中環街市
想搵中環嘅露天街市嘅話，請睇嘉咸街。中環街市，香港古蹟之一，喺中環，屋宇樓高三層，分地下、一樓同二樓，原本做開街市，後尾地下同一樓廢置多年，如今化身商場，食肆為主。古物古蹟辦事處評為三級歷史建築，香港現存唯一全座完整包浩斯建築風格。英文名Central Market。香港日治時期，曾改名中央街市，此後有時用依個名。
成棟依山而起，南高北低，故此南面少一層。四面都係街。南為皇后大道中93號，北為德輔道中80號，東為域多利皇后街，西為租庇利街。街市喺皇后大道嗰邊，有個公廁，喺香港都算歷史悠久。
中環今日商業佔大部份，然而舊時大街小巷，都有好多居民住喺度，故此設立街市。未有依棟街市之前，中環已經有街市。一九三九年落成開張，原為市政局經營，市政局廢局後，街市二〇〇三年廢置，打算拆咗佢。後尾古蹟考慮後，並無結論，二樓仍有舖頭營業。二〇一七年翻新改裝，二〇二一年八月廿三號經華懋重新以商場營運。
舊底德輔道中嗰邊，佢對面為中環消防總局，局拆咗之後，變成恒生銀行總行大廈，於是有行人天橋，南駁中區行人天橋走廊，北駁街市上層。而街市另一邊，又駁去中環至半山自動扶手電梯。故此中環街市身兼走廊一部份。