皇帝件新衫

《皇帝件新衫》（粵音：wong4 dai3 gin6 san1 saam1）係由丹麥作家安徒生寫嘅童話故仔。個故仔嘅情節講到有兩個騙子答應幫皇帝做一套新衫，話套衫「只有啲稱職、唔蠢、唔無能嘅人先至睇得見」，而皇帝就真係聽咗佢哋噏，「着住佢件新衫」出巡，在場個個人望住皇帝一絲不掛噉但冇人敢出聲，直到有個細路見到皇帝全裸噉，就大聲叫：「皇帝佢乜都冇着呀！」

騙子：親愛嘅皇帝陛下，等我哋嚟為你編織一件無衫能比嘅絕頂龍袍！

《皇帝件新衫》係喺1837年4月7號面世嘅，C. A. Reitzel 喺哥本哈根出嘅《講畀細路聽嘅故仔》一書嘅第三集之中收錄咗個故仔同埋《人魚公主》。呢個故事打後大受歡迎，有畀人繙譯成一佰幾種語言同文字。到咗廿一世紀初，個故仔已經係家傳戶曉，基於呢個故仔嘅音樂劇、動畫、電影、已至改編，多到數唔曬。

嗌法

《皇帝件新衫》呢個故仔喺各種語言入面個名如下：

• 丹麥文：Kejserens nye Klæder
• 英文：The Emperor's New Clothes
• 法文：Les Habits neufs de l'empereur
• 德文：Des Kaisers neue Kleider
• 日本話：Hadaka no ousama，通常會用漢字加假名寫做裸の王様，意思係冇著衫嘅皇帝噉解。
• 語體中文：國王的新衣、皇帝的新裝
  • 標官：guó wáng de xīn yī、huáng dì de xīn zhuāng
• 粵化譯名：皇帝件新衫
  • 粵音：wong4 dai3 gin6 san1 saam1

情節

原著《皇帝件新衫》嘅情節，大致如下。

皇帝愛靚衫

好耐好耐以前有個皇帝，佢好中意衫，成日都會揮金買新衫，買完就做蘇噉四圍去畀人睇。

有一日，有兩個流氓扮成梭織師嚟到首都。佢哋揚言話自己咩都織到，仲聲稱話自己有隻獨門梭織技巧，能夠織出無能同蠢嘅人睇唔到嘅衫。

兩位流氓講嘅嘢，話咁快就傳到去皇帝嘅耳度。皇帝聽到就諗：

「咁犀利？無能同蠢嘅人睇唔到？噉我都想要返件喇，有咗我就知我啲大臣邊個唔夠料。」

於是皇帝就出大筆錢，請兩位「梭織大師」嚟皇宮做嘢。

呢幅插畫描繪兩個騙子，佢哋四圍去招搖撞騙。 呢幅插畫描繪兩個騙子，佢哋四圍去招搖撞騙。

齊齊講大話

兩位「大師」要求皇帝提供最細緻嘅絲綢同埋最純淨嘅金絲（實際上兩個人將呢啲值錢嘢袋doi6晒落袋），然後就「開工」。同時件事傳咗去皇宮外面，全首都上下都喺度期待兩位「大師」嘅作品。

「仲未搞掂呀？我好想知我隔離屋嗰個人係咪蠢材喎。」

皇帝都好心急，就派咗個老忠臣去睇吓兩位「大師」搞掂未。老忠臣去咗，見到「大師」間房空寥寥噉。「大師」就開口：

「呀，埋嚟睇睇件衫嘅啲di6嘥好唔好？」

老忠臣咩都見唔到，就開始驚：

「唔通... 我無能同蠢，所以見唔到件衫？」

於是佢就講大話，盛讚兩位「大師」手藝好。然後兩位「大師」仲開始向老忠臣描述件衫有咩顏色同花臣。老忠臣將聽到嘅嘢冚唪唥背起晒，一返到皇帝嗰度就將聽到嘅嘢照樣背返晒出嚟。皇帝打後又再派咗幾位大臣去「睇吓件衫織好未」，每次都係發生同樣嘅事—大臣乜都見唔到，唔想認自己無能同蠢，於是就扮見到件衫，返到皇帝嗰邊就將「大師」對件衫嘅描述背返畀皇帝聽。過咗冇耐，全城上下都喺度討論件衫係幾咁靚，講到件衫好似係天上有地下無噉。

