倒裝
倒裝，修辭一種，調動用字次序，改動結構，唔順習慣，以求特出文意，意同而句異。文章字字句句都順口直序，人就好易眼順而忽畧要旨。倒裝寫法，迫人突然停低，諗諗句意。有倒裝，寫文亦唔會咁沉悶。個效果同寫詩拗句用意同出一轍。倒裝有時用於句中對仗，押韻節奏，讀起來更有力。倒裝變化多端，有時用字組合掉轉，如「長短」叫「短長」，都視為倒裝。不過依樣可圈可點，古時用字較自由，現今習慣有偏咁樣。唔同時地習慣，倒裝與否都會有異。
英文而言，倒裝無講用得咁闊。通常只限於主語、補語嘅位置。故此倒裝亦因文話而異。而且有啲倒裝純粹習慣，唔入修辭。
研究文法者來講，倒裝為文法帶來一啲例外，要追加額外嘅文法規則來描述，有啲部份亦未必概括得好，會有例外中嘅例外。文法只屬概括，唔係咁易填埔人所有用法。
日常講嘢都有倒裝。如「食咗飯」化成「飯食咗」，又如「我食咗飯」化成「飯我食咗」甚至「我飯食咗」咁。
古文都成日見，如「有何罪」化成「何罪之有」。
墨子非樂上有句，「啟乃淫溢康樂，野于飲食，將將銘莧磬以力，湛濁于酒，渝食于野，萬舞翼翼，章聞于大，天用弗式。」當中「野于飲食」用咗倒裝，習慣本寫做「飲食于野」。按習慣，文句就平平無奇。只要倒裝一下，「康樂」同「飲食」就成對。「樂」「食」雙隻為入聲字，又夾得埋， 聲韻節奏頓時唔同。
又好似周敦頤愛蓮說咁，「菊之愛、陶後鮮有聞。蓮之愛、同予者何人。牡丹之愛、宜乎眾矣。」菊之愛、蓮之愛、牡丹之愛，按習慣本為愛菊、愛蓮、 愛壯丹，依處就用咗倒裝[1]。