名偵探柯南角色一覽
呢一頁係講響名偵探柯南入面出過場嘅人。
關東 編輯
毛利偵探事務所 編輯
- 江戶川柯南（江戸川 コナン／えどがわ コナン／ Edogawa Konan）／工藤新一（工藤 新一／くどう しんいち Kudō Shinichi）
- 配音：高山南（日本）；馮友薇／方雪莉／姚敏敏／蔣篤慧／丘梅君／曾允凡（台灣）；盧素娟／周恩恩／黃玉娟（香港）
- 名偵探柯南男主角，真身係高中偵探工藤新一，畀琴酒灌咗APTX4869之後身體變咗做一個小學生樣。鍾意毛利蘭。一直喺度查緊黑暗組織，想要解藥。
- 毛利蘭（毛利 蘭／もうり らん Mōri Ran）
- 配音：山崎和佳奈（日本）；呂佩玉／楊凱凱／馮嘉德／賀世芳／魏晶琦（台灣）；陸惠玲／劉惠雲／曾月娥／王夢華／王慧珠／程文意（香港）
- 名偵探柯南女主角，讀緊帝丹高中，空手道好叻，又識得煮飯。鍾意新一，但唔知道柯南就係新一。好想同佢已經分開住咗十年嘅阿媽妃英理返翻嚟屋企住。
- 毛利小五郎（毛利 小五郎／もうり こごろう Mōri Kogorō）
- 配音：神谷明／小山力也（日本）；官志宏／孫中台／袁光麟／黃天佑／魏伯勤／陳進益／曹冀魯（台灣）；陳欣／黃志明（香港）
- 蘭嘅爸爸，開咗毛利偵探事務所，喺做私家偵探之前曾經做過刑警。鍾意飲酒，得閒嘅時候唔係飲酒、打牌就係睇賽馬。偶像係後生女歌手沖野洋子。
帝丹高中 編輯
- 工藤新一（工藤 新一／くどう しんいち Kudō Shinichi）
- 配音：山口勝平（日本）；劉傑／李景唐（台灣）；郭志權／梁偉德／馮錦堂／李家傑（香港）
- 鈴木園子（鈴木 園子／すずき そのこ Suzuki Sonoko）
- 配音：松井菜櫻子（日本）；許淑嬪／馮友薇／姚敏敏／陶敏嫻／陳鈴燕／馮嘉德／楊凱凱／傅其慧（台灣）；黃麗芳／莊巧怡／林芷筠（香港）
- 鈴木二小姐，史郎同朋子個細女。雖然係二小姐，但一啲都唔似千金，成日呱呱嘈，好花心嘅一個女仔，不過從來都唔會扮到自己好似好高貴咁。蘭嘅老友，男朋友係京極真，偶像係怪盜基德。
- 世良真純（世良 真純／せら ますみ Sera Masumi）
- 配音：日高範子（日本）；楊凱凱／傅其慧（台灣）
- 話自己係偵探，截拳道好叻，犀利過蘭，係個男人婆，化名「女工藤」，有一粒虎牙，推理能力同新一差唔多。屋企最細嘅一個。三年前去過英國，依家讀緊帝丹高中，同阿媽住緊酒店。蘭嘅老友。知道柯南係新一。
- 響十年前佢去海灘玩嘅時候見過新一，因為佢自己搞唔到佢大佬笑、而新一嘅推理就可以搞到佢大佬哈哈大笑（其實嗰時新一嘅推理係錯嘅）而崇拜新一，心入面叫新一做「魔法師」，希望有一日可以犀利過新一。
- 同時之間佢都好祟拜佢大佬，佢學截拳道嘅原因就係因為佢覺得佢大佬玩截拳道嘅時候好型。
- 本堂瑛祐（本堂 瑛祐／ほんどう えいすけ Hondō Eisuke）
- 配音：野田順子（日本）；劉傑／蔣篤慧（台灣）
- 伊森個仔，瑛海嘅細佬，依家去咗美國。反應好慢但唔蠢。細個曾經有白血病，用家姐嘅骨髓做手術，所以血型已經由O型變做AB型。佢都鍾意蘭，仲話要帶埋佢去美國，畀柯南話。知道柯南係新一。想做一個叻嘅CIA特工而唔要FBI保護。
帝丹小學 編輯
- 灰原哀（灰原 哀／はいばら あい Haibara Ai）／宮野志保（宮野 志保／みやの しほ Miyano Shiho）
- 配音：林原惠（日本）；魏晶琦／許雲雲（台灣）；曾秀清／羅杏芝（香港）
- 真身係宮野志保，原本係黑暗組織嘅成員，代號係「雪莉」，係研發APTX4869嘅核心人物之一。因為琴酒殺咗佢家姐而反水，食咗APTX4869之後身體變咗做一個小學生樣（算得上反水成功，因為喺黑暗組織咁多位反水人物入面，係得佢冇被人殺死），但係佢到依家都係畀黑暗組織追殺，好多次都差啲死喺琴酒嘅槍下。知道柯南係新一，仲鍾意佢。偶像係日本出名足球隊Big大阪隊嘅前鋒比護隆祐。
- 吉田步美（吉田 歩美／よしだ あゆみ Yoshida Ayumi）
- 配音：岩居由希子（日本）；許淑嬪／林佑俽／姚敏敏／陶敏嫻／陳鈴燕／馮嘉德／楊凱凱／傅其慧（台灣）；梁少霞／莊巧怡（香港）
- 讀緊帝丹小學1年級B班。性格天真但好成熟，鍾意柯南。偶像係日本出名足球隊東京SPIRITS隊嘅前鋒上村直樹。
- 圓谷光彥（円谷 光彦／つぶらや みつひこ Tsuburaya Mitsuhiko）
- 配音：大谷育江／折笠愛（代演）（日本）；呂佩玉／楊凱凱／李景唐／賀世芳／魏晶琦（台灣）；梁偉德／馮錦堂／曾月娥（香港）
- 讀緊帝丹小學1年級B班。鍾意科學，比較理性嘅一個男仔。偶像係日本出名足球隊東京SPIRITS隊嘅前鋒赤木英雄。
- 小島元太（小嶋 元太／こじま げんた Kojima Genta）
- 配音：高木涉（日本）；官志宏／劉傑／吳文民（台灣）；陳卓智／李錦綸／陳志強（香港）
- 讀緊帝丹小學1年級B班。鍾意食鰻魚飯，性格衝動但好有正義感。鍾意步美。同光彥一樣，偶像係日本出名足球隊東京SPIRITS隊嘅前鋒赤木英雄。
- 若狹留美（若狭 留美／わかさ るみ Wakasa Rumi）
- 配音：平野文（日本）
- 帝丹小學1年級B班副班主任。做嘢好怪，一時一樣。佢嘅右眼係假嘅。係佢隨身物品入面，有一隻將棋「角行」，好似係十七年前羽田浩司唔見咗嗰個護身符，所以佢俾人懷疑係失蹤咗十七年、羽田浩司嘅保鏢「淺香」。
- 喺見到黑田兵衛嘅時候，佢個表情似乎好嬲，仲話黑田兵衛「十七年前你見死不救，今日你又再一次見死不救」，似乎同羽田浩司單案有關。
新一屋企同幫手 編輯
- 工藤優作（工藤 優作／くどう ゆうさく Kudō Yūsaku）
- 配音：田中秀幸（日本）；官志宏／于正昇／康殿宏／魏伯勤／吳文民（台灣）；招世亮／陳健豪（香港）
- 新一老豆，係世界有名嘅推理故仔作家。推理能力犀利過新一好多倍。同第一代怪盜基德係死對頭。知道柯南係新一。
