劉澤基

劉澤基（英文：Lau Chak-kei，1973年—），綽號「光頭警長」、「劉Sir」、「光頭劉Sir」、「劉長官」、「光頭劉長官」、「劉炸雞」、「自封民族英雄」，係香港警察機動部隊警署警長。佢喺2019年7月30號晚喺葵涌警署外面，將支雷明登870霰彈槍指住反修例示威者，擺出隨時開槍嘅「企射」姿勢，因而出名。

劉澤基
出生日	1973年
出生地	英屬香港
國籍	中華人民共和國
職業	差人
[改維基數據]

雖然示威者質疑劉澤基濫用暴力，但係中國大陸就好欣賞佢嘅行為。跟住佢食住個勢開微博，吸引幾十萬個大陸網民追蹤，官方媒體多次訪問佢，而佢更獲官方邀請出席慶祝中華人民共和國成立70周年大會。佢亦多次自稱自己係劉備嘅後裔。

家庭生活

劉澤基曾經喺訪問表示，佢同太太決定將佢哋仔女送去深圳嘅國際學校就學，因為佢覺得香港教育有好大問題，仔女大咗之後會知道自己係中國人，要鍾意自己嘅國家。唔似香港某啲後生仔咁樣，有知識而無正確嘅價值觀，喺佢心目中相當於「廢人」。

爭議

發布2019年香港區議會選舉廢票過半嘅假新聞

喺2019年香港區議會選舉，民主派大勝，但佢就喺微博上聲稱呢次選舉有超過一半係廢票：「全港所有候選人總得票約1,253,647，但全港總投票人數係2,943,842人，仲有160幾萬票去咗邊？超過57%票系廢票？」。但後來證實咗，佢只係喺選舉事務處網站攞咗數據放落去Excel，由於當選人嘅票數後面會打「*」號，所以唔會直接加埋。而選舉事務處官方網站會詳細列明各參選人嘅得票，並於當選人嘅所得票數後附加「*」，以資識別。如果將相關資料存入Excel運算，當選人（即係有「*」）嘅總得票為1,253,647，無「*」嘅候選人總得票為1,678,098，夾埋就係2,931,745票，同區議會選舉Facebook專頁提供嘅數字一致。。

去到2019年11月27號，親中派議員田北辰喺立法會大會會議不點名指有公務員公開喺微博造謠，指區議會選舉有一半廢票，挑撥中港人民感情，問公務員事務局局長羅智光知唔知，羅智光就只係話，就現時機制，公務員嘅行為同操守要根據《公務員守則》，有違規嘅話有關部門嘅管理層會跟進，佢唔會就個別事件評論。結果多個親中派議員都批評羅智光「遊花園」。