五大訴求，缺一不可

「五大訴求，缺一不可」（粵拼：ng5 daai6 sou3 kau4 kyut3 yat1 bat1 ho2，英文：Five demands, not one less.），係2019年香港反修例運動入面其中一句常用抗議口號，講出咗呢場抗爭運動嘅主要目標，就係要求香港政府妥善回應「五大訴求」。

2019年10月20號廢除惡法獨立調查重組警隊大遊行嗰陣嘅「五大訴求，缺一不可」標語。

沿革

睇埋：反逃犯條例修訂運動 § 五大訴求

呢句口號首先喺2019年6月16號譴責鎮壓撤回惡法大遊行入面由主辦單位民間人權陣線（民陣）提出，初頭嘅「五大訴求」係：

1. 完全撤回逃犯修例
2. 追究警方開槍責任
3. 唔檢控同釋放示威者
4. 撤銷定性6月12號集會做「暴動」
5. 行政長官林鄭月娥問責落台

嗰陣「林鄭月娥落台」嘅訴求未獲示威者廣泛認同，大專學界就曾經要求政府回應「四大訴求」，同民陣嘅「五大訴求」差唔多，就係少咗「林鄭月娥落台」嗰項，要求政府6月20號下晝5點前答覆，但政府最後都無任何答覆，大專學界將抗爭行動升級，即係6月21號嘅大專學界反送中升級行動。

7月1號佔領立法會嗰陣，示威者喺立法會會議廳宣讀《香港人抗爭宣言》提到「五大訴求」，主要改動係將民陣嘅「追究警方開槍責任」擴展做「徹底追究警隊濫權情況」，同埋將「行政長官林鄭月娥問責落台」改成「以行政命令解散立法會，立即實行雙真普選」。獲示威者廣泛認同嘅「五大訴求」版本逐漸成形。

7月21號發生元朗襲擊，示威者將矛頭直指警方失職。7月23號，俞宗怡、苗學禮、王永平等34位前高官同公職人員聯署聲明，要求政府立即撤回《逃犯條例》修訂，同埋引用香港法例第86章《調查委員會條例》，成立「獨立調查委員會」，調查範圍建議包括政府「暫緩」但唔「撤回」修例嘅手法恰唔恰當、警方同示威者有無用過份嘅武力等等，同埋就調查結果提出建議。自此，「追究警隊濫權」嘅訴求亦加入埋「成立獨立調查委員會」嘅元素。

經過上面嘅演變之後，得出下面嘅版本，由2019年7月一路用到依家：

1. 完全撤回逃犯修例
2. 撤銷定性6月12號集會同之後嘅抗爭活動做「暴動」
3. 撤銷所有抗爭者嘅控罪
4. 成立「獨立調查委員會」，追究警隊濫權
5. 全面落實雙「真普選」

代表手勢

喺示威活動入面，示威者除咗嗌「五大訴求，缺一不可」口號，亦可以做出代表手勢：舉高雙手，右手攤大手板，代表「五大訴求」嘅「五」；左手舉起食指，代表「缺一不可」嘅「一」。

小米抽水事件

2019年8月27號，中國大陸嘅小米科技宣傳互聯網電視「紅米電視」嗰陣，為咗標榜有奇異果TV、極光TV、酷喵影視、芒果TV同聚體育五個影視平台嘅內容，喺官方微博嘅宣傳圖上面寫上「五大平台，缺一不可」嘅標語，明顯仿照「五大訴求，缺一不可」嘅示威口號，結果畀大陸網民批評係呼應香港示威活動，官方媒體環球網更批評小米「缺腦如此，無藥可救」，之後小米即刻撤回標語，改用「海量內容」四字，獲環球網回應「知錯能改，加強學習」。

睇埋

• 反修例運動常用抗議口號
• 五大訴求缺一不可示威：2019年9月15號用呢句口號做主題嘅示威
• 五一黃金週 (香港)