愉景灣
想搵第啲英文名叫「Discovery Bay」嘅地方嘅話，請睇發現灣。愉景灣（英文：Discovery Bay），係香港大嶼山東北部一個灣，同時係一個低密度住宅區。個灣正名叫大白灣（或者就咁叫大白），成個愉景灣住宅區就夾埋隔籬二白灣（二白）、三白灣（三白）同埋四白灣（四白）。愉景灣同香港島西環差約16千米，同2005年開嘅香港迪士尼樂園差兩千米左右。佢南面就係聖母神樂院。家下有1萬4千幾人住，好多外國人，來自30幾個國，而多數係外國人。行政上愉景灣歸離島區。
歷史 編輯
愉景灣係一間地產公司1970年代後期起嘅，原先設計係喺當地起一個度假屋村，後尾間公司響1970年代金融風暴頂唔住，結果落入香港興業手。愉景灣實在好唔方便（當時只有飛翔船），加上租金又貴，所以後來發展商就將淨低度假屋低價公開發售，變成家下海蜂路、海景路一帶低密度住宅區。後尾發展商響高爾夫球場起兩幢樓，再用「低呎價高級享受」作招徠，吸引一批嚮往外國生活形式嘅人來住，愉景灣就咁變成當時留港外國人主要聚居地。隨住政府1990年代搞香港機場核心計劃，愉景灣居住人數大增。發展商就係咁開拓新地，重起埋配套基建，好似去竹篙灣嘅愉景灣隧道，就響2000年5月27號通車，係香港第一條由發展商自己畀錢起嘅行車隧道。家下愉景灣重係發展緊。
2004年，香港政府審計署寫咗份報告，話愉景灣響1977年起嗰時，個發展商香港興業修改過發展大綱，將原本渡假用途改為住宅用途。
生活 編輯
愉景灣基礎建設差唔多全部係由香港興業發展同管理，好似路、社區設施、水電、燃料等等。政府設施只有消防局、郵局同一間公立學校。
設施 編輯
愉景灣有唔少設施，好似人造沙灘，四個會所（哥爾夫球會、遊艇會、康樂會、海澄湖畔住客會所），其他設施重包括網球場、壁球場、桌球室、泳池、健身室、桑拿同埋蒸汽浴室等。
交通 編輯
交通有船有巴士。愉景灣交通服務有限公司喺愉景灣經營十幾條全日嘅區內巴士線，另外有巴士去東涌站、香港國際機場同欣澳站。愉景灣航運服務有限公司就全日經營來回愉景灣同中環嘅小輪。哥爾夫球會同遊艇會都有自己嘅巴士，亦有其他車可以租。