- 工藤有希子（工藤 有希子／くどう ゆきこ Kudō Yukiko）
- 配音：島本須美（日本）；許淑嬪／林佑俽／姚敏敏／陶敏嫻／方雪莉／馮友薇／魏晶琦／楊凱凱／傅其慧（台灣）；蔡惠萍（香港）
- 新一阿媽，優作老婆，原本叫藤峰有希子，曾經讀過帝丹高中，化名「帝丹公主」，係世界有名嘅靚女明星，曾經紅遍全世界，係唔少男人眼入面嘅「女神」，但響二十歲就宣佈嫁畀優作。識得易容術，同貝爾摩德係同門師姊妹。最憎有人叫佢做「姨姨」。知道柯南係新一。
- 阿笠博士（阿笠 博士／あがさ ひろし Agasa Hiroshi）
- 配音：緒方賢一／田中一成（細個）（日本）；符爽／魏伯勤／官志宏／李景唐／陳宗岳／徐健春／吳文民／魏晶琦（細個）（台灣）；源家祥／周永光／譚炳文（香港）
- 優作鄰居同埋老友，係第一個知道柯南係新一嘅人，仲幫佢整咗有用嘅嘢（例如滑版）。
妃法律事務所 編輯
- 妃英理（妃 英理／きさき えり Kisaki Eri）
- 配音：高島雅羅（日本）；許淑嬪／方雪莉／姚敏敏／陶敏嫻／蔣篤慧／馮嘉德／楊凱凱／傅其慧（台灣）；袁淑珍／黃鳳英（香港）
- 妃法律事務所創辦人，一個好出名嘅律師，化名「法庭女王」，把口超犀利，到依家都未輸過一場官司，觀察力、洞察力同埋推理能力都好強，過肩摔好叻。蘭嘅阿媽，小五郎嘅老婆，但就因為同小五郎關係唔好而分開住。
- 同新一阿媽有希子係高中同學，都係讀帝丹高中。響十六歲嘅時候因為好easy咁升上東大而畀人叫做「帝丹女王」。
杯戶町 編輯
- 京極真（京極 真／きょうごく まこと Kyōgoku Makoto）
- 配音：檜山修之／瀧本富士子（細個）（日本）；徐健春／劉傑／吳文民／曹冀魯（台灣）
- 讀緊杯戶高中三年級，係嗰間學校空手道部嘅主將同王牌，化名「蹴擊貴公子」、「衝撞王子」，係日本有連贏四百場嘅紀錄，依家就喺美國留學。
- 佢嘅女朋友係鈴木二小姐鈴木園子，鍾意園子嘅原因係因為佢有次比賽嘅時候見到園子好落力咁為佢老友蘭打氣而對佢一見鍾情。園子嘅偶像係怪盜基德，所以佢認定基德係佢情敵。
米花町 編輯
- 脇田兼則（脇田 兼則／わきた かねのり Wakita Kanenori）
- 配音：千葉繁（日本）
- 榎本梓（榎本 梓／えのもと あずさ Enomoto Azusa）
- 配音：榎本充希子（日本）；陶敏嫻／魏晶琦／楊凱凱／傅其慧（台灣）
- 係白羅咖啡廳嘅女侍應。性格幾善良，係個「工作狂」。同蘭好老友，大佬叫榎本杉人。
關西 編輯
大阪 編輯
- 服部平次（服部 平次／はっとり へいじ Hattori Heiji）
- 配音：堀川亮／比嘉久美子（細個）（日本）；符爽／官志宏／魏伯勤／吳文民／曹冀魯／魏晶琦（細個）（台灣）；鄺樹培／陳健豪／李家傑（香港）
- 讀緊大阪改方學園高中部二年級，同新一有「關東工藤，關西服部」嘅化名，有佢老豆嘅遺傳。講嘢有好濃嘅關西口音。鍾意同班同學遠山和葉，但係次次表白嘅時候都遇到有人死。知道柯南係新一。
- 遠山和葉（遠山 和葉／とおやま かずは Tōyama Kazuha）
- 配音：宮村優子／佐久間玲（細個）（日本）；陶敏嫻／姚敏敏／方雪莉／蔣篤慧（台灣）；林元春／曾月娥（香港）
- 平次嘅同班同學。佢都好鍾意平次，所以佢次次見到平次同第二個女仔喺度傾計嘅時候就會好嬲。合氣道好叻。蘭嘅老友。
- 服部靜華（服部 静華／はっとり しずか Hattori Shizuka）
- 配音：勝生真沙子（日本）；陶敏嫻／方雪莉／馮嘉德／傅其慧（台灣）
- 服部平次嘅阿媽，服部平藏嘅老婆，原名池波靜華。煮飯好叻，係個劍道好手，重曾經係日本歌牌界嘅歌牌女王。由於老公平藏係做警察，所以對警局嘅內部連作好熟悉。
京都 編輯
- 大岡紅葉（大岡 紅葉／おおおか もみじ Ōoka Momiji）
- 配音：雪野五月（日本）；傅其慧（台灣）
- 讀緊京都泉心高中二年級，係個有錢女，同園子屋企一樣咁有錢，但係關係唔係咁好。個波好大，有住同新一睇齊嘅推理水準。玩歌牌好叻，係日本歌牌嘅明日新星，而師父係名頃鹿雄。鍾意平次，仲話平次係佢嘅未來老公，而佢哋細個嗰陣都見過一次面。同平次嘅另一個死對頭沖田總司係同班同學。
- 伊織無我（伊織 無我／いおり むが Iori Muga）
- 配音：小野大輔（日本）；陳幼文（台灣）
- 大岡紅葉嘅管家，曾經響紅葉指揮之下用假名和田進一（和田 進一／わだ しんいち）監視服部平次。擅長推理，對歷史好有研究，同埋都識玩歌牌。
- 沖田總司（沖田 総司／おきた そうし Okita Sōshi）
- 配音：遊佐浩二（日本）
- 反斗劍神配角，喺名偵探柯南客串。同紅葉係同班同學，劍道好叻，犀利過平次，最叻嘅手段係「五連刺」。同新一撞樣。鍾意鐵諸羽（鐵劍細妹），好希望有一日可以犀利過鐵劍。
柯南身邊重要嘅人 編輯
鈴木家族財團 編輯
- 鈴木次郎吉（鈴木 次郎吉／すずき じろきち Suzuki Jirokichi）
- 配音：永井一郎／富田耕生（日本）；徐健春／吳文民（台灣）
- 財團嘅顧問，園子嘅伯伯。鍾意搶住做報紙頭版。好憎怪盜基德，因為基德嘅出現搶咗報紙頭版，所以佢一直想拉到基德。但係佢一直拉唔到。佢鍾意柯南，但一啲都唔信專門負責捉基德嘅中森銀三，所以成日嘈交。
- 鈴木史郎（鈴木 史郎／すずき しろう Suzuki Shirō）
- 配音：松岡文雄（日本）；劉傑／魏伯勤／徐健春／吳文民（台灣）；陳永信（香港）
- 財團嘅董事長，園子嘅爸爸。佢係一個大肥佬，但係就被個老婆管住。
- 鈴木朋子（鈴木 朋子／すずき ともこ Suzuki Tomoko）
- 配音：一柳みる（日本）；林佑俽／楊凱凱／魏晶琦／蔣篤慧（台灣）；區瑞華（香港）
- 董事長鈴木史郎個老婆，性格好勝，同園子個伯伯鈴木次郎吉一樣想捉住怪盜基德，但捉唔到唔單止仲要畀人玩返到頭暈。
