維基百科

新站鎮 (蛟河)

蛟河嘅鎮
(由新驛社區跳轉過嚟)

43°52′29.8″N 127°20′3.2″E / 43.874944°N 127.334222°E / 43.874944; 127.334222

  「小姑家」跳轉到呢度。想搵同名火車站，請睇「小姑家站」。
新站鎮

新站村景
統計資料
普通話拼音 Xinzhan
所屬省級政區 吉林
所屬地級政區 吉林
所屬縣級政區 蛟河
政區類別 鎮
首長 黃春龍[1]
面積 601[2] km²
社區數目 1[3]
行政村數目 31[3]
人口(2012) 44569人[2]
人口密度 74人/km²
郵政編碼 132000[4]
政區代碼 220281100[5]
網站： 蛟河市新站鎮


新站（粵拼：san1 zaam6）係位於中國吉林省吉林市蛟河市嘅鎮，喺離蛟河市區以北17公里處[2]，西距吉林市110公里、長春200公里[6]，北離哈爾濱310公里[4]。東面、北面係舒蘭、前進鄉，南面接住拉法，西面靠住天崗[2]。轄區面積601 km²[2]，下轄一個社區、31條行政村，再向下分爲10個居委會、122個自然屯[2]。鎮府駐喺新站鎮墟[7]，鎮墟面積3.7 km²[4]。

史

編輯

新站嘅名源自拉法驛站。喺清中葉時拉法驛站搬來呢度，稱爲拉法新站，於是當地地名嗌做新站[7]。

1933年設新站保，1938年設新站街。1954年10月，新站村昇爲新站鎮[8]。後來1958、1959年間公社化運動，新站由鎮變爲公社，直到1979年3月從公社度析置返新站鎮。1983年7月啲公社恢復爲鄉，呢時新站鎮同新站鄉並存[8]。1985年3月，新站鄉併入新站鎮[註 1]。

1997年時，新站鎮面積364 km²，人口3.6萬，轄22條村、10個居委會[7]：

  • 居委會：躍進、新濱、民主、新酒、民勝、天德、友誼、蓬萊、鐵西、新醫
  • 村：新站、新鮮、文化、河南、仁和、近河、保安、東靠山、珍珠、五家子、吉祥、六家子、朝陽溝、北安、老爺嶺、東溝、養魚、復興、平原、大利、小姑家、民主

2001年，龍鳳鄉併入新站鎮[7]。

2018年，新站將轄下嘅兩個社區合併，即新驛同新躍合成咗新毓[9]。

呢度打過場拉新戰役，即係拉法新站戰役，因爲主場喺拉法，可以乾脆嗌做拉法戰役。呢場仗係國共內戰時，國共兩軍爲咗爭奪長圖鐵路而打，打喺1946年6月7號夜晚到6月10號上晝，其中喺拉法打嘅時間係七號晚黑到八號朝早，國民政府軍輸咗，敗退新站，之後輪到新站打，到10號朝早，守喺新站嘅國民政府軍覆沒。呢場仗成爲中共嘅東北民主聯軍喺撤退時贏嘅第一場仗[10]。

地理

編輯

新站地處東經127°09′—127°32′，北緯43°51′—44°07′之間，地形上位於新站盆地，東面係大荒頂子山，西北部係老爺嶺，南部係拉法山，轄區最高峰係西土山，海拔1189.3米[2]。呢個鎮木材資源豐富，有平川、龍鳳、老爺嶺三個大林場[6]，泥炭資源亦豐富，儲量達1.3億km³以上[4]。呢帶多山，係長白山嘅餘脈[4]。

東面有龍鳳河，西部有老爺嶺河，北部有民主河，喺新站嘅南部滙合成拉法河[2]，最後喺蛟河市區滙入松花湖。呢個鎮嘅水資源幾豐富吓，有一座中型水庫、一座細I型水庫、八座細II型水庫、四個長壩，總貯水量102萬km³，水域面積1935畝。所以漁業發達，年產水產品約14.7萬公斤[2]。

