南九龍裁判法院

南九龍裁判法院，以前叫九龍巡理府、南九龍裁判司署^[1]，係香港一間已經停止運作嘅裁判法院，喺九龍油麻地加士居道36-38號，旁邊喺循道衛理聯合教會九龍堂。

史

南九龍裁判法院由兩座大樓組成，分別係喺1936年起好、樓高3層嘅舊翼（即而家嘅土地審裁處），同喺1970年代起好、樓高5層嘅新翼（即而家嘅勞資審裁處）。其中舊翼嗰時叫做九龍巡理府。1941年12月25號，駐港英軍喺香港保衛戰戰敗，香港就進入日治時期，大樓被佔領，香港嘅日本皇軍用嚟做辦公室，日本投降之後，法院大樓就恢復原本嘅用途。

舊翼起喺山坡上面，二樓同三樓有希臘多利克式嘅大石柱^[2]^[3]，並設有露天游廊，而底層就用花崗石砌疊而成。

2000年7月1號，南九龍裁判法院正式停止運作，當時法院設有3個法庭，每年處理大約35,000宗（1998同1999年嘅數字）案件^[4]。而舊翼喺1987年已經停用，之後一度係法庭文件貯存嘅地方^[5]。香港司法機構曾經考慮將勞資審裁處搬去法院嘅舊翼，但係最後改為提供畀土地審裁處辦公之用。而新翼就做勞資審裁處^[6]。