- 因為大女鈴木綾子已經同人訂咗婚，朋子又冇仔，而可以繼承財團嘅就只有鈴木園子嘅老公（即入門女婿），所以佢好反對園子同京極真結婚。佢為咗測試京極，就同佢落咗注：京極要守住鑽石「翠錄皇帝」，如果畀人偷走咗就將兩人拆散。最後京極成功守住鑽石，唔畀基德偷走，所以朋子唯有接受京極。
- 鈴木綾子（鈴木 綾子／すずき あやこ Suzuki Ayako）
- 配音：元井須美子／鈴鹿千春（日本）；馮友薇／林佑俽／方雪莉（台灣）；黃鳳英（香港）
- 鈴木家族大小姐，史郎同朋子嘅大女，園子嘅家姐，一早同富澤家族三仔富澤雄三訂咗婚。佢做事成熟，性格溫柔，同成日呱呱嘈嘅園子分別好大。
- 鈴木園子
- 鈴木家族嘅二小姐。
赤井家族 編輯
- 赤井務武（赤井 務武／あかい つとむ Akai Tsutomu）
- 瑪麗嘅老公，MI6特工。佢係響日本出世，但大個咗就搬咗去英國到住。十七年前，老友羽田康晴叫佢查下康晴個仔羽田浩司係點死，之後就一去冇回頭，十七年嚟人又唔見條屍又唔見。佢臨出發去查嘅時候，佢同瑪麗講：「都係返我家鄉日本啦，日本安全啲」。
- 聽講佢嘅失蹤同黑暗組織有關，仲係三年前先至畀組織確定為已經死咗。
- 瑪麗（メアリー Mearī）／化名領域外嘅細妹（領域外の妹／りょういきがいのいもうと ）
- 配音：田中敦子（日本）；魏晶琦（台灣）
- 原名瑪麗·世良（メアリー・世良／メアリー・せら Mearī Sera），有個細妹叫宮野艾蓮娜。日英混血，同老公一樣係MI6特工。老公係身邊嘅時候改名叫赤井瑪麗（赤井 メアリー／あかい メアリー Akai Mearī），老公唔見咗之後帶住一家大細搬去日本，改返名叫瑪麗·世良，畀二仔秀吉做羽田家族契仔，仲畀細女真純跟自己姓。喺三年前俾貝爾摩德逼住食咗APTX4869之後身體變咗一個初中學生樣，但變細咗之後身體似乎唔係咁好。依家佢同柯南一樣想要解藥，但係佢一啲都唔相信柯南。
- 佢好冷靜同埋洞察力都好強，有住一定嘅推理能力，身手仲好好。
- 佢畀貝爾摩德強逼餵藥嘅原因好可能同佢老公務武、老友康晴嗰仔羽田浩司同埋佢變細之前一直係都查緊黑暗組織有關。
- 赤井秀一
- 赤井家族大仔。
- 羽田秀吉（羽田 秀吉／はねだ しゅうきち Haneda Shūkichi）
- 配音：森川智之／甲斐田幸（細個）（日本）；吳文民（台灣）
- 原名赤井秀吉（赤井 秀吉／あかい しゅうきち／Akai Shuikichi），阿爸唔見咗之後改名叫世良秀吉（世良 秀吉／せら しゅうきち／Sera Shuikichi）。人稱「太閣名人」，本身係赤井家族二仔，響十一歲嘅時候畀阿媽逼住去做羽田家族契仔，後嚟升高中嘅時候決定改名叫羽田秀吉。佢同時都係將棋天才羽田浩司嘅契細佬。因為佢鍾意嘅人宮本由美話「如果我嘅老公係一個將棋七冠王，咁我會好幸福」，所以佢係心入面同自己講「我一定要做將棋七冠王，咁由美就會變得好幸福」。佢曾經做過七冠王，不過之後又輸咗一場，所以依家佢係六冠王。
- 世良真純
- 赤井家族嘅細女。
羽田家族 編輯
- 羽田浩司（羽田 浩司／はねだ こうじ Haneda Kouji）
- 配音：安元洋貴（日本）
- 秀吉嘅契大佬，係個有錢仔。佢係一個好出名嘅將棋天才，響十七年前曾經係日本將棋界嘅明日新星，當時佢係四冠王，係最接近日本將棋界最高殊榮「七冠王」嘅人。出於自己嘅興趣，佢去咗美國參加象棋比賽，但係響比賽前一日響酒店畀人殺死，震驚全日本。灰原哀話佢係畀黑暗組織二把手蘭姆用APTX4869殺死。佢嘅護身符係佢師父留落嚟嘅一隻棋「角行」，左下角係崩咗。但唔知點解佢嘅護身符會喺若狹留美手上。
- 到依家，依然有人會定期將佢單案放上網，似乎係有人想盡快破解呢單案。
- 羽田康晴（羽田 康晴／はねだ やすはる）
- 浩司嘅老豆、秀吉嘅契爺，同時都係務武嘅老友。十七年前，就係佢叫務武幫佢去查下佢嗰仔浩司係點死。
Big大阪隊 編輯
同東京SPIRITS隊係死對頭。
- 比護隆佑（比護 隆佑／ひご りゅうすけ Higo Ryuusuke）
- 配音：櫻井孝宏（日本）；陳進益／曹冀魯（台灣）
- 日本出名足球隊Big大阪隊嘅前鋒兼王牌，響日本好有名氣，有一個同父異母嘅大佬叫遠藤隆央，小哀係佢嘅超級大fans。曾經邀請新一入嚟Big大阪隊，但就畀新一拒絕。響港南高中畢業，同日本出名女歌手沖野洋子係同校師姊弟，仲曾經傳過誹聞。傳出誹聞嘅時候，小五郎同小哀好傷心，後嚟柯南搵到證據證明佢哋只係老友，唔係男女朋友。比護同柯南講多謝，仲摸小哀個頭，同佢講「你係一個好好嘅助攻！希望你可以入到我哋Big大阪隊」，所以小哀依家都響度練波。
- 真田貴大（真田 貴大／さなだ たかひろ ）
- 配音：吉野裕行（日本）；陳幼文（台灣）；李家傑（香港）
- 日本出名足球隊Big大阪隊嘅新星，響日本足球界畀好多人睇好，仲畀人話佢係同隊前鋒比護隆佑嘅「最強未來助攻」。將東京SPIRITS隊前鋒赤木英雄睇成自己嘅勁敵，響比賽嘅時候對住赤木講一啲放話，仲好希望自己有一日可以叻過佢。
東京SPIRITS隊 編輯
同Big大阪隊係死對頭。
- 赤木英雄（赤木 英雄／あかぎ ひでお Akagi Hideo）
- 配音：辻谷耕史（日本）；官志宏／劉傑（台灣）；梁偉德（香港）
- 日本出名足球隊東京SPIRITS隊前鋒，響日本好有名氣。兩年前老豆阿媽都死咗，所以佢同細佬赤木守住響米花町，由赤木量子照顧佢細佬。同隊友上村直樹一齊帶住東京SPIRITS隊稱霸全日本，所以畀人叫「黃金雙雄」。可以同佢哋抗衡嘅就只有Big大阪隊前鋒比護隆佑。
- 上村直樹（上村 直樹／うえむら なおき Uemura Naoki）
- 配音：矢尾一樹（日本）；符爽（台灣）；鄺樹培（香港）
- 日本出名足球隊東京SPIRITS隊前鋒，響日本好有名氣。畢業響米花高中，性格好要強，赤木係佢隊友兼老友。同隊友赤木英雄一齊帶住東京SPIRITS隊稱霸全日本，所以畀人叫「黃金雙雄」。
其他 編輯
- 沖野洋子（沖野 ヨーコ／おきの ヨーコ Okino Yōko）
