天后誕
天后誕，或者寫做天后𧩙、天后旦，又叫天后寶誕、馬祖誕、天后娘娘聖誕等，係天后嘅寶誕。嚮三月廿三舉行[1]。天后誕係唔少唐人地方嘅大節，尤其係靠海為生嘅人，例如水上人咁。
祝誕
編輯南粵
編輯民間信奉天后係護海女神，漁民同疍家人信得最多，沿海沿江因而有唔少天后宮。每年三月二十三日係天后誕，各地有祭祀活動。如三水縣西南鎮及汕頭等地嘅天后廟，舊時每隔三、五年都會打醮、擺會。共和國後逐漸被廢，但重有唔少人去參拜。汕頭市信眾呢日多會炒麵條，買埋啲鹵鵝肉。南澳島嘅漁民崇奉媽祖，呢日家家戶戶就會做媽生，唔出海，聚埋廟前睇大戲。
廣州
編輯舊俗廣州疍家人係會過呢個大節，村入邊有天后廟嘅都會打醮慶賀[2]。舊日河南（海珠區）沙園一帶最墟冚，迎神出遊時好鬼多人。呢個鄉雖冇天后廟，但有天后像。每年誕前必求神問杯，占卜到邊個街就送神像去渠度嘅公所或祠堂供奉。誕日一迎一送，各街都會出儀仗、樂手，或舞獅舞龍，去各村度巡行。各村當其時會喺村口、祠堂備好祭品迎神駕。各家亦會擺埋香花祭品，等到天后像經過陣就燒爆竹。一連三日做神功戲，訪客亦住埋三日，慶賀一番。
香港
編輯天后誕一般慶祝程序由天后誕嘅前夕開始，嚮傍晚開始還神、還花炮；子時過後各村村代表會嚮天后廟上頭炷香、拜神，然後有一啲儀式好似『喊禮』、『讀祝文』等。喺天后誕正日，各花炮會龍獅隊同表演團體喺天后廟前面集合。喺慶祝表演完後，龍獅隊會繼續去天后廟參神。最後，舉行隆重嘅抽炮儀式。
由於香港以前係漁村，而相傳天后會保佑他們海上平安，所以天后係香港同南中國沿岸省份常見供奉嘅神靈。每年天后寶誕都有好多善男信女匯集到各個天后廟慶祝。香港至今最少有40座天后廟，當中最古老嘅就係建於公元1266年嘅天后廟有西貢嘅佛堂門大廟。每年嘅天后誕會有多至5萬名信眾參拜，有啲賀誕人士會喺帆船同駁船上掛滿色彩繽紛嘅旗幟。元朗嘅大樹下天后廟又係好出名嘅，每年元朗嘅漁民團體、體育會、宗親會等會派出飄色、樂手同其他表演者參加會景巡遊至天后廟。
嚮天后誕慶典眾多嘅傳統活動中，「抽花炮」可算係最有特色。香港掌故家蕭國健博士表示，一般花炮共設三十座，當中「第三炮」除咗象徵「丁財兩旺」，重據講係最靈嘅一個，所以有「炮王」稱號。另外，據講以往曾有兩名村代表同時搶到「第一炮」，後來為咗平息風波，特設「第一壹炮」作為抽用，而「第一炮」就成為鎮壇副炮。
天后誕時，村民除咗舞龍舞獅、朝拜天后、出會、巡遊外，還舉行盛大嘅盆菜宴。盆菜係香港獨特嘅傳統菜式。傳統盆菜以木盆盛載，材料就一層疊一層嘅排放。不過，為咗可以食到熱騰騰嘅盆菜，現今盛載嘅器皿都以銅盆同梓盆代替笨重嘅木盆。