基綫 (排版)

基綫（英文：baseline），喺英文書法、排版、平面設計同字型設計，係指排版或者寫字嘅時候，撇除下降筆劃，字形底部概念上應該貼住嘅一條綫。基綫喺寫書法嘅時候可以畫出來，作為打稿用嘅一種架生，排版或者做字型設計嗰陣亦都可以顯示出來，但係喺其他情況基本上只係概念上存在。喺排版同平面設計，基綫同基綫之間嘅距離叫行距。

基綫

原則上，唔同書寫系統用嘅基綫可以唔同高度，咁嘅做法喺書法可以行得通，但係電腦排版同數碼字型設計用嘅基綫都係用羅馬字母嘅基綫作為標準，所以中日韓書寫系統入面嘅字形都放咗喺基線以下，唔係嘅話，如果版面同時有中文同英文，排出來就會好唔協調，亦即係話喺電腦嘅角度，漢字、假名、諺文通通都有下降筆劃，雖然其實佢哋根本通通都冇。