- 配音：天野由梨／長澤美樹（日本）；許淑嬪／蔣篤慧／陶敏嫻／馮嘉德／楊凱凱（台灣）；沈小蘭（香港）
- 日本當今出名後生女歌手，只有大約廿一歲，原本係地球淑女隊嘅成員之一，依家係自由身。小五郎嘅偶像，水無怜奈嘅老友，前度係藤江明義，經紀人係山岸榮一。曾經同日本當紅足球員兼師弟比護隆佑傳過緋聞，後嚟緋聞畀否決之後，就經常性將自己嘅演唱會門飛送畀毛利小五郎一家人。
- 有啲時候，漫畫會借沖野洋子嘅名義，唱一啲片頭曲或者片尾曲（例如「紅與黑的碰撞」入面嘅片尾曲「雪どけのあの川の流れのように」） 。
日本警察 編輯
警視廳 編輯
- 白馬警視總監（白馬警視総監／はくばけいしそうかん）
- 配音：長嶝高士／福田信昭； 台灣：劉傑／吳文民
- 魔術快斗配角，喺名偵探柯南客串。警視廳「一哥」，個名唔知，有個仔叫白馬探。
- 諸星登志夫（諸星 登志夫／もろぼし としお Moroboshi Toshio）
- 配音：堀部隆一（日本）；陳宗岳（台灣）
- 警視廳警視監，個孫叫諸星秀樹。
刑事部 編輯
- 小田切敏郎（小田切 敏郎／おだぎり としろう Odagiri Toshio）
- 配音：中田浩二（日本）；徐健春／陳幼文（台灣）
- 刑事部部長，個仔叫小田切敏也。
- 松本清長（松本 清長／まつもと きよなが Matsumoto Kiyonaga）
- 配音：加藤精三（日本）；劉傑／官志宏／魏伯勤（台灣）；陳曙光（香港）
- 刑事部搜查一課警視正，做過警視廳刑事部搜查一課警視，個女叫松本小百合。響二十年前因為要拉犯而整傷咗隻左眼。園子話佢似隻好惡嘅大猩猩。
- 黑田兵衛（黒田 兵衛／くろだ ひょうえ Kuroda Hyōe）
- 配音：岸野幸正（日本）；曹冀魯（台灣）
- 依家係警視廳刑事部搜查一課警視，做過長野縣警署搜查一課課長，安室透同埋目暮十三嘅直屬上司。鍾意飲紅茶。
- 曾經出過一次好嚴重嘅意外，導致佢嘅右眼畀燒傷，冇咗隻右眼，塊面傷到有咗一條好長嘅疤痕，仲響醫院昏迷咗十年，醒返之後因為受咗刺激，啲頭髮全白嗮，差啲連自己都認唔到自己。
- 每次當佢見到若狹留美嘅時候就會諗返起羽田浩司單案，似乎同佢一早就識，關係唔好嘅原因好大機會係因為羽田浩司。
- 目暮十三（目暮 十三／めぐれ じゅうぞう Megure Jūzō）
- 配音：茶風林（日本）；符爽／魏伯勤／徐健春／李景唐／吳文民（台灣）；林保全（香港）
- 警視廳刑事部搜查一課強行搜查三系嘅長官（警部級），係黑田兵衛嘅直屬下屬，同優作係老友，所以識得新一。曾經係小五郎做刑警時嘅直屬上司，而依家嘅直屬下屬分別係美和子、任三郎同高木涉。老婆叫目暮綠。因為佢有一次拉犯嘅時候同小綠唔小心畀架車撞親個頭，所以兩個人頭上都有一條疤。十三為咗唔好畀人攞呢件事嚟笑佢同小綠嘅愛情史，所以無論咩嘢時候都戴住頂帽，遮住條疤。
- 白烏任三郎（白鳥 任三郎／しらとり にんざぶろう Shiratori Ninzaburō）
- 配音：鹽澤兼人／井上和彥／本田貴子（細個）（日本）；孫誠／劉傑／康殿宏／陳宗岳／官志宏／魏伯勤／陳進益／陳幼文／曹冀魯／楊凱凱（細個）（台灣）；招世亮／雷霆／周良鴻／李家傑（香港）
- 警視廳刑事部搜查一課強行搜查三系刑事（警部級），係目暮十三嘅三個直屬下屬之一。京都刑事綾小路文麿同佢係警校同期學生兼死對頭。同響帝丹小學做老師嘅小林澄子係男女朋友關係。槍法好差，一啲都唔準，但推理能力唔錯。
- 佐藤美和子（佐藤 美和子／さとう みわこ Satō Miwako）
- 配音：湯屋敦子（日本）；陶敏嫻／魏晶琦（台灣）；林元春（香港）
- 警視廳刑事部搜查一課強行搜查三系刑事（警部補級），有好多男fans，所以佢嘅花名係「警視廳之花」。身手好好，而且仲好醒目，係個智勇雙全嘅女警，響日本警察入面好少有，但就對感情呢樣嘢好遲鈍。佢嘅初戀係雷朋三世，曾經鍾意過警視廳搜查一課警備部松田陣平，松田光榮殉織之後，依家就同同事高木涉拍施。
- 高木涉（高木 渉／たかぎ わたる Takagi Wataru）
- 配音：高木涉（日本）；劉傑／官志宏／袁光麟／黃天佑（台灣）；李錦綸／招世亮／曹啟謙／李家傑（香港）
- 警視廳刑事部搜查一課強行搜查三系刑事（巡查部長級），係目暮十三個三個直屬下屬入面最低級個嗰。同佢嘅同事佐藤美和子拍施緊。性格係三個入面最溫順、老實，同埋最了解小朋友心思個嗰。好信任柯南，覺得柯南好叻。
- 青山剛昌決定，呢個角色個名照抄佢個配音高木涉個名。
- 千葉和伸（千葉 和伸／ちば かずのぶ Chiba Kazunobu）
- 配音：千葉一伸／愛河里花子（細個）（日本）；官志宏／徐健春／劉傑／魏伯勤／陳進益／曹冀魯／魏晶琦（細個）（台灣）；李家傑／巫哲棋／陳志強（香港）
- 警視廳刑事部搜查一課強行搜查三系鑑識刑警（巡查部長級），同高木涉同級兼老友，係個鍾意睇漫畫同埋食快餐嘅宅男，但做起嘢上嚟都好叻。當初就係佢鼓勵高木涉「主動出撃」去追同事佐藤美和子，係少數響刑事部入面支持佢哋拍施嘅警察。初戀係交通部嘅巡查部長三池苗子。
- 茶木神太郎（茶木 神太郎／ちゃき しんたろう Chaki Shintarō）
- 配音：田中信夫（日本）；劉傑／徐健春／魏伯勤／吳文民／曹冀魯／陳彥鈞（台灣）；林保全（香港）
- 警視廳搜查二課警視，中森銀三個阿頭，專門負責捉智能罪犯，目標係捉到怪盜基德。
- 弓長（弓長／ゆみなが Yuminaga）
- 配音：徳弘夏生（日本）；劉傑／魏伯勤（台灣）
- 警視廳搜查一課縱火犯一系長官（警部級），花名「火災阿爸」，曾經係小五郎嘅阿頭。
交通部 編輯
- 三池苗子（三池 苗子／みいけ なえこ Miike Naeko）
- 配音：田中理惠（日本）；蔣篤慧（台灣）；成瑤孆（香港）
- 警視廳交通部交通執行課女警（巡查部長級），由細到大都只係扎雙馬尾辮。同搜查一課強行搜查三系鑑識刑警千葉和伸係小學同學。其實三池到依家都重鍾意千葉，只不過係千葉感受唔到。