交通上有榆江公路、204省道蛟榆公路（蛟河─榆樹）穿過[7]，另外拉濱鐵路喺度有設新站站，琿烏高速亦有新站嘅出入口[6]。

經濟

編輯

農業上，有1萬2375公頃嘅耕地，其中水田有2263公頃，旱田有1萬112公頃。林地面積5萬5872公頃，有林地3萬2544公頃，林木覆蓋率58%[2]。主要作物有粟米、水稻、大豆、雲耳[6]，其中種咗2700公頃嘅糯粟[2]。主要畜牧有生豬、黃牛、梅花鹿、家禽[2]，有新欣、平川兩大梅花鹿場[6]。

工業上，有40幾家企業，有百幾家豆、糧米廠[2]。重要企業有長白山酒業、于氏木業、長白木業[2]。

第三產業上有交通、批發、零沽、貿易、飲食等行業。貿易、餐飲單位764家，從業人員1944人，年增長値8620萬元人民幣[2]。

人口

編輯

2012年，新站有1萬3278戶居民共4萬4569人，其中城鎮人口2萬311人[2]。由於經濟、商業發展，實際住喺鎮墟嘅人口有兩萬兩千人左右[2]。

政區

編輯

新站轄1個社區、31條村[3]。

  • 社區：新毓
  • 村：石門子、寶山、雙旺、長有、雙頂子、基良、富安、龍鳳、冷風口、保安、東靠山、珍珠、平原、復興、養魚、東溝、朝陽溝、六家子、五家子、吉祥、老爺嶺、北安、小姑家、大利、文化、河南、愛河、仁和、新站、蔬菜、新鮮

