安心偷食事件

(由安心偷食跳轉過嚟)
  提示:呢篇文講嘅唔係安心出行

安心偷食事件(簡稱:安心事件)係香港藝人黃心穎許志安被揭發喺的士車廂內出現不當親密行為嘅舉動,呢件事件引起咗香港傳媒嘅廣泛報導。

記者會錄影片段

香港《蘋果日報》2019年4月16號下晝喺網頁入面揭露有關黃心穎同許志安做咗一啲親密行為同消息,包括一段長約16分鐘嘅的士車廂影片。

當事人嘅反應 編輯

許志安 編輯

事件曝光之後許志安喺同日夜晚七點舉行記者會,表示當晚因為多人食飯,過後因為醉而出現呢個舉動,又因為酒醉起色心而未有迴避,對呢件事感到極之後悔。佢亦宣佈暫停手頭所有工作。

黃心穎 編輯

 
香港有眼鏡舖因應「反對黃心穎浪潮」,用紙張遮住黃心穎喺賣con廣告中嘅肖像。

黃心穎喺事後打電話搵無綫電視助理總經理樂易玲,話好後悔自己嘅行為,喺第二日喺社交平台帳戶貼文講聲對唔住。佢認自己做咗一件非常錯誤同埋難以令人原諒嘅事,所以好羞愧同埋內疚,仲向所有受事件影響同埋受到傷害嘅人講聲對唔住。佢話犯咗咁嚴重嘅過錯,實在無辦法面對自己、屋企人、男朋友馬國明、朋友、公司同埋電視台同事。佢希望外界能畀所有受牽連嘅人一啲空間,仲承諾將認真反省自己嘅過失,亦會接受懲罰同埋承擔後果[1][2][3]。之後黃心穎去咗美國,一路都無公開露面。

馬國明同佢屋企人 編輯

喺影片曝光當日下晝,無綫電視等等嘅傳媒到馬國明喺太古城嘅屋企樓下問佢阿媽,佢阿媽話唔知呢件事。傳媒俾佢阿媽睇番嗰段片之後,佢更加話呢個情節同埋畫面似做戲。之後馬國明喺佢阿媽訪訪下問打電話嚟,叫佢唔好答傳媒嘢[4]。佢阿媽重話對黃心穎印象普通,重透露出門前仍然睇到個仔喺屋企睇波,話佢之後會開工[5]

事發之後第二日,馬國明按原定日程由屋企出嚟,去電視城拍戲嗰陣,被記者問到呢件事,佢話暫時無嘢講,但化妝之後就同記者交講詳情[6]。佢之後喺電視城現身接受訪問時講,自己喺知道事件之後,好快就無嬲嘅感覺,又擔心再有其他人受傷害。佢知道女友黃心穎知錯,仲已經喺網上社交平台交代,但電視台擔心佢嘅情緒不穩而未有畀佢公開露面,所以佢希望外界可以俾空間等黃心穎休息。佢話佢自己就會如常專心做嘢,唔希望因為呢件事而影響拍戲嘅進度,亦唔會評論許志安同埋自己阿媽嘅回應[7]。就傳媒喺事發當日到佢屋企外訪問佢嘅屋企人,馬國明話佢父母唔係娛樂圈嘅人,面對記者追問會唔知點算,希望記者們可以高抬貴手,以免令更多人受傷害,希望可以盡快平息風波[8]

外界嘅影響 編輯

無綫電視 編輯

  • 無綫劇集《堅離地愛堅離地》原本打算安排喺2019年5月播,但因為黃心穎有份做主角,電視台決定暫時抽起唔播[9]
  • 除咗《堅離地愛堅離地》之外,無綫劇集《牛下女高音》、《法證先鋒IV》、《丫鬟大聯盟》都由黃心穎做主角。其中《法》劇搵湯洛雯重拍佢嘅