座標: 35°38′46.7″N 116°40′37.6″E / 35.646306°N 116.677111°E / 35.646306; 116.677111


新驛粵拼san1 jik6)係中國山東濟寧兗州西北部嘅鎮,離兗州市區20公里,鎮政府駐新驛一村[5]。面積66.6平方公里[1],人口5.3萬人(2019年)[3]。交通上呢度有兗梁公路(兗州~梁山)同埋寧濟公路(寧陽~濟寧)穿過[5]

新驛鎮
統計資料
普通話拼音 Xinyi
所屬省級政區 山東
所屬地級政區 濟寧
所屬縣級政區 兗州
政區類別
面積 66.6[1] km²
行政村數目 57[2]
人口(2019) 5.3萬人[3]
人口密度 795.8人/km²
郵政編碼 272100[4]
政區代碼 370882102[4]
網站: 新驛鎮政府網站

地理

新驛喺兗州西北部,東面係大安,北面係小孟,西面有汶上,南面係顏店。東西最闊12.7公里,南北最長11.9公里,轄區嘅形狀唔規則,總面積66.6 km²,合99900畝[1]。新驛處於黃河沖積平原,海拔30米,屬温帶季風性氣候。當地經濟比較發達,佢又係週邊地方嘅交通要道,無論人口定面積都係個大鎮。當地出產小麥、粟米、蠶蟲、大蔥[4],有7.1萬畝田地,喺本地譽爲「兗州西部糧倉」[3]。資源上有豐富嘅黃沙、地下水[4]

中國地名變遷
建置 1958年
現名 新驛鎮
中華人民共和國共産主義公社(1958年~1962年)
新驛公社(1962年~1966年)
新驛區(1966年~1968年)
新驛公社(1968年~1984年)
新驛區(1984年~1986年)
新驛鎮(1986年後)

新驛,係簡稱自新嘉驛san1 gaa1 jik6),「新」係話佢新設,「嘉」意思「吉祥嘉言」[6]。新嘉驛係明代時(洪武二十九年,1396年)設嘅驛站,係聊城、汶上、兗州、濟南之間嘅交通要衝[7][8]。舊時新嘉驛係個好大嘅驛站,車馬行人來來往往,所以商業繁榮,設施高檔[9],居民越來越多,最後變成兗州西北部最大嘅村鎮[8]。作爲緊要嘅驛站,新嘉驛幾出名,一啲人喺度留低啲詩,其中最出名係明末清初時,有一個會稽(而家浙江紹興)女子,嫁咗畀個北方武夫做妾仔,萬曆四十七年(1619年)同佢丈夫經過新嘉驛,因爲大婆糟騭佢,佢喺自殺之前喺牆壁度題詩三首,因爲佢嘅詩同遭遇打動咗文人,個個都來和應佢嘅詩,成爲當時幾有名嘅文學事件[8]。又比如《儒林外史》亦提過呢度[10]。而設新嘉驛前,當地地名叫賓陽ban1 joeng4[9]

作爲附近最大嘅鎮,新驛一直係區、鄉嘅政府駐地。1949年時係滋陽縣第五區,下設聯防。1950年聯防改爲9個鄉,1956年撤銷第五區,分成新驛、型堂、蔡莊、郗村四個大鄉。1958年成立共産主義人民公社,範圍包括而家嘅小孟、顏店嘅郗村。當年滋陽同曲阜合併,直到1962年曲阜同兗州分開,先改叫新驛人民公社。1966年5月改叫新驛區,下設9個公社仔;1968年恢復爲公社,下面啲公社仔改爲管區;1982年頭,將西部嘅郭村、蔡莊、店子街三個管區分出,做店子街人民公社。1984年5月,店子街公社北部三條村畀過小孟,其餘重新併入新驛,因爲改革,新驛又恢復爲縣轄區。1986年12月,改成新驛鎮[1]

文化

新驛一帶好耐歷史,除咗驛站帶來嘅繁榮,喺之前,高吳橋呢條大村就係古戰場,可以追溯到周代咁古老。當地又有唐宋金元四代嘅金石碑刻,明代時嘅郡王朱壽鉅亦葬喺呢度[8]。新驛有一處省級文物,兩處市級文物,三處縣級文物,其中省級文物東頓村遺址,係戰國、漢代時頓丘古城嘅遺蹟[1]

政區

新驛轄4個管區,再分成57條村[2][1]

  • 村:新驛一村、新驛二村、新驛三村、新驛四村、新驛五西村、新驛五東村、秦村、魏樓、駱村、胡營、高吳橋一村、高吳橋二村、高吳橋三村、高吳橋四村、毛辛莊、王樓、皇林、前閆樓、高村、朱張、後閆樓、大莊、何村、東一村、東二村、東三村、西東村、西西村、堰頭、河灣、楊營、徐村、型堂、後寺、文興坡、高莊、郭村、劉村、袁村、馬樓、姜村、蔡莊、葛樓、孫村、李村、官路、肖村、苗堂、王府莊、范窯、張窯、王堂、韓馬、店子、趙呂、董樓、義和莊

  1. 1.0 1.1 1.2 1.3 1.4 1.5 "新驛鎮基本情況簡介". 新驛鎮政府. 喺2015年10月14號搵到.
  2. 2.0 2.1 "2013年統計用區劃代碼和城鄉劃分代碼". 中華人民共和國國家統計局. 喺2015年10月14號搵到.
  3. 3.0 3.1 3.2 "新驛鎮". 兗州區政府. 2019年10月8號. 喺2020年3月31號搵到.
  4. 4.0 4.1 4.2 4.3 "山東濟寧兗州區新驛鎮". 博雅地名網. 喺2015年10月14號搵到.
  5. 5.0 5.1 "新驛鎮". 行政區劃網. 2014年1月27號. 喺2015年10月14號搵到.
  6. "兗州市". 文化濟寧. 喺2015年10月15號搵到.
  7. "驛傳志". 兗州府志. 由昌平驛西北四十五里爲嵫陽縣新嘉驛。洪武二十九年添設。有城垣、聚落,驛亭整潔,可以宿止。濟寧、汶上由寧陽入會城,亦由此而東,一橫衝也,過客易馬具食而行。
  8. 8.0 8.1 8.2 8.3 "歷史文化". 新驛鎮政府. 喺2015年10月14號搵到.
  9. 9.0 9.1 滋陽縣志. 新嘉驛,舊名賓陽城。高臺、鼓樓、大門、二門、東西角門,大廳五間,東西廂房各三間。後鑿小池,架橋構亭,花竹蔚然,行館最爲華整。
  10. 吳敬梓. "第三十四回". 儒林外史. 莊紹光從水路過了黃河,雇了一輛車,曉行夜宿,一路來到山東地方。過兗州府四十里,地名叫辛家驛,住了車子吃茶。註:「辛家驛」即係「新嘉驛」。