地名釋義、沿革

編輯
  • 新驛（san1 jik6）
    之前建置未詳。喺2018年同新躍社區合併成新毓社區。
  • 新躍（san1 joek6）
    喺2011年成立，因爲當地有當年嘅躍進委員會而得名。喺2018年同新驛社區合併成新毓社區。
  • 新毓（san1 juk1）
    喺2018年成立，合併自原先嘅新驛同新躍兩個社區。
  • 石門子（sek6 mun4 zi2）
    因爲呢度東西兩側山石對住，個樣似門而得名。
    滿洲國時設行政村，1946年屬龍鳳區，1954年撤區，屬雙頂子鄉，1959年屬龍鳳公社嘅寶山管理區，1962年分出做石門子大隊；1983年改成村委會。2001年隨住龍鳳鄉撤銷，併入新站鎮。
  • 寶山（bou2 saan1）
    民國十六年（1927年）由謝氏開村，因爲呢度有好多樹都有螞蟻竇，所以初時地名叫螞蟻稍（maa5 ngai5 saau2）。後來定行政地名時，話呢帶要寶字打頭，用「山河林安」跟做名，於是改名叫寶山，所以呢度附近又有寶河、寶林、寶安嘅地名。
    呢度有寶山北山遺址，喺條村北面座山度出土咗一件石刀、一件石斧、三塊陶片，屬西團山文化，喺2009年第三次文物普查時發現。
    1927年開村，叫螞蟻稍；1936年設行政村，叫寶山；1946年屬龍鳳區；1954年屬雙頂子鄉；1962年設寶山大隊；1983年改成村委會；2001年龍鳳鄉撤銷，併入新站鎮。
  • 雙旺（soeng1 wong6）
    民國十九年（1930年）開始有人住，墾荒人姓董，初時因爲呢度離寶安屯近，而叫做寶林（bou2 lam4）。之後村前有兩笪山地，啲泥幾肥，種嘅糧大豐收，兼且種出嘅菸葉夠厚、味又香，能夠賣個好價錢，令農戶收入幾好，就改地名叫雙旺，意思係「兩笪地都興旺」噉解。
    1930年開始墾荒，1936年開村，叫寶林，1938年改名叫雙旺。1946年屬龍鳳區嘅青梁村，1954年撤區，屬雙頂子鄉，1959年屬龍鳳公社嘅雙頂子管理區，1962年分出雙旺大隊，1983年大隊改成村委會。佢原本屬龍鳳鄉，2001年龍鳳撤銷後，歸新站鎮管。
  • 長有（coeng4 jau5）
    民國十一年（1922年）由姜氏開村，當初叫蛤蟆塘（haa1 mou1 tong4），因爲呢度有好多蛤乸。1936年設行政村時改名叫長有，攞「長久富有」嘅意頭。1949年後國家統計局登記地名時，記成同音嘅長友，到2019年時改返正[11]。
    1922年開始有居民，叫蛤蟆塘，1936年改叫長有。1946年屬龍鳳區，1954年屬龍鳳鄉，1959年屬龍鳳管理區，1962年分出做長友大隊，1983年大隊改成村委會，2001年龍鳳撤銷後，歸新站鎮管。
  • 雙頂子（soeng1 ding2 zi2）
    清道光十一年（1831年）由袁氏開村，因爲村北五百米處有座山，有兩個山頂並列凸出，因而得名。
    1831年開村，1936年設行政村，1946年屬龍鳳區，1954年屬雙頂子鄉，1959年做咗龍鳳公社嘅雙頂子管理區，1962年改成大隊，1983年改成村委會，2001年龍鳳鄉撤銷，併入新站鎮。
  • 基良（gei1 loeng4）
    清道光十一年（1831年）由袁氏開村，喺處開設幾個露天木材倉庫，當地話叫呢種倉庫做「楞場」，後來因爲火燭，全部燒晒，所以當時呢度叫火燒楞（楞讀令，fo2 siu1 ling6）。後來因爲個名唔好聽，而改叫基良，意思係「善良」噉解。
    1831年開始有人住，叫火燒楞，1937年設行政村，1947年改名叫基良，屬龍鳳區，1954年上頭嘅區改成鄉，1959年屬富安管理區，1962年設基良大隊，1983年大隊改成村委會，2001年隨住龍鳳鄉撤銷，呢度歸入新站鎮。
  • 富安（fu3 on1）
    民國九年（1920年）由張氏開村，因爲隔籬條河水產豐富，諸如有蛤乸、鯇魚，啲人生活富足，所以初時地名叫富河（fu3 ho4）。後來呢帶地名話要跟「安」字尾，於是改成富安，所以富安附近有東安、喜安、于安呢啲地名。
    1920年開村，叫富河，1936年設行政村，改名叫富安，1946年屬龍鳳區，1954年上頭改成鄉，1959年改成富安管理區，1962年改成大隊，1983年改成村委會，2001年龍鳳鄉撤銷時，呢度歸入新站鎮。
  • 龍鳳（lung4 fung6）
    清光緒七年（1881年）由王氏開村，初時名叫平安（ping4 on1）。後來呢度傳聞話有蛇同雞打交，啲人話係龍鳳鬥，就改咗呢個名攞個吉祥意頭。
    呢度隔籬有龍鳳河流經，因村而得河名。龍鳳河上有龍鳳水庫，1970年始建，1973年12月落成。個水庫之下有相應嘅龍鳳灌區。
