商衍鎏

商衍鎏（粵拼：soeng1 jin2 lau4；1875年1月11號—1963年8月28號），字藻亭，號又章、冕臣、康樂老人。廣州駐防正白旗漢軍人，祖家係天津，明末遷遼寧瀋陽，後尾入咗旗籍，民國改籍廣東番禺，祖居地宜家歸屬廣州市花都區。渠係清代最尾一個探花。試過做中央文史研究館嘅副館長。

商衍鎏
出生日	1875年1月11號
出生地	廣州
死亡日	1963年8月28號  （88歲）
死亡地	廣州
國籍	大清、中華民國、中華人民共和國
識嘅語言	文言文、早期官話
學位	探花、進士
母校	Q97447129、Xuehaitang、Q97602932、法政大學
職業	史學家、藝術家
仔女	Chengzuo Shang
兄弟姊妹	Shang Yen-ying
[改維基數據]

生平

細個陣喺廣東省城紙行街（今紙行路）蓮花巷玉蓮園讀書，後考入府立羊城書院正課外生，後尾轉校廣中路嘅越華書院同越秀山嘅應元書院讀書。1890年得到咗童試第十名中秀才。

末代探花

喺光緒二十年（1894年）鄉試，同大佬商衍瀛一齊中舉人，時有禺山雙鳳嘅稱號。先後去咗廣州光孝寺西華堂、學海堂、菊坡精舍、應元書院等校讀書。光緒三十年（1904年），喺最尾一輪科舉考試度考到探花。由於當時嘅榜眼同埋探花都係廣東人，北京嘅粵東會館專登慶賀咗一番。喺完咗「騎馬游金街」啲儀式，榜眼朱汝珍、探花商衍鎏送咗狀元劉春霖返直隸會館，再一齊返粵東會館，會館就預好演戲宴客，粵籍京官都有到場。宴會辦得好墟冚，宴後啲用過嘅碟碗杯筷仲畀啲民眾搶走曬。

遊學海外

光緒三十二年到三十四年（1906—1908年），公派留學日本東京法政大學，專攻經濟同法律。返華後先後做過翰林侍講銜撰文、國史館協修、實錄館總校官、幫提調等。

民國元年（1912年），受德國漢堡殖民學院（舊譯：殖民學堂。殖民學院喺1908年4月成立）東亞系（Ostasiatischen Seminar）聘任，擔任德國著名漢學家奧托·福蘭閣（Otto Franke）嘅研究助理（wissenschaftlicher hilfsarbeiter）。1914年殖民學院成立咗中國語言與文學系（Seminar für Sprache und Kultur Chinas）後，轉入咗呢度工作，期間幫學校訂購咗唔少中文書籍，參與建立咗德國第一間漢學研究中心，第一次世界大戰爆發後，1917年隨駐德使館人員撤返去中國。

返華仕途

返華開初，做過北京副總統府顧問、江蘇督軍署內秘書、大總統府諮議、江西省財政特派員等。

1946年影低嘅商衍鎏

民國十六年（1927年）做咗國民政府財政部秘書，同年辭職。

民國二十六年（1937年）抗日戰爭爆發後，由南京輾轉入川。

民國三十四年（1945年）光復後，到南京，後赴北平、廣州、澳門同香港等地。

共和國後

中華人民共和國成立後，做過江蘇省文史館副館長、江蘇省政協委員，同大仔商承祖住埋一齊。1956年11月，中央新聞紀錄電影製片廠同渠專登整咗個紀錄片《探花晚年》。

1956年12月返到廣州定居，做過廣東省政協常委、廣東省文史研究館副館長，同細仔商承祚住喺中山大學東北區9號。

1960年7月，國務院總理周恩來聘渠做中央文史研究館副館長。

據蔡國頌先生回憶，晚年嘅商中意到仰忠街天馬巷友人屋企聚會。呢個雅集除商衍鎏商承祚兩仔爺，仲有冼玉清教授、容庚教授等。大家都尊稱商衍鎏做商老太爺。

1963年8月28日喺廣州過身，享壽88歲。

寫嘅書

• 《清代科舉考試述錄》，1958年，三聯書店出版。
  • 《清代科舉考試述錄及有關著作》，2004年，百花文藝出版社，ISBN 9787530638163
• 《太平天國科舉考試紀略》，1961年，中華書局出版。
• 《商衍鎏詩書畫集》，1962年，自費，香港商務印書館影印出版。
  • 《商衍鎏詩書畫集》，2008年，文物出版社，ISBN 9787501024148
• 《商衍鎏商承祚書正氣歌》，2004年，文物出版社，ISBN 9787501016723

劉春霖、朱汝珍、商衍鎏、張啟後楷書四條屏，宜家由深圳博物館收藏

家族

• 老竇商廷煥（1840－1887），係著名學者陳澧嘅徒弟，一世未有考中過。
• 阿叔商廷修，光緒二十四年（1898年），光緒戊戌科二甲進士130名。
• 大佬商衍瀛（1870－1960），清光緒進士，書法家，跟過溥儀到滿洲國。因兩兄弟都高中進士，畀稱為禺山雙鳳。
• 大仔商承祖，翻譯家，識德語，南京大學教授。
• 細仔商承祚，古文字學家，中山大學教授。