- 宮本由美（宮本 由美／みやもと ゆみ Miyamoto Yumi）
- 配音：杉本優（日本）；陶敏嫻／方雪莉／楊凱凱／傅其慧（台灣）；陳皓宜（香港）
- 警視廳交通部交通執行課女警（警部補級），係佐藤美和子嘅老友，男朋友係「太閣名人」羽田秀吉。好打得，唔係啲溫柔淑女。
日本公安 編輯
- 安室透（安室 透／あむろ とおる Amuro Tōru）／降谷零（降谷 零／ふるや れい Furuya Rei）
- 配音：古谷徹／伊瀨茉莉也（細個）（日本）；劉傑／楊凱凱（細個）（台灣）；李家傑（香港）
- 真名降谷零，係警察廳警備局警備企畫課嘅日本公安，直屬上司係黑田兵衛。畀上司派去黑暗組織做臥底，代號係波本（バーボン Bourbon），平時佢話自己係私家偵探，後嚟響白羅咖啡廳打工。
- 細個嗰時因為頭髮係黃色而畀人打。同黑暗組織嘅成員宮野明美同佢阿媽宮野艾連娜一早就識，曾經為咗見宮野艾連娜而特登去打交。
- 因為佢以為係赤井秀一殺咗佢老友諸伏景光（其實係景光自殺，不過佢以為係秀一殺）而對秀一好反感，仲諗住利用黑暗組織去殺咗秀一。雖然秀一已經死咗（其實佢冇死）但係佢唔信，後嚟佢搵到證據證明秀一冇死到，但就被柯南同佢老豆優作呃話佢死咗。
- 佢有一流嘅情報收集能力、觀察力同埋洞察力，識得演技、搏擊、網球、開鎖、音樂、拆彈同埋煮飯。
- 諸伏景光（諸伏 景光／もろふし ひろみつ Morofushi Hiromitsu）
- 配音：綠川光／金元壽子（細個）（日本）
- 警視廳公安部嘅日本公安警察官，係安室嘅同事兼由細到大嘅老友，有個哥哥叫諸伏高明。後嚟佢同安室畀上司派去黑暗組織做臥底，代號係蘇格蘭威士忌（スコッチ Scotch）。響身份差唔多曝光嘅時候，赤井秀一出現，話要放走佢。呢個時候突然之間出現腳步聲（其實係安室），但景光以為係琴酒，所以自殺，仲順便破壞埋佢部手機入面嘅資料。秀一扮係佢殺咗景光（由於嗰時秀一同安室唔知對方都係臥底），所以導致咗安室對秀一無法原諒。
- 因為老豆阿媽早死，而佢就畀一個住響東京嘅親戚收養，而大佬高明就留響長野縣，所以兩個人已經好耐冇見，好多時都唔知道有關對方嘅信息。
- 風見裕也（風見 裕也／かざみ ゆうや Kazemi Yuuya）／飛田男六（飛田 男六／ひだ だんろく Hida Danroku ）
- 配音：飛田展男（日本）；陳幼文（台灣）
- 真名風見裕也，警視廳公安部嘅警部補，係安室透嘅直屬下屬，係少數可以同安室直接見面、又知道佢真實身份嘅人。
大阪府警署 編輯
- 服部平藏（服部 平蔵／はっとり へいぞう Hattori Heizō）
- 配音：小山武宏／山路和弘（日本）；孫中台／徐健春／官志宏／吳文民／陳幼文／劉傑（台灣）；張炳強（香港）
- 大阪府警署「一哥」，平次嘅老豆，隻眼有啲似狐狸。性格好嚴，但係就鍾意響老婆面前扭計。劍道好叻，推理能力叻過平次同新一。
- 遠山銀司郎（遠山 銀司郎／とおやま ぎんしろう Tōyama Ginshirō）
- 配音：佐古正人／小川真司／寺杣昌紀（日本）；劉傑／徐健春／陳幼文（台灣）；梁志達（香港）
- 大阪府警署「老二」，和葉老豆。好希望平次可以做佢女婿。
- 大瀧悟郎（大滝 悟郎／おおたき ごろう Ōtaki Gorō）
- 配音：若本規夫／小野坂昌也（高中）（日本）；徐健春／劉傑／吳文民（台灣）；盧國權（香港）
- 大阪府警署警總部刑事部刑警（警部級），深受服部兩父子同埋遠山銀司郎嘅信任，重關係好好。曾經陪同平次一齊去見毛利小五郎，求佢幫手查單死人案。
長野縣警署 編輯
- 諸伏高明（諸伏 高明／もろふし たかあき Morofushi Takaaki）
- 配音：速水獎（日本）；吳文民／劉傑（台灣）
- 長野縣警署刑事部捜査一課刑警（警部級），諸伏景光個大佬。佢以京都大學法學系第一名畢業，之後加入長野縣警署。
- 推理能力好好，佢同同署嘅大和敢助由細到大都係競爭對手，另一個同事上原由衣曾經話「大和佢次次都輸畀高明」。一次因為唔聽阿頭話，跨省去搵撞正雪崩之後失蹤嘅大和敢助，導致佢畀人降職到新野縣警署，後嚟先至畀人調返嚟長野縣警署。
- 響老豆阿媽都死咗之後，細佬景光畀一個住響東京嘅親戚收養，而佢就留響長野縣到住，所以兩個人已經好耐冇見，好多時都唔知有關對方嘅信息。直到佢收到景光響自殺嘅時候射穿咗嘅個部手機，先至估到景光可能做咗公安，但就因為執行某啲任務導致殉職死咗。到依家佢都仲未知個封信係邊個寄嚟，但係佢見到響信封上有個「0」字，便諗返起景光曾經同佢講過，話佢響東京有個朋友，花名叫做「零」。
- 大和敢助（大和 敢助／やまと かんすけ Yamato Kansuke）
- 配音：高田裕司（日本）；劉傑／徐健春／曹冀魯（台灣）
- 長野縣警署刑事部捜査一課刑警（警部級），特徵係佢紮咗紮馬尾辮、膚色好黑、滿面碎鬍、睇落好惡、因為左腳跛咗所以要攞拐拔行路，而且左眼上面有兩條疤。而性格就幾直爽、但唔會畀面人，因為鍾意用嚇人嘅說話，有時會畀人一種恐懼感。但係當佢對住自己鍾意嘅上原由衣嗰陣，佢會變得好溫柔。
- 推理能力唔錯，同上原由衣由細玩到大，而同諸伏高明就係由細到大都嘅競爭對手，不過聽上原講大和次次都輸畀高明。因為受到恩師甲斐玄人巡警（巡查部長級）嘅影響，令到佢想做差佬。因為懷疑一個棄保潛逃嘅男人同恩師甲斐嘅死有關，追佢追到上山，咁啱佢撞正雪崩，所以左眼同埋左大脾都受咗傷，仲昏迷咗好耐，搞到全個長野縣警署嘅人都以為佢死咗。之後，諸伏高明搵到佢，好返之後就復職。
- 佢認為柯南係事實上操制一切嘅人，重話「嗰個細路可以話係一隻怪物」。
殉職人員 編輯
- 松田陣平（松田 陣平／まつだ じんぺい Matsuda Jinpei）
- 配音：神奈延年（日本）；官志宏（台灣）
- 原本係警視廳警備部機動部隊拆彈組成員之一，後畀人調到警視廳搜查一課，係「摩天輪爆炸事件」入面光榮殉職。響臨死之前，佢send條短訊畀鍾意佢嘅美和子：「其實我都幾鍾意你」。爾句遲嚟嘅表白，令到美和子爆喊。響讀警校嘅時候，同荻原研二係死黨，之後重同降谷零、諸伏景光同埋伊達航做咗老友。降谷零嘅拆彈投術就係佢教嘅。