    1881年開村，叫平安；1936年設行政村，叫龍鳳；1938年設村公所；1946年屬龍鳳區；1954年屬龍鳳鄉；公社化時，龍鳳鄉同雙頂子鄉合併成龍鳳公社，而公社駐地搬咗去雙頂子村度，1959年設公社嘅龍鳳管理區；1962年改成大隊；1983年改成村委會；2001年龍鳳鄉撤銷，併入新站鎮。
  • 冷風口（laang5 fung1 hau2）
    清同治十一年（1872年）由常氏開村，因爲呢度係個風口，四時都打凍風，即使係夏季都照樣有西北風來襲嘅感覺，凍過第啲地方，因而得名。
    1872年開村，1936年設行政村，1959年屬龍鳳管理區，1962年分出做冷風口大隊，1983年改成村委會，2001年龍鳳鄉撤銷，併入新站鎮。
  • 保安（bou2 on1）
    清光緒二十四年（1844年）開村，舊陣村中女多男少，初時叫大姑娘（daai6 gu1 noeng4）。後來以「保證安全，吉祥平安」意思改叫保安。一種講法話設行政地名前呢度冇名，而有個叫侯國清嘅人住响度，花名叫南城王。
    1844年開村，叫大姑娘；1936年設行政村，叫保安，屬新站保大甸子甲；1946年屬新站區；1959年改做管理區，屬幸福之路公社；1962年改成大隊；1983年改成村委會。
  • 東靠山（dung1 kaau3 saan1）
    呢度有東西兩個部分，都喺北山之下。東靠山喺清道光二十四年（1844年）開村，佢喺座山嘅東面；西靠山（sai1 kaau3 saan1）亦係清道光二十四年開村，開村姓係段氏、萬氏、龐氏，喺座山嘅西面。
    1844年開村，1936年設行政村，1938年屬新站保嘅大甸子甲；1958年屬幸福之路公社嘅保安管理區；1962年屬保安大隊；1970年分出做靠山大隊；1981年改名叫東靠山；1983年改成村委會。國家統計局登記地名時，原本記做靠山，到2019年改正[11]。
  • 珍珠（zan1 zyu1）
    滿洲國時由劉氏開村，初時叫孤山子（gu1 saan1 zi2），因爲附近有座山拔地而起，尤其顯眼。後來改名叫雙鳳（soeng1 fung6），攞個龍鳳呈祥嘅意頭。公社化時又再改叫珍珠，話條村同珍珠一樣咁寶貴。
    1936年開村，叫孤山子，屬新站保嘅薛家崴子甲；1947年改名叫雙鳳；1958年改名叫珍珠，屬幸福之路公社嘅大吉管理區；1962年屬新站大隊；1977年分出做珍珠大隊；1983年改成村委會。
  • 平原（ping4 jyun4）
    民國元年（1912年）開村，嗰時呢度大多係荒地同樹叢，遍地雜草，所以初時叫撂荒地（撂讀略，loek6 fong1 dei6）。呢度所在嘅山坑叫北趟溝，素稱做「平川」，加之本身地形比較平，所以後來改名叫平原。
    1912年開村，叫撂荒地；1940年設行政村，屬新站保嘅東溝甲；1945年改叫平原；1946年屬龍鳳區嘅民主村；1954年劃歸新站鎮；1959年屬幸福之路公社嘅民主管理區；1962年分出做平原大隊；1983年改成村委會。
  • 復興（fuk6 hing1）
    民國元年（1912年）開村，初時未有名，後來因爲呢度笪地屬鮮光銀行所有，所以地名叫鮮光（sin1 gwong1），後來改名叫復興，意思係「復興中國」噉解。
    1912年開村，1931年後笪地歸鮮光銀行，1936年設行政村，叫鮮光；1947年改叫復興，屬龍鳳區嘅民主村；1954年劃畀新站鎮；1962年屬民主大隊；1972年分出做大嶺大隊；1977年改叫復興大隊；1983年改成村委會。
  • 養魚（joeng5 jyu4*2）
    清咸豐十年，呢度有笪埞方叫抽水亭（cau1 seoi2 ting4），生住啲細鱗魚，魚多肉靚，見食，於是有人喺度捉魚、整成魚乾搦去賣，隨之開村，叫晾魚場（long6 jyu4 coeng4），又叫過做曬魚場（saai3 jyu4 coeng4）。國共內戰期間，條村來咗個于氏嘅山東人，佢喺當地名望好高，出於佢個人原因，對隻晾字避忌，於是啲人就佢，改名叫養魚，兼且隻魚字搭于字同音，即「養于」，亦加之當時村北便條河嘅魚捉到少晒，要靠養魚來開生計。
    1860年開村，叫曬魚場；1936年設行政村，叫晾魚場，屬新站保嘅小東溝甲；1948年改名叫養魚；1950年同復興村合併，叫民主村；1959年改成管理區，屬幸福之路公社；1962年改成大隊；1981年恢復原名；1983年改成村委會。
  • 東溝（dung1 kau1）
    1935年由徐氏開村，因爲佢喺三道河東便，又喺個山坑度，因而得名。
