假說

假說（粵拼：gaa2 syut3；英文：hypothesis）喺嚴格嘅科學上係指有人提出咗、對某啲現象嘅可能解釋，但係就未經實證研究驗證嘅，即係想「而家觀察到噉嘅現象，我諗背後嘅可能解釋係噉（假說）但呢個諗法未經證實」。科學上有價值嘅假說，實要係有得客觀驗證嘅。

歐洲古時嘅宇宙想像圖；呢個諗法未搵到證據支撐或者否決之前，就係一個假說。

基礎

睇埋：科學理論同證據

假說係科研不可或缺嘅一部份。

假說嘅例子：

• 物理學：光速不變假說就係一個重要嘅例子。呢個假說話明，無論觀察者點郁，光喺真空中嘅速度永遠都係一樣嘅。呢個假說後來成為咗狹義相對論嘅基本前提之一。
• 生物學：自然選擇假說就解釋咗進化發生嘅原理。呢個假說指出，適應環境嘅生物個體傾向於生存同繁殖，佢哋嘅特徵會傳畀下一代。呢個假說喺《物種起源》入便首次系統噉出現。
• 經濟學：理性選擇假說假設咗人係理性嘅決策者，佢哋會根據可得資訊同個人利益作出對自己最有利嘅選擇。呢個假說喺多個經濟理論中扮演核心角色，例如博弈論呀噉。到咗廿一世紀初，行為經濟學研究已經引致好多經濟學研究者放棄理性選擇假說。

等等。

驗證

驗證假說主要有兩大方法。

實驗

内文：實驗

實驗係指緊一啲用嚟驗證某啲假說、牽涉到操控某啲變數嘅程序；响做實驗嗰陣，研究會操控自變數（IV）－即係用人工嘅方法改變自變數嘅數值，再睇吓噉樣做會點樣影響到應變數（DV）嘅數值。舉個例說明，例如係喺驗證正話提到嘅時間膨脹假說嗰陣，研究者可以噉做實驗－佢哋擺個原子鐘喺架好勁嘅火箭裏面，開大架火箭嘅引擎，令架火箭飛得好快（有返咁上下接近光速），飛完一輪之後研究者再攞架火箭裏面嗰個原子鐘，攞個鐘嚟同一個由始至終都喺地球表面唔郁嘅原子鐘比較吓，睇吓以接近光速飛過嘅原子鐘係咪真係會行得慢咗。喺成個實驗入面，速度就係一個自變數（俾研究者人工噉操控咗嘅變數），而個原子鐘所量度嘅過咗幾耐時間就係一個應變數（研究者淨係量度咗呢個變數，冇直接噉操控佢數值）。實驗室泛指專門攞嚟做實驗用嘅房，一般都會擺嗮啲專係攞嚟做實驗用嘅架生，而且因為用嘅架生個個科學領域都唔同，所以會有分化學實驗室、生物學實驗室或者心理學實驗室呢類再專門啲嘅實驗室。

「條試管入面啲化學物質同溫度等嘅特性經已設定好嗮，我個理論預測會發生嘅嗰場化學反應係咪真係會發生呢？」

觀察

内文：觀察

觀察係指用嚟驗證某啲假說、但唔牽涉到操控任何變數嘅程序；响做觀察嗰陣，研究者會搵方法量度啲變數嘅數值，再睇吓啲變數之間嘅關係係咪同假說所講嘅一致，不過佢哋唔會特登去郁手改變任何一個變數嘅數值；例如係經濟學家驗證一啲描述「貨品嘅價錢受乜嘢因素影響」嘅假說嗰陣，佢哋好難話直接控制（例如）市場上嗰啲商品嘅價錢，但佢哋可以隨機（randomly）噉抽幾樣商品出嚟睇，計吓統計分析睇吓價錢係咪真係同（佢哋心目中會影響價錢嘅）嗰啲因素有明顯嘅相關，係嘅話就可以話啲數據撐咗佢哋心目中嘅假說，而喺成個過程入面，啲經濟學家冇操控任何變數，只係量度咗啲變數嘅數值，所以佢哋做緊嘅係個觀察，唔係實驗。順帶一提，同自然科學比起上嚟，社會科學零舍常會用觀察。

睇埋

• 科學方法
• 可否證度
• 假說檢定