- 諸伏景光
- 萩原研二（萩原 研二／はぎわら けんじ Hagiwara Kenji）
- 配音：三木真一郎（日本）；劉傑（台灣）
- 警視廳警備部機動部隊拆彈組成員之一，係個好叻嘅警察。好有桃花運，觀察能力一流。響一次大樓炸彈爆炸事件入面因為唔可以及時拆到炸彈而畀炸死，死黨松田陣平知道咗之後好激動。
- 伊達航（伊達 航／だて わたる Date Wataru）
- 配音：三木真一郎（日本）；劉傑（台灣）
- 警視廳刑事部捜査一課強行犯三係刑警，係高木涉嘅前輩，同高木涉嘅花名係「Wataru Brothers」（航同涉嘅日文發音都係Wataru），後嚟死響車禍。
- 佐藤正義（佐藤 正義／さとう まさよし Satou Masayoshi）
- 配音：大川透（日本）；徐健春（台灣）
- 警視廳搜査一課強行犯三科警部，響十八年前嘅「愁思郎事件」入面為咗救跑去響路上開緊嘅卡車、想去自殺老友鹿野修二，而導致咗自己殉職，死咗之後畀追升做警視正。佢嘅死令到佢囡囡佐藤美和子好感動，美和子之所以會做警察係因為受到佢嘅影響。
- 森村（森村／もりむら ）
- 配音：小西克幸（日本）；劉傑（台灣）
- 警視廳刑事部搜查一課強行犯系警部補，係依家刑事部搜查一課警視正松本清長嘅老友，目暮十三好尊敬佢。響廿年前嘅「吹口哨男人連續殺人案」入面因為想阻止個犯人揸車走佬而畀佢撞死咗，死咗之後畀追升兩級到警視。
美國機關 編輯
FBI 編輯
- 赤井秀一（赤井 秀一／あかい しゅういち Akai Shūichi）
- 配音：池田秀一／梶裕貴（細個）（日本）；徐健春／官志宏／劉傑（台灣）；李家傑（香港）
- FBI搜查官，係一個好叻嘅特工，截拳道都好叻，狙擊能力仲係一流（有700碼），所以佢嘅化名叫「銀色子彈」。曾經用假名諸星大（諸星 大／もろぼし だい Moroboshi Dai）同埋利用宮野明美對佢嘅感情，飛咗嗰時嘅女朋友朱蒂，入黑暗組織做臥底，因為佢出色嘅能力而有一個新代號「黑麥威士忌」。後嚟身分畀琴酒睇穿，所以之後佢同柯南聯手假死得咗，之後用沖矢昴呢個身份生活。
- 沖矢昴（沖矢 昴／おきや すばる Okiya Subaru）
- 配音：置鮎龍太郎（日本）；吳文民／陳幼文（台灣）
- 秀一假死得咗後嘅身份。依家佢住喺新一屋企。佢係利用明美而入到黑暗組織，但明美就為咗同佢永遠係埋一齊而決定反水，但係最後失敗仲畀琴酒一槍殺死，所以佢覺得自己好對唔住明美。佢發誓要保護住反水成功、但畀黑暗組織追殺、明美嘅細妹志保（即係依家嘅小哀）唔受琴酒傷害。知道柯南係新一、小哀係志保，又都估到阿媽瑪麗係變細咗（雖然佢冇親眼見到）。
- 詹姆斯·布萊克（ ジェイムズ・ブラック James Black）
- 配音：家弓家正／土師孝也（日本）；官志宏／徐健春／劉傑／魏伯勤／曹冀魯（台灣）；盧國權（香港）
- FBI高級搜查官，響英國出世，響芝加哥大，直屬下屬分別係秀一、朱蒂同埋卡邁爾。響同事斯泰琳兩公婆死咗之後，佢幫手養大斯泰琳個女朱蒂（即係佢依家嘅直屬下屬朱蒂·斯泰琳），仲教佢點樣做一個出色嘅特工。曾經話過小哀好似細個嘅朱蒂。係峰不二子嘅超級大fans。
- 朱蒂·斯泰琳（ジョディ・スターリング Jodie Starling）
- 配音：一城美由希／冬馬由美（細個）（日本）；方雪莉／蔣篤慧／魏晶琦（細個）（台灣）；許盈（香港）
- FBI女搜查官。佢爸爸都係響黑暗組織嘅FBI臥底，但係響20年前佢老豆同埋佢阿媽畀黑暗組織成員苦艾酒放火燒死，佢好好彩咁唔使死。大個咗之後為咗報仇而加入FBI。佢好鍾意打街機。
- 響秀一未入黑暗組織之前係佢女朋友，已經分手。不過到依家朱蒂對秀一仲未死心。
- 安德烈·卡邁爾（アンドレ・キャメル Andre Camel）
- 配音：梁田清之（日本）；吳文民／陳幼文（台灣）
- FBI搜查官，揸車犀利過秀一、朱蒂、安室、伏特加同埋美和子。佢係一個睇上去好惡、但係其實心地善良、冷靜、又老實嘅人。一年前就係佢累咗秀一，搞到秀一係臥底嘅身份畀琴酒睇穿。之後仲畀黑暗組織成員苦艾酒套路，差啲就累到秀一假死計劃畀黑暗組織知道。所以佢係詹姆斯三個直屬下屬入面實力最差嗰個。
- 曾經唔理同事嘅反對、唔顧生命危險咁將水無怜奈送返黑暗組織做臥底，證明佢唔係完全冇實力。
CIA 編輯
- 本堂瑛海（本堂 瑛海／ほんどう ひでみ Hondō Hidemi）／水無怜奈（水無 怜奈／みずなし れな Mizunashi Reina）
- 配音：三石琴乃（日本）；陶敏嫻／馮嘉德／楊凱凱／傅其慧（台灣）
- 原本叫本堂瑛海，CIA特工，依家響黑暗組織做臥底，代號係Kir，用假名水無怜奈喺日賣電視台做主播。測謊術好叻，忍耐力都好好。
- 響三年前佢去見一樣係黑暗組織做臥底嘅老豆伊森嘅時候，畀琴酒偷聽到。佢老豆為咗唔好畀瑛海係特工嘅身份曝光，選擇咗自殺（扮係瑛海發現咗伊森係臥底），用咁樣嘅方法嚟保護佢，自殺之前佢講咗一句「瑛海，加油，唔好放棄，繼續去查黑暗組織，幫我返去交代啦」，最後佢都好成功噉做咗琴酒最相信嘅成員之一。
- 喺一次組織行動入面佢受咗重傷，被FBI保護。後嚟佢同FBI聯手返翻組織，幫FBI攞情報，但條件係FBI要保護佢細佬本堂瑛祐。
- 響赤井秀一假死計劃入面佢都有份參與，仲扮開槍殺死秀一（其實佢係喺秀一頭上放咗血包）。
- 伊森·本堂（イーサン・本堂／イーサン・ほんどう Ethan Hondo）
黑暗組織 編輯
自從名偵探柯南出版以嚟，就已經有黑暗組織嘅出現。
老細 編輯
- 烏丸蓮耶（烏丸 蓮耶／からすま れんや Karasuma Ren'ya）／嗰位先生（あの方）
- 黑暗組織老細同埋創辦人，真名叫烏丸蓮耶，係日本一個好有錢嘅富豪，有錢過鈴木家族財團同埋大岡家族，而嗰位先生就係黑暗組織啲人叫佢嘅尊稱（佢哋都唔知烏丸就係嗰位先生）。從來冇人見過佢嘅真樣。