有一日，皇帝好想親自睇吓件衫，就帶住幾位對佢忠心嘅大臣去見「大師」，呢幾位大臣當中有兩位之前「見過件衫」。一到步，「見過件衫」嗰兩位大臣就開聲，大讚件衫嘅啲di6嘥幾出色，諗住佢哋身邊嘅人都會見到。皇帝咩都見唔到。

「死喇。如果我認我見唔到件衫，咪等如公開我係個無能同蠢嘅人？」

於是皇帝就決定要扮見到件衫：

「噢，件衫真係好... 華麗。」

佢一路讚一路用力望，用力到對眼有啲痛，依然係咩衫都見唔到。在場嘅人聽到皇帝所言，個個都跟住應聲：

「好華麗呀！」

「好迷人呀！」

「兩位大師手藝真係勁！」

皇帝跟住提出封兩位「大師」做騎士，賜外號為「梭織紳士」。

新衫整好咗

當晚，兩位「大師」扮到好似連夜趕工噉，最後大聲宣佈：

「件新衫織好喇！」

皇帝帶住全宮廷上下嚟見兩位「大師」。兩位「大師」用手捉住空氣，扮到好似拎住件衫噉，仲對件衫作出繪色繪影嘅描述。在場嘅人乜都見唔到，但個個都開口讚。

「親愛嘅皇帝陛下，快啲試吓件衫吖！」

皇帝騎虎難下，於是就除晒身上嘅衫「著起件新衫」，仲要企喺塊鏡前面扮到好似喺度欣賞自己件衫噉。

「陛下著得真係好睇！好啱身呀！」

「我建議陛下去巡遊畀大家欣賞！」

冇人夠膽指出，皇帝查實係處於一絲不掛嘅狀態。

如是者，皇帝就帶住班大臣同守衛，去首都嘅大街出巡。啲市民之前聽過有關件衫嘅傳言，知件衫係「無能同蠢嘅人見唔到嘅」，個個都開口讚件衫好睇。

呢幅插畫描繪皇帝「着住件新衫」出巡（實際上除咗底衫之外咩都冇著）。幅畫係由偉咸·柏達臣畫嘅。柏達臣係安徒生嘅第一個插畫家。 呢幅插畫描繪皇帝「着住件新衫」出巡（實際上除咗底衫之外咩都冇著）。幅畫係由偉咸·柏達臣畫嘅。柏達臣係安徒生嘅第一個插畫家。

點知皇帝佢哋行行吓，有個好細個嘅細路見到。個細路諗都唔諗就講：

「但係皇帝陛下剝晒光豬喎！」

啲人聽到，就慢慢開始跟住講，傳傳吓，全城嘅人都喺度講：

「皇帝陛下剝晒光豬喎！」

而皇帝以及佢嗰班大臣同守衛就繼續行，扮到好似皇帝著住件靚衫噉。

完。

影響

2016 年愛沙尼亞一地嘅一幅街頭塗鴉；幅塗鴉描繪一個國王唔著衫行嚟行去。

到咗廿一世紀初，《皇帝件新衫》呢個故仔可以話係家傳戶曉，多次畀人改編做第啲媒體嘅作品。

除此之外，《皇帝件新衫》仲對現代嘅西洋語言產生咗影響，例如廿一世紀初嘅英文就有 emperor's new clothes（皇帝件新衫噉解）呢句慣用語，意思係話啲人自欺欺人噉嘅意思，例句：

We have been too willing to accept that the emperor had new clothes.

粵文直譯：「我哋一路太過願意接受皇帝係有件新衫」，句嘢係暗指「我哋一路太過自己呃自己」。

睇

• 安徒生童話
• 《美人魚》
• 《皇帝件新衫》（The Emperor's New Clothes）英文版 （英文）
• Bartleby.com 英文版《皇帝件新衫》 （英文）
• 文學 / 皇帝件新衫 （英文），電視橋段網講呢個故仔。
• 【偽動畫故事】國王的新衣 | 保持初心，不要盲目跟隨虛偽的世界，用粵語講《皇帝件新衫》，夾雜咗啲似標準官話嘅用語。佢個結局同原版有少少出入，例如原版故仔入面皇帝並冇同個細路講嘢，更加冇話想改過自新。