和你唱

  提示：呢篇文講嘅唔係我想和你唱。

和你唱，早期亦叫商場大合唱，係香港反逃犯條例修訂運動入面一系列示威活動，參加者聚集喺大型商場嘅中庭位置，一齊唱反修例歌曲同埋嗌反修例口號。皆因商場係私人管理嘅公共空間，差人衝入去干涉活動嘅機會比較低，比較容易吸引到和理非人士參加。

2019年9月11號沙田新城市廣場大合唱

沿革

2019年9月頭，反修例運動歌曲《願榮光歸香港》廣泛流傳，有活動搞手就諗到用大合唱去表達訴求。頭一次商場大合唱喺9月9號喺太古城中心出現，9月10號就有頭一次多區商場大合唱，包括新港城中心、大埔超級城、新都會廣場、上水廣場、PopCorn、黃大仙中心、屯門市廣場同新世紀廣場，之後9月之內亦有多場商場大合唱，到10月打後呢類活動就比較少出現。

2020年初香港爆發武漢肺炎疫情，反修例運動嘅遊行集會活動都停咗一段長時間。隨住疫情紓緩，4月底開始又重新出現「和你唱」嘅活動，打頭陣係4月26號「太古城和你唱」，之後國際金融中心商場同天水圍銀座商場，甚至乎沙田新城市廣場都有同類活動。不過唔似得上一年活動好少畀警方干涉，今次警方以參加者涉嫌違反（應對武漢肺炎疫情嘅）「限聚令」做理由，衝入商場警告參加者，亦有進行票控。

歌單

和你唱活動入面，一定會唱《願榮光歸香港》 。其他經常唱嘅歌包括 《Do You Hear the People Sing?》（或者粵語版《問誰未發聲》）、《肥媽有話兒》等等。