董建華

董建華
出生日	1937年7月7號（87歲）
出生地	Shang-hai
國籍	中華人民共和國
母校	利物浦大學、中華中學
職業	政治人、船東
配偶	董趙洪娉
仔女	董立新
阿爸	董浩雲
阿媽	顧麗真
兄弟姊妹	董建成、金董建平
	[改維基數據]
	睇; 傾; 改;

董建華，GBM（粵拼：dung2 gin3 waa4，1937年 7月7號—）係前中國人民政治協商會議第十屆全國委員會副主席，亦係第一、二任（第二屆剩下任期未完就請辭）香港特別行政區行政長官，亦即係香港主權移交畀中華人民共和國之後嘅第一位行政首長。

生平

董建華喺1937年7月7號（同日發生蘆溝橋事變）喺上海出世，鄉下喺浙江省寧波市；1947年成家人搬咗去香港落腳。1960年嗰陣佢喺英國利物浦大學攞到海事工程理學士學位，之後接手家族生意「東方海外（國際）有限公司」（港交所：00316），到做咗特首之後先退出業務。

涉足政界

1990年代初，董建華開始涉足政界事務。佢得當時香港總督彭定康請入香港行政局。喺得到江澤民嘅支持之後，四百人推選委員會選咗佢做特區嘅首任特首。但係响佢第一屆特首嘅五年任期（1997年至2002年）內，香港出現經濟（例如1997年亞洲金融風暴、2000年科網股泡沫爆破）、公共衛生（禽流感）同政治危機，搞到民怨沸騰。而佢更被人話用人唯親（好似任用路祥安，搞出香港大學民調風波），亂出政策（好似八萬五房屋政策）。但係，就算係咁，响佢第一屆特首任期就嚟完嗰時，進行第二屆特首嘅選舉嗰陣，因為冇第二啲候選人攞到足夠選舉委員嘅提名，董建華結果喺呢次選舉入便，可以自動連任。

之後，聽講^{[未記出處或冇根據]}董建華順從北京中央政府意思，想夾硬通過香港基本法第23條嘅立法草案。嗰條草案將好多香港同其他世界先進地區一路都有嘅自由同埋人權，睇做叛國、分裂國家、顛覆等嘅重罪。再加上佢個政府喺處理非典型肺炎（沙士，SARS）嗰陣聽信廣東省方面提供嘅假疫情，冇睇到問題嘅嚴重性，搞到有299人死咗，包括唔少醫護人員。香港人忍無可忍，終於響2003年 7月1號發動咗1989年之後香港最大型嘅街頭遊行七一大遊行，有大約50萬嘅香港人着黑衫，要求董建華落台，同響2007年、2008年進行雙普選（行政長官、香港立法會）。

呢次遊行影響深遠。香港行政會議成員、自由黨嘅田北俊因遊行而轉軚反對立法，終於令23條草案過唔到。而負責23條立法嘅官員保安局局長葉劉淑儀，由民望第一跌到落包尾，受盡千夫所指，最後黯然落台。而董建華亦响第二屆任期未結束嘅情況下，喺2005年3月因以健康為理由請辭（腳痛落台），由當時嘅政務司司長曾蔭權接任剩下兩年任期，亦宣佈因為家庭原因同家庭成員嘅意見，放棄爭取連任，唔再參選第三屆香港行政長官選舉，行政長官任期到2007年6月30號完結，佢成為香港主權移交之後就第一位唔尋求連任嘅特首。

喺全國政協十屆三次會議閉幕會上便，董建華畀人增選咗做政協第十屆全國委員會副主席。

2019年（中華人民共和國成立70周年），董建華獲中國大陸政府頒授「一國兩制傑出貢獻者」嘅榮譽稱號。

個人榮譽

勳銜

大紫荊勳章（2006年）^[1]

榮譽博士

利物浦大學法學榮譽博士（1997年）
香港科技大學社會科學榮譽博士（2006年）^[2]
香港中文大學榮譽法學博士（2007年）^[3]

屋企人

董建華嘅老豆係叱吒一時嘅船王董浩雲，細佬叫董建成，夫人係董趙洪娉，最好嘅朋友係霍英東。

攷

↑ 〈二〇〇六年授勳名單〉 (新聞稿) (繁體中文)。香港政府新聞公報。2006年7月1號。
↑ 〈科大頒授榮譽博士予三位卓越領袖〉 (PDF) (新聞稿) (繁體中文)。香港科技大學。2006年10月18號。
↑ 第64屆大會 (2007) | 頒授學位典禮 | 香港中文大學

出面網頁

[1] 〈二〇〇六年授勳名單〉 (新聞稿) (繁體中文)。香港政府新聞公報。2006年7月1號。

[2] 〈科大頒授榮譽博士予三位卓越領袖〉 (PDF) (新聞稿) (繁體中文)。香港科技大學。2006年10月18號。

[3] 第64屆大會 (2007) | 頒授學位典禮 | 香港中文大學

[1]

[2]

[3]