五一黃金週 (香港)

  提示：呢篇文講嘅唔係五一黃金週 (中國)。

香港嘅五一黃金週，係香港反修例運動嘅一項活動，2020年頭一次搞，趁住5月1號勞動節前後嘅假期，呼籲支持者一齊幫襯黃色經濟圈嘅店舖。2020年成個活動有超過1,700個商戶參加。

「五一黃金週」嘅「五一」，呼應返反修例運動入面嘅口號「五大訴求，缺一不可」。

天馬行動

2020年嘅「五一黃金週」之前，網上有人發起「天馬行動」，號召大眾喺5月1號晏晝喺銅鑼灣、西營盤、大埔、旺角同觀塘搞「快閃」行動。有唔少親建制媒體認定個活動係搞破壞，認為會重演「用雜物堵路」、「破壞交通燈」、「縱火」等等，警方亦高度戒備，派出超過5,000警員喺各區巡查。結果活動主辦群組喺晏晝公佈「天馬行動」嘅活動詳情，就係幫襯「黃店」，亦即係參與「五一黃金週」活動。