- 佢有一座由佢阿媽留落嘅一幢豪宅，叫「黃昏別墅」，全屋都係用黃金整嘅，可以睇到佢係幾有錢。
高級幹部 編輯
- 蘭姆（ラム Rum）／脇田兼則？（脇田 兼則／わきた かねのり Wakita Kanenori）
- 配音：千葉繁（日本）；曹冀魯／劉傑（台灣）
- 黑暗組織二把手，係老細嘅超級親信，響組織嘅地位好高，唔單止琴酒要聽佢嘅，就連琴酒都睇唔起嘅貝爾摩德都要聽佢話。關於佢嘅外表，個個版本都唔同，唯一一樣可以肯定嘅係蘭姆喺一次組織行動入面傷咗其中一隻眼，所以有一隻係假眼。安室透話佢做嘢鍾意快搞掂，唔鍾意拖。
- 可以肯定嘅係，蘭姆嘅真身就係脇田兼則。但係佢個樣好有可能係整容過，而且「脇田兼則」呢個名都有可能係假嘅，就連組織成員都唔知邊個真邊個假，惟獨「佢有隻眼係假眼」呢點就係千真萬確。
- 依家響惠比壽司店做廚師，話自己係好唔容易先搵呢份工。仲話自己嘅左眼生咗啲「唔應該生嘅嘢」，所以要用眼罩遮住。好鍾意推理，之後仲拜毛利小五郎做師父。好多時候，佢嘅手勢會無端端用咗多數只有女人先至會用嘅「蓮花指」。
- 琴酒話，響十七年前就係蘭姆搞衰咗羽田浩司單案。而響兩年前，就係佢扮成一個老人家，成功令到赤井秀一嘅臥底身份穿煲。
- 琴酒（ジン Gin）／黒澤 陣 （黒澤 陣 くろさわ じん Kurosawa Jin）
- 配音：堀之紀（日本）；符爽／劉傑／李景唐／官志宏／魏伯勤／曹冀魯（台灣）；招世亮／陳健豪（香港）
- 原名黑澤陣，係黑暗組織高級幹部，專門負責殺臥底同埋反骨仔女，拍檔係伏特加，可以同嗰位先生面對面傾計，係少數可以響黑暗組織入面搞風搞雨嘅人。最大特色係殺人唔眨眼，係咩嘢情況底下都可以好冷靜，係個智能罪犯。狙擊能力都唔錯，但畀秀一差啲。鍾意食煙。
- 苦艾酒／貝爾摩德（ベルモット Vermouth）／莎朗·溫亞德（シャロン・ヴィンヤード Sharon Vineyard）
- 配音：小山茉美（日本）；陶敏嫻／蔣篤慧／馮嘉德／楊凱凱／魏晶琦／傅其慧（台灣）；鄧潔麗（香港）
- 公開身分係美國演員莎朗·溫亞德，後生嗰時同新一阿媽工藤有希子拜世界級魔法師黑羽盜一做師父，可以變做任何人嘅樣，仲唔使變聲器都可以模仿其他人把聲。佢嘅狙擊能力都好好，比琴酒準啲，但就比秀一差啲。
- 後嚟佢唔知食咗咩嘢藥，搞到個樣唔會變老，好似同做醫生嘅宮野兩公婆（明美同志保嘅老豆阿媽）有關，所以佢好想殺咗唯一生存落嚟嘅宮野志保。為咗唔好畀人知佢係唔會變老，佢選擇假死，之後扮係自己個女克莉絲·溫亞德（クリス・ヴィンヤード Chris Vineyard，但其實係同一個人，都係貝爾摩德）出嚟，同埋籍機返翻黑暗組織。
- 係一年前響紐約扮係殺人狂，想殺咗臥底赤井秀一，估唔到係差啲跌落樓嘅一刻，新一同蘭出手救咗佢。所以佢叫新一做「Cool Guy」，叫小蘭做「Angel」，仲暗中保護住佢哋。知道柯南係新一、小哀係志保，但唔知點解佢冇話畀任何嘅其他組織成員知。
- 聽講佢係老細烏丸嘅女人，但唔知係真定假，佢哋真正嘅關係淨係得另一個組織成員波本知道。因為佢同老細有關係，所以佢可以唔聽琴酒話，自己行事。佢有另一個代號「苦艾酒」，化名同波本一樣，都係「秘密主義者」。
- 不過佢好似對組織有啲不滿，仲好睇唔起其他嘅組織成員（連琴酒都睇唔起），但就對二把手蘭姆好尊敬。
一般骨幹成員 編輯
- 伏特加（ ウォッカ Vodka）／魚塚三郎（魚塚 三郎／うおづか さぶろう ）
- 配音：立木文彥（日本）；官志宏／袁光麟／劉傑／徐健春／吳文民（台灣）；陳欣／李家傑（香港）
- 原名魚塚三郎，專門負責組織嘅資金來源，直屬上司係琴酒，係最聽琴酒話嘅組織成員，甚至琴酒講咩佢就做咩，叫琴酒「大佬」、「老大」。牛高馬大、帶住黑超，性格好惡但係好蠢，反應能力又慢。揸車能力係組織入面最叻，可以揸咩嘢槍都可以射得好準，但射程就只有300碼。
- 基堤（キャンティ Chianti）
- 配音：井上喜久子（日本）；陶敏嫻／魏晶琦／蔣篤慧／楊凱凱／傅其慧（台灣）；鄧潔麗（香港）
- 組織入面最犀利嘅骨幹女狙擊手，射程有600碼（畀秀一差啲，畀苦艾酒勁啲），揸車技術都係一流。專門負責組織嘅暗殺行動，拍擋係科倫同蘋果白蘭地。左眼有隻鳳尾蝶紋身同埋下面有個好深嘅眼影。性格暴躁、好勇鬥狠、思想好激進，邊個都唔會討好（除咗老細），唔係咩嘢大事或者行動都唔會聽琴酒話。因為一次組織行動入面苦艾酒揼底基堤嘅拍擋兼老友蘋果白蘭地而自己走佬，仲見死不救，搞到蘋果白蘭地為咗唔畀FBI嘅朱蒂同秀一捉走而自殺，所以基堤好憎苦艾酒，想一槍殺咗佢。
- 科倫（コルン Korn）
- 配音：木下浩之（日本）；徐健春／官志宏／劉傑（台灣）
- 組織入面最犀利嘅骨幹男狙擊手，射程有600碼，同拍擋基堤睇齊。同基堤都係專門負責組織嘅暗殺行動，鍾意對住人哋個頭開槍。鍾意戴住頂黑色棒球帽同埋圓鏡嘅黑色護目鏡，性格好冷酷、沉默、木訥、冷靜，好聽琴酒話，同基堤性格相反。佢都好憎苦艾酒，因為佢累死咗拍擋蘋果白蘭地，雖然佢同蘋果白蘭地唔係好老友，只不過係因為一樣都係狙擊手，而且科倫冇辦法容忍到苦艾酒嘅做法，先至會憎苦艾酒。
死咗嘅成員 編輯
- 匹斯可（ピスコ Pisco）／枡山憲三（枡山 憲三／ますやま けんぞう Masuyama Kenzō）
- 配音：村松康雄（日本）；劉傑（台灣）
- 原名枡山憲三，為嗰位先生做牛做馬好多年。靠住組織嘅力量，佢成功咁做咗花名「成功企業家」嘅日本汽車公司董事長。同組織醫生宮野兩公婆關係好好。響「電影導演酒卷昭追思會」入面殺咗吞口重彥，但係畀人影到，琴酒懷疑佢想反骨，所以響杯戶飯店畀琴酒一槍殺死，而匹斯可就未嚟得切將小哀係志保爾件事話畀琴酒知。
- 蘋果白蘭地（カルバドス Calvados）
- 組織入面最犀利嘅海外骨幹男狙擊手，響一次組織行動入面畀苦艾酒揼底重走佬，搞到佢為咗唔畀FBI嘅朱蒂同埋秀一捉走而自殺。秀一見到佢身邊咁多軍火物品嘅時候，笑佢係「軍火商人」。
