水坑口seoi2haang1hau2,以前係香港島北岸嘅海角,上環西環之間。英人叫爾度做屬領角Possession Point),音譯波些臣角。按地名定義,水坑口同屬領角,係有分別。屬領角原係海邊一角,而角上係山仔。東邊有條坑,集谷地山水,流入海。入海之處,叫水坑口。該地舊時唐人聚成市,叫大笪地

一八四五年,水坑口地圖
一九三零年嘅港島水坑口及歷史圖片
水坑口街,以前嘅水坑口

1980年代之前嘅地圖將荷李活道公園嗰頭當係水坑口,但起喺水坑上面,駁去荷李活道公園一帶大笪地嘅水坑口街先至係英軍登陸嘅實際位置。

歷史 編輯

水坑口喺英國統治之前,係一無所知。要計都只同裙帶路有啦𠹌。英國船,早喺香港島同九龍半島之間水域,作爲避風之港。

1840年到1842年英國大清第一次鴉片戰爭時,英軍測量船名修路化途經香港,測量附近水域同地方。認爲香港島北岸西面,有塊突出高地,平坦近海,軍旅紮得營,此處就係日後屬領角。

一八四一年一月廿號,英國義律,同大清琦善,簽訂《穿鼻草約》。英軍準備登陸香港島,揀咗海角做登陸同宣佈地點。按當時泰西各國通例,要有儀式,方爲正式擁有主權,而升旗亦係英國慣用儀式。登陸同升旗詳情,記載有兩版本,一說廿五號,卑路乍坐修路化登陸。一說廿六號,伯麥八點十五分升旗。於是乎,有說二合爲一,廿五號係登陸,廿六號升旗。另有說,廿六號同卑路乍誤寫,應該係廿五號伯麥升旗。無論點,英人在此駐紥升旗,宣佈香港爲英國領地。咁所以叫呢度做屬領角,而且叫升旗禮之日為開埠日。卅號發喻畀香港島上村民,宣佈英治原則。

英人得香港島後,開埠時開皇后大道,兜過屬領角。直到一八四五年,水坑口一帶,係域多厘城市區西邊鄙,當時水坑仍在,而荷李活道尾,就係家下水坑口街。開埠早期無水塘,只靠山水同井水。由於水坑口地近太平山,唐人聚居處,居民都會喺處攞水。

英軍喺屬領角,開有兵房。但後尾兵房拆咗。一直開畀公眾,或大笪地,或係公園咁。

一八五二年,香港總督文咸填海,是爲文咸填海計劃。水坑口又好,屬領角又好,都唔再近岸。