    1935年開村，叫東溝，屬新站保東溝甲；1940年屬龍鳳村；1946年屬龍鳳區嘅養魚村；1959年屬幸福之路公社嘅民主管理區；1972年分出做東溝大隊；1983年改成村委會。
  • 朝陽溝（ciu4 joeng4 kau1）
    清光緒三十年（1904年）有李氏喺度開舖，因爲佢耳仔生得大，所以初時地名叫李大耳朵店lei5 daai6 ji5 doe2 dim3。後來因爲呢度地勢向南朝陽，因而改名做朝陽（ciu4 joeng4）。另外附近有條朝陽溝，係民國元年（1912年）由魏氏開荒，因而叫魏家溝（ngai6 gaa1 kau1），民國七年（1918年）有馮氏起屋，而改名做馮房子（fung4 fong4 zi2），設行政村時因爲地勢朝南而起名做朝陽，1981年第一次地名普查時，因爲同烏林嘅朝陽撞名，就改叫朝陽溝。
    1904年開村，叫李大耳朵店；1936年設行政村；1946年屬龍鳳區六家子村，1954年劃入新站鎮，1959年屬八垧地管理區，1962年從管理區分出做八垧地朝鮮族大隊，1963年改叫北小蛟河朝鮮族大隊，1964年改叫朝陽大隊，1983年改名叫朝陽溝，兼改成村委會。呢度有朝陽河流經，因村名得河名。國家統計局一度記地名成朝陽，2019年改正[11]。
  • 六家子（luk6 gaa1 zi2）
    清同治三年（1864年）開村，有五姓六戶：劉氏（兩戶）、馬氏、李氏、房氏、常氏。按呢六戶人而叫六家子。1935年時呢度經常畀蘿蔔頭騷擾，啲人自組民團，改名叫治安（zi6 on1）。後來先至恢復原名。
    呢度有六家子隧道，係拉濱鐵路行經嘅山隧，喺1935年落成，2003年7月翻修過。當地亦有啲古蹟：喺條村東面座山度有六家子東山山城，係高句麗修築嘅軍事城堡，喺1985年第二次文物普查時發現；而山城嘅東坡又有六家子東山遺物散佈點，採集到兩嚿灰陶殘片，時期上則係屬渤海國，亦係1985年第二次文物普查時發現。
    1864年開村，叫六家子；1935年設行政村，叫治安，屬新站保嘅六家子甲；1942年併入龍鳳村；1946年再次設村，屬龍鳳區；1954年屬新站區嘅大吉村；1962年分出做六家子大隊；1983年改做村委會。
  • 五家子（ng5 gaa1 zi2）
    清咸豐年間開村，有五戶四姓：劉氏、馬氏、楊氏、張氏，因而得名。呢度有五家子攔河壩，有對應嘅灌區。
    約喺1851年～1861年間開村，叫五家子；1936年設行政村，屬新站保嘅薛家崴子甲；光復後屬大吉村；1977年分出做五家子大隊；1983年改成村委會。
  • 吉祥（gat1 coeng4）
    清咸豐年間由薛氏開村，初時叫薛家崴子（sit3 gaa1 wai1 zi2）；後來以「大吉大利」嘅意頭改名叫大吉（daai6 gat1）；之後又改叫吉祥。
    約喺1851年～1861年間開村，叫薛家崴子；1936年設行政村，叫大吉，屬新站保嘅薛家崴子甲；1946年屬新站區；1958年改叫吉祥；1959年屬幸福之路公社嘅大吉管理區；1962年改叫吉祥大隊；1983年改成村委會。
  • 老爺嶺（lou5 je4 ling5*leng5）
    清光緒十年（1884年）開始有人住，人多之後，喺老爺嶺山上同山下各開一村，分別叫老爺嶺上（lou5 je4 ling5 soeng6）同老爺嶺下（lou5 je4 ling5 haa6），兩村合一後就叫老爺嶺村。
    呢度有老爺嶺戰跡地，係國共內戰時拉法-新站戰役嘅其中一場戰鬥所在地，開打喺1946年。
    1884年有戶，1936年設上下兩條行政村，屬新站保嘅小姑家甲；1947年屬新站區；1959年屬幸福之路公社嘅北安管理區；1962年分出做老爺嶺大隊；1983年改成村委會；2005年上下兩條村合一。
  • 北安（bak1 on1）
    清咸豐元年（1851年）開村，當初呢度四圍嘅山都係生晒雜草矮木，方圓幾公里冇大樹，所以初時地名叫亂柴頂子（lyun6 caai4 ding2 zi2）。後來呢度出過兩次火燭、一次瘟疫，爲咗求平安，而起咗現時地名。
    呢度附近曾經有條北安河，現已乾水。喺呢條村度，出土咗4件石斧、1件敲㳫器，屬西團山文化，喺1985年第二次文物普查時發現，考古遺址名叫「北安屯團山子遺址」。
    1851年開村，叫亂柴頂子；1936年設行政村，叫北安，屬新站保嘅小姑家甲；1946年屬新站區；1959年設北安管理區，屬幸福之路公社；1962年改成大隊；1983年改成村委會。
  • 小姑家（siu2 gu1 gaa1）
