C

中央 C（英文：middle C），又叫中間 C、C₄（或者寫 C4），粵曲工尺譜叫上，係喺鋼琴中間位置嘅 C 音，MIDI 編號 60，頻率大約喺 262 赫左右 。

同一個中央 C 喺高音譜號、兩種中音譜號（alto clef 同 tenor clef）同低音譜號嘅五線譜嘅位置

喺五線譜，中央 C 記喺邊條線或者邊一隔，會視乎用嘅譜號，例如，如果用高音譜號，會記喺下加一線，即係第一條下加線，但係用低音譜號嘅話，就會記喺第一條上加線。

叫中央 C 做 C₄ 係電子音樂常見嘅叫法；呢個 ｢4｣ 係指由底數起鋼琴嘅第4個 C 音。不過，點數其實並冇一個統一嘅數法，另一個常見嘅山葉式數法叫佢做 ｢C3｣，甚至有少數軟件會叫佢 ｢C5｣。

實際頻率

中央 C 呢個音高，實際頻率其實係視乎調律同音準而會有唔同嘅數值。如果用現時通常用嘅十二平均律同 A440 做標準，中央 C 嘅實際頻率會係 A440 降八度再升返三個半音，亦即係

${440 \over 2}\times 2^{(3/12)}\approxeq 261.626\qquad {\text{(Hz)}}$

不過咁計其實好理想化；ISO 16 其實容許 A440 有 0.5 赫嘅誤差，即係 A₄ 嘅實際頻率可以係 439.5 赫至 440.5 赫之間嘅任何一個數值；代返入條式，中央 C 嘅實際頻率會係 261.328 赫至261.923 赫之間。當然，校出嚟嘅中央 C，頻率上亦可能會有佢自己嘅誤差。

如果用純律，A 音嘅頻率就會係 C 音嘅 5/3 倍，假如同樣係用 A440（而又假設冇誤差），中央 C 嘅實際頻率就會係

$440\div {5 \over 3}=264\qquad {\text{(Hz)}}$

假設用返十二平均律，但係標準 A 音轉咗做 A442（例如紐約愛樂樂團就係咁），中央 C 嘅實際頻率（假設冇誤差）就會變成

${442 \over 2}\times 2^{(3/12)}\approxeq 262.815\qquad {\text{(Hz)}}$

喺未有 A440 嘅標準之前，呢個 A 音其實會喺 400 至 480 赫之間浮動，亦即係，如果用十二平均律，中央 C 會根據 A 音，喺 237.841 至 285.410 赫之間。

喺19世紀，威爾第曾經主張將中央 C 定喺 256 赫，即係喺二進制會係齊頭數。

中樂

另外，唱西樂嘅人有 ｢唱過粵曲就唱唔返西樂｣ 嘅講法。中樂傳統上用嘅係七音，假設即係七平均律，如果仍然係用 A440，用標準調音、標準定弦嘅話，工尺譜標 ｢上｣ 嘅中央 C 嘅頻率會係

${440 \over 2}\times 2^{(2/7)}\approxeq 268.183\qquad {\text{(Hz)}}$

不過呢個並唔係定理，原因係喺中樂，實際頻率會因應唔同 ｢線｣（調音同定弦）而會有唔同。

喺唔同音域嘅位置

假設我哋用 C₄ 表示中央 C，咁女高音嘅音域就會係大概喺 C₄ 至 G₅，中央 C 係唱得出最低嘅音，而男低音就啱啱相反，音域由 F₂ 到 C₄，中央 C 係唱得出最高嘅音。

相反，女低音嘅音域大概係 G₃ 至 C₅，而男高音嘅音域大概係 C3 至 G4，中央 C 都喺比較中間嘅位置。

參考書目

• Hui, Bernard (2022年1月21號)。《【5分鐘】明白音名和譜號 Clef（廣東話）》。喺2024年8月21號搵到。