黃色經濟圈

反共經濟圈

黃色經濟圈粵拼wong4 sik1 ging1 jai3 hyun1英文Yellow economic circle),又叫黃金經濟圈[註 1],係香港修例風波入面提倡建立嘅「經濟圈」,鼓勵運動支持者幫襯返支持運動嘅商舖,加強支持運動嘅經濟勢力。

一間典型嘅「黃店」,舖面有「連儂牆」

黃色經濟圈嘅概念蛻變自2019年10月由LIHKG討論區(連登)網民發起嘅「黑裝修,紅裝飾,藍罷買,黃幫襯」行動,皆因頭兩者有機會涉及到犯法行為,所以為咗將行動普及化,後期嘅宣傳重點就去咗「藍罷買,黃幫襯」度。目的係為咗希望達致民間互助效果[1],藉此攞到資金支持運動,為因反送中運動被捕嘅手足創造職位[2],同時希望畀多啲舖頭選擇市民,打破親中共財團壟斷,減低親中共財團嘅收入。

根據《明報》喺2020年元旦大遊行入面做嘅調查,有93.6%受訪者話會參加黃色經濟圈,包括幫襯「黃店」或者杯葛「藍店」。而根據《彭博商業週刊》引述沈旭暉嘅估計,黃色經濟圈嘅市值可能高達1000億港紙。

畀執法部門雙重標準打壓同留難

有多間「黃店」話曾經畀政府唔同部門針對,例如多次畀香港警察食環署巡查,其中光榮冰室荃灣店半個鐘兩度被查[3]。另外,喺太子嘅「黃店」青花亭亦表示每日收到好多電話騷擾同訂座甩底等滋擾行為[4],《飲食男女》亦喺現場實測後指出執法部門對「黃店」同「藍店」待遇有唔同[5],例如警員喺量度與枱距離時對「黃店」同「藍店」會採用唔同標準,令到黃絲帶陣營覺得「藍店更危險,黃店更安全」咁話[6],而民建聯前北區區議員鄧根年涉嫌違反限聚令大宴親朋等就無人被檢控[7]。泛民主派立法會議員許智峯覺得警方藉「限聚令」打壓黃店[8][9]。而《香港國安法》生效之後,打壓力度進一步加強。

2021年9月4號,位於佐敦嘅黃店「開餐Dine Inn」喺晚市嗰陣有差佬巡查,發現咗3位堂食客人「填紙仔」唔合格,因而被禁止晚市堂食14日,直到9月18號。[10]

武肺疫情初期嘅表現

香港嘅武肺第一波疫情期間,唔少黃店嘅經營情況都受到影響,不過,有唔少黃店仍然為咗表達對黃絲帶醫護人員嘅支持,紛紛提出咗各式各樣嘅優惠,例如免費餐飲或者折扣[11]

  1. 皆因「黃色」容易令人聯想到解做鹹濕產業,有啲人會用「黃金」取代,但暫時未係主流。

參考

  1. 潘國偉 (2020-05-07).  . 立場新聞. 原著喺2020-05-08歸檔. 喺2020-05-20搵到.(繁體中文 - 香港)
  2. 太囂張!他們想要公帑聘用"被捕手足". 香港中國通訊社. 2019年11月26號. 原著喺2020年8月11號歸檔.
  3. 【武漢肺炎禁聚令】黃店被針對多次巡查 香港仔冰室:行得正企得正唔驚 有黃店拒絕採訪:明顯針對 想低調. 蘋果日報. 2020-04-06. 原著喺2020-08-26歸檔. 喺2020-05-02搵到.(繁體中文 - 香港)
  4. 曾港深 (2020-04-03). 太子黃店青花亭:憂限桌令為廿三條鋪路 日日收騷擾電話 訂座甩底. 眾新聞. 原先內容歸檔喺2020-08-26. 喺2021-03-29搵到.(繁體中文 - 香港)
  5. 【武漢肺炎禁聚令】黃店驗屍咁驗 藍店Hea Check 記者實測藍店唔夠1.5米距離 食環拎神仙尺做10分鐘走人. 飲食男女. 2020-04-04. 原著喺2020-08-26歸檔.(繁體中文 - 香港)
  6. 【黃店更安全】王喜寸爆克警「毅進尺」雙重標準 網民:藍絲攬炒. 蘋果日報. 原著喺2021-06-16歸檔.(繁體中文 - 香港)
  7. 中產平民 (2020-04-13). . 眾新聞. 原著喺2020-08-26歸檔. 喺2020-05-20搵到.(繁體中文 - 香港)
  8. . 香港電台. 2020-04-22. 原著喺2020-08-26歸檔.(繁體中文 - 香港)
  9. 【全城禁聚】黃店屢被針對恐失抗疫資助 政府已發12告票:倘被控或拒批申請. 蘋果日報. 2020-04-12. 原著喺2021-06-06歸檔.(繁體中文 - 香港)
  10. 佐敦食肆開餐食客無填妥紙仔 警罰停晚市堂食14日 負責人嘆無辜. 香港01. 2021年9月5號. 原先內容歸檔喺2021年10月30號. 喺2021年10月11號搵到.(繁體中文 - 香港)
  11. 真正的良心經濟圈 | 中產平民. 眾新聞. 2021年2月10號. 原著喺2021年6月2號歸檔. 喺2021年12月27號搵到.(繁體中文 - 香港)

睇埋