    1935年由谷氏開村，初時由於佢喺中間座山度，而叫做腰崗（jiu1 gong1）。1990年代時，北崗、南崗、車站三條行政村都併入腰崗，再改名叫小姑家。呢個名出於呢度住嘅人少，兼且全部都係姓谷嘅，官話中「谷」同「孤」諧音（唔計聲調都係讀gu），所以叫小孤家，後來寫成咗同音嘅「小姑家」。
    呢度有小姑家水庫，1958年始建，1979年落成。個水庫有對應嘅灌區。
    1935年開村，叫腰崗，第個名叫小孤家；1938年設行政村，屬新站保嘅小姑家甲；1942年行政上併入拉法村；1948年重設行政村，屬拉法區；1959年屬幸福之路公社嘅北安管理區；1968年分出做大隊；1983年改成村委會；1990年改叫小姑家。
  • 大利（daai6 lei6）
    清光緒元年（1875年）由狄氏、孫氏開村。滿洲國期間，呢度係日本人養奶牛、耕地嘅埞方，起咗幾間帶白牆嘅屋，因而得名白房子（baak6 fong4 zi2）。東北光復後，呢度改名叫大利，亦即「大吉大利」噉解。
    1875年開村；1935年設行政村，叫白房子，屬新站保嘅小姑家甲；1945年改叫大利。1959年屬幸福之路公社嘅北安管理區；1962年分出做大利大隊；1983年改成村委會。
  • 文化（man4 faa3）
    清光緒三十三年（1907年）由安、李兩姓開村，佢哋都係從永吉縣搬來嘅，初時當地叫兩家子屯（loeng5 gaa1 zi2 tyun4）。後來改名叫飲馬河（飲讀任，jam6 maa5 ho4）。後來又改叫文化，意思係話想啲後人都有文化噉解。
    1907年開村，叫兩家子；後改名飲馬河；1936年設行政村，改叫文化；1945年後屬新站街嘅香水村；1958年屬幸福之路公社嘅新站管理區；1977年分出做文化大隊；1983年改成村委會。
  • 河南（ho4 naam4）
    清同治九年（1870年）由張、楊兩姓開村，楊家開畫舖，生意好，後來地名叫楊畫匠舖（joeng4 waa6*2 zoeng3 pou3）。因爲呢度喺新站政府駐地南邊，兼且有兩條河隔開咗，所以收尾改名叫河南。
    1870年開村，1936年設行政村，叫楊畫匠舖，屬新站保嘅香水甲；1946年改名叫河南，屬新站區嘅香水村。1962年分出做河南大隊；1983年改做村委會。
  • 愛河（oi3 ho4）
    清光緒十年（1844年）開村，當時有劉氏喺愛河東面開間客棧仔，呢度山林密集，喺正山邊，所以叫過幾個地名：劉馱子店（lau4 to4 zi2 dim3）、東林子（dung1 lam4 zi2）、砬子後（laa1 zi2 hau6）。設行政村時，以「愛護山河」嘅意思改叫愛河；又有講法話當時于氏係首戶，攞「魚水相依」意思改名，當中魚同于嘅官話同音。1949年後嘅國家統計局曾經一度將地名登記成艾河（ngaai6 ho4）。
    呢度有河流經，個名就跟村名叫愛河，1986年時吉林省確認呢個係條河嘅標準地名。
    1844年開村，地名叫過劉馱子店、東林子、砬子後；1935年設行政村，叫愛河。1948年屬新站區；1959年屬幸福之路公社嘅保安管理區；1962年分出做愛河大隊；1983年改做村委會。
  • 仁和（jan4 wo4）
    1931年開村，因爲呢度有兩條河交匯成人字形，而得名人河（jan4 ho4），因爲「河」同「和」喺官話同音，都係hé，後來轉成咗仁和，攞「仁義和氣」意思。1981年第一次地名普查時改成咗仁河，但統計局嘅登記名冇跟住改。
    附近有仁河水庫，屬愛河村，但水庫嘅灌區喺仁和村。
  • 新站（san1 zaam6）
    地名得自佢喺鎮墟度。
    滿洲國時屬新站保嘅新站村公所，1946年屬新站區；1959年改成管理區，屬幸福之路公社；1962年改成大隊；1983年改成村委會。
  • 蔬菜（so1 coi3）
    呢度喺新站鎮墟嘅西南便，喺以前有個遠大社，以種菜爲主，城鎮啲商販都會去呢處種菜，於是得名叫蔬菜。
    呢度有處遺蹟，叫蔬菜五隊墓葬地，喺蔬菜五隊嘅山丘度發現咗處成人墓葬，出土隨葬品15件，屬晚期嘅西團山文化，喺1985年第二次文物普查時發現。
    1959年屬新站管理區，1965年分出做蔬菜專業隊，俗稱蔬菜大隊，1983年改成村委會。
  • 新鮮（san1 sin1）
    村名出自佢所在嘅馬路名，即新鮮街，條路原名叫治安街，後來攞新站鎮嘅「新」字打頭來安路名，因爲呢帶係朝鮮人嘅聚居區，因此叫做新鮮街，新指新站，鮮指朝鮮居民（中國朝鮮文：신선촌／新鮮村 Sinsŏn-chon）。
    1946年屬新站村；1956年搞合作化時成立晨光社；1962年改叫治安大隊；1981年改叫新鮮大隊；1983年改成村委會。