- 龍舌蘭（テキーラ Tequila）
- 配音：廣田行生（日本）；魏伯勤／徐健春（台灣）；張炳強（香港）
- 同滿天堂公司嘅員工交易之後，因為攞錯箱而畀炸死，之後重畀琴酒銷毀證據。曾經同組織工程師板倉卓接觸。
- 宮野厚司（宮野 厚司／みやの あつし Miyano Atsushi）
- 配音：中村悠一（日本）
- 黑暗組織科學研究家，志保同明美嘅老豆，花名「痴線科學家」，本身係科學界人士，但係因為某啲原因而畀人踢出科學界。之後有段時間同老婆艾連娜開診所，響志保出世嗰年受到組織邀請而加入，但就響同一年突然死咗，組織話佢哋係出咗意外而死。
- 宮野艾連娜（宮野 エレーナ／みやの エレーナ Miyano Erēna）
- 配音：鈴木弘子／林原惠（日本）；陶敏嫻／楊凱凱／魏晶琦（台灣）
- 黑暗組織科學研究家，志保同明美嘅阿媽，日英混血，家姐係MI6特工瑪莉・世良。因為好少出聲而畀人叫做「跌咗入去地獄嘅天使」（Hell Angel），本身係科學界人士，因為老公宮野厚司畀人踢出科學界，所以佢都畀人踢咗出去。之後同老公開咗一間診所，響志保出世嗰年同老公一樣受到組織邀請而加入，但就響爾一年突然之間死咗，組織話佢哋兩公婆係出咗意外而死。
- 聽講兩公婆響爾一年一直研究緊一種神奇藥物，可以令到人就算死咗都可以返生，爾種藥物叫做「銀色子彈」（シルバー・ブレット Silver Bullet，同秀一花名一樣），應該就係APTX4869嘅前身。死之前曾經同大囡明美講過，佢留底咗二十卷錄音帶畀細囡志保，內容係對志保一至二十歲生日嘅祝福。響留畀志保十八歲生日嘅錄音帶尾段入面，突然講出咗一句說話「我諗係時候講畀你知，其實你媽咪我……」，同志保講係為咗要研究「銀色子彈」而迫住要離開佢哋兩姊妹。
- 愛爾蘭（アイリッシュ Irish）
- 配音：幹本雄之（日本）；官志宏（台灣）
- 黑暗組織男骨幹，本身對組織好忠心，但之從對自己好好嘅組織老骨幹匹斯可畀琴酒殺死之後就想搵方法證明琴酒犯咗大錯，從而拉佢落馬，為匹斯可報仇。後嚟佢搵到柯南同新一嘅指紋做比對，發現柯南就係新一，所以佢想帶柯南去見阿頭嗰位先生，證明琴酒犯咗錯。最後響京都鐵塔上面畀基堤殺死，死之前對柯南講「原來係咁……怪唔得苦艾酒咁睇起你……工藤新一，你一定要繼績查落下去……」，似乎係想以柯南查組織，順便幫埋佢同匹斯可報仇。
- 楠田陸道（楠田 陸道／くすだ りくみち Kusuda Rikumichi）
- 配音：岩田光央（日本）；吳文民（台灣）
- 黑暗組織男低層員工，有一次組織派佢去搵唔見咗嘅組織成員基爾，重潛入杯戶中央醫院去搵佢。雖然佢搵到基爾，但就身份曝光，最後自殺。佢嘅屍體重畀基爾誤導，搞到琴酒以為佢條屍就係赤井秀一嘅屍體，幫咗秀一完成佢嘅計劃。
臥底 編輯
- 基爾（キール Kir）／本堂瑛海／水無怜奈
- 波本（バーボン Bourbon）／降谷零／安室透
- 花名「秘密主義者」。
- 黑麥威士忌（ライ Rye）／赤井秀一／諸星大
- 五年前成功入到黑暗組織，響一年前因為同係FBI特工嘅卡邁爾而身份曝光，被逼假死。
- 蘇格蘭威士忌（スコッチ Scotch）／諸伏景光
- 同波本一樣係日本公安，不過後嚟響身份就嚟曝光嘅時候自殺。
- 司陶特（スタウト Stout）
- 阿夸維特（アクアビット Aquavit）
- 雷司令（リースリング Riesling）／利昂‧布赫茲（レオン・ブッフホルツ Leon Buchholz）
- X.Y.Z.雞尾酒
- 係由某個集團派過嚟黑暗組織做臥底，目的係為咗走私啲槍。後嚟佢嘅身份曝光，畀琴酒連人帶車一齊炸死。
反水失敗嘅成員 編輯
- 宮野明美（宮野 明美／みやの あけみ Miyano Akemi）
- 配音：勝生真沙子／玉川砂記子（日本）；許淑嬪／陶敏嫺／陳玲燕／魏晶琦／傅其慧（台灣）；沈小蘭（香港）
- 黑暗組織女低層員工，志保嘅家姐，大志保四至五歲左右。因為冇志保咁醒目，所以響組織嘅地位低過佢。用假名廣田雅美（広田 雅美／ひろた まさみ Hirota Masami）響銀行做嘢同埋掩飾身份，後嚟畀FBI特工赤井秀一（嗰時佢用假名諸星大）利用明美對佢嘅感情，響黑暗組織做臥底。雖然明美知道秀一係臥底，重一直響同呃佢嘅感情，但係就一直都冇拆穿佢，又都冇同任何人提起過。直至到秀一響佢面前自爆係臥底，令到明美決定要離開黑暗組織，徹底反水，目的就為咗同秀一永遠喺埋一齊。琴酒為咗唔畀佢走，就叫佢同銀行打劫十億返嚟，話如果明美成功搞掂爾單嘢，佢唔單止會放明美走，重會放埋志保。點知明美信以為真，重真係搞得掂，所以一向無口齒嘅琴酒就一槍殺死咗佢。
- 因為佢喺唯一一個響志保身邊嘅屋企人，所以佢嘅死對志保打撃好大。佢走咗之後，志保跟住就徹底反水。而秀一就出於對佢嘅罪惡感，到依家都重未放得低明美。
- 庫拉索（キュラソー Curacao）
- 配音：天海祐希（日本）；傅其慧（台灣）
- 黑暗組織女骨幹，蘭姆嘅左右手，有虹膜異色症。因為記憶力好強，所以記得所有關於黑暗組織嘅衰嘢。本身苦艾酒係想殺咗佢，點知佢畀蘭姆睇起，所以蘭姆將佢留響自己身邊，做自己嘅左右手。
- 後嚟佢入侵警察廳資料庫，攞到咗「NOC List」（非官方臥底名單），知道咗基爾、波本、黑麥威士忌同埋其他臥底嘅真正身份，但就響試圖將資料交畀蘭姆嘅時候畀波本同黑麥威士忌睇穿，響畀佢哋追殺嘅時候突然失憶。失憶期間，佢遇到元太、步美、小哀同埋光彥，受到佢哋嘅影響，庫拉索決定徹底反水。響恢復記憶之後努力咁想離開組織，但就受到組織犀利嘅攻撃。最後為咗保護小哀而畀跌落嚟嘅摩天輪壓死。
反水成功嘅成員 編輯
- 雪莉（シェリー Sherry）／宮野志保（宮野 志保／みやの しほ Miyano Shiho）
- APTX4869嘅核心研發人員，佢反水之後組織嘅藥物研發就突然之間停咗，對組織嘅影響都幾大。