開主選單

呂麗紅Lui Lai Hong),外號「神奇呂俠」,香港教育界人士,因為以全香港人工最低校長,成功挽救元朗錦田元岡幼稚園避免殺校危機,成為香港傳奇人物。佢嘅故事改編成電影《五個小孩的校長》,由楊千嬅飾演佢嘅角色。

生平

呂麗紅出身於香港基層家庭,中學畢業後投身幼兒教育工作,之後半工讀修讀幼兒教育文憑,2007年攞到教育學位。原本擔任愉景灣國際幼稚園主任,2008年因為身體欠佳而提早退休,計劃同老公環遊世界[1]

2009年因為佢喺報紙度睇到元朗錦田只剩返五個學生嘅元岡幼稚園,以全香港港最低人工4500蚊招聘校長,若果無人接手做校長呢間幼稚園就要執笠[2]。呂麗紅決定打消退休念頭,應徵全香港最低人工校長,故事俾報紙同無綫電視節目《星期二檔案》報道[3],佢嘅故事喺香港廣泛流傳,喺香港社會引起極大嘅迴響,各界紛紛捐錢畀元岡幼稚園,並且有義工隊幫元岡幼稚園進行翻新。

呂麗紅唔單止成功挽救幼稚園避免殺校,五年間學生人數更由五個變成六十四個,連大學講師都將囝囡送去呢間幼稚園讀書。佢將國際學校推崇嘅「蒙特梭利教學法」搬到元岡幼稚園,著重啟發細路嘅五官感覺,喺教育界贏得口碑[4]

參考

  1. "最低薪校長呂麗紅 熱血救校". (原先內容喺2015年4月2號歸檔). 喺2015年4月6號搵到. 
  2. 熱心人捐助 可聘一教師一清潔工 超低薪校長終獲好幫手《蘋果日報》
  3. "最低薪校長". (原先內容喺2015年3月21號歸檔). 喺2015年4月5號搵到. 
  4. 《五個小孩的校長》真人版 呂麗紅擁抱64學生 互聯網檔案館歸檔,歸檔日期2015年5月16號,.《晴報》