景點

編輯

主要景點有金斗宮、長白山地下酒窖、龍鳳山莊[2]、國共美三方談判遺址[4]、龍鳳水庫、愛河水庫、黃泥河水庫、前紅陽羅鍋地、遼代界壕、拉新戰役談判舊址、革命烈士陵園、河南村百年古榆[12]。其中金斗宮係清光緒年間嘅道宮，而龍鳳有漂流，漂流河道全長8.5公里，落差35米[6]。

註

編輯
  1. ↑ 此外，有講話新站喺1946年設新站區，建鎮之後喺1958年改成幸福之路公社[7]。但係同另一個講法有出入，呢個講法話，喺1945年蛟河就已經有12個縣轄區，區下再轄村。經過同週邊啲縣嘅政區變動後，1950年各縣轄區重新按數字起名排序爲16個區。1954年9月12號有14個區撤銷咗，保留一、三區，啲區劃成42條村。而公社化運動時，係1958年10月1號先改曬啲鄉鎮爲18個作業區，再喺1959年4月改成18個公社。而呢個講法亦無話公社名叫做幸福之路，反而話係叫新站公社，然後1979年公社析置出新站鎮，1983年新站公社變成新站鄉，1985年鄉鎮合併[8]。所以僅作參攷。

攷

編輯
  1. ↑ 〈新站鎮領導分工〉。新站鎮。2012年10月25號。喺2015年3月9號搵到。{{cite web}}: CS1 maint: url-status (link)
  2. ↑ 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 2.15 2.16 2.17 〈新站鎮概況〉。新站鎮。2012年10月26號。喺2015年3月9號搵到。{{cite web}}: CS1 maint: url-status (link)
  3. ↑ 3.0 3.1 3.2 〈2019年統計用區劃代碼和城鄉劃分代碼：新站鎮〉。《中華人民共和國國家統計局》。喺2020年3月30號搵到。
  4. ↑ 4.0 4.1 4.2 4.3 4.4 4.5 〈吉林吉林市蛟河市新站鎮〉。博雅地名網。喺2015年3月9號搵到。
  5. ↑ 〈2013年統計用區劃代碼和城鄉劃分代碼：蛟河市〉。中華人民共和國國家統計局。喺2015年3月9號搵到。
  6. ↑ 6.0 6.1 6.2 6.3 6.4 6.5 〈新站鎮投資優勢〉。新站鎮。2012年10月26號。喺2015年3月9號搵到。{{cite web}}: CS1 maint: url-status (link)
  7. ↑ 7.0 7.1 7.2 7.3 7.4 7.5 〈新站鎮〉。行政區劃網。2011年3月22號。喺2015年3月9號搵到。
  8. ↑ 8.0 8.1 8.2 〈蛟河市歷史沿革〉。行政區劃網。2011年5月19號。原著喺2016年3月10號歸檔。喺2015年3月9號搵到。
  9. ↑ 可對比2017年同2018年嘅政區代碼變動。
  10. ↑ 〈拉法「六七」戰鬥烈士紀念碑〉。松花江網。2014年9月24號。喺2015年3月9號搵到。{{cite web}}: CS1 maint: url-status (link)
  11. ↑ 11.0 11.1 11.2 可對比2018年同2019年嘅統計區劃。
  12. ↑ 〈新站鎮交通地圖〉。中國電子地圖。原著喺2016年3月4號歸檔。喺2015年3月9號搵到。

出面網頁

編輯
由「https://zh-yue.wikipedia.org/w/index.php?title=新站鎮_(蛟河)&oldid=2140798」收