堅 (經歷司)

堅 （William Caine；1799年—1871年，全名音譯威廉 堅），係香港開埠官員。因爲香港草創之初，制度尚未完備，堅一身多職。計有軍官、裁判官、差役總長、監獄總長，亦係接手經歷司，亦一度做署理港督，歷時18年。香港島半山嘅堅道同堅巷，就以佢爲名。

堅之玉照

堅當時係芸芸英人之中，最爲在港唐人悉知。

生平

堅1798年喺英倫出世，幼年帶去印度，喺軍隊大，初時負責執頭執尾。1859年退休去英國，1871年死。

職

堅入英軍，本來係第卌一團嘅人，卌一團係步兵團，期時駐印度一帶。佢職至今日叫嘅上尉。1833年10月27號，佢同派禮士（Richard Price）對掉，轉咗去廿六團。第廿六團，同係步兵團，亦名金馬倫（Cameronian），期時亦駐印度。喺鴉片戰爭之時，個團派咗去同大清打仗，而堅其時係一團之首，之後移到香港。

1839年，大英同大清開始鴉片戰爭。英軍佔領舟山。堅上任做，今日叫嘅首席裁判官（Chief Magistrate），有如大清縣長。

1841年1月26號，英國人按穿鼻草約登陸香港島之水坑口，當時大清同英國都未有確認，直至1842年《江寧條約》始定。之不過英國人照開埠，籌組政府，當時香港之首係義律，因爲堅喺有舟山經驗，識治理唐人，就係理想人選。堅答應留港上任。1841年4月30號，佢任爲香港政府首位裁判官，三年後，1844年，立香港差役。有犯人就要有監獄，佢立監獄，又係監獄之長。

1846年，堅升至經歷司，兼任核數司，成香港總督副手。一八五四年，就只做經歷司。一八五九年九月，堅離任，經歷司之位，由前港督爹核士之姨甥，麥接手。

軍隊方面，1851年11月11號，其軍階由今日叫嘅少校，升做今日叫嘅中校，半薪，仍然唔屬任何軍團。

堅長年留喺香港，比英廷任命嘅香港總督重要耐。除咗開埠之首，英國駐華商務大臣義律之外，亦事首幾任總督，計有砵甸乍、爹核士、般含、寶寧、羅士敏。1859年5月寶寧離任，不在港，堅就做署理香港總督，總理香港事宜，直至1859年9月，羅士敏接任港督。1859年9月28號，堅退休。

堅集司法同行政於一身，所以得罪佢無好結果。泰倫（William Tarrant）係當時香港公務員，其人正直，向上司舉報，堅嘅買辨，以堅之名貪污，結果無得做公務員。佢不服，搞《華友西報》，時時批評堅不是，到最後，喺堅退休離港前一日，爆佢大鑊。結果堅延遲離港告佢，賣起所有狀師，等佢自己出庭答辯，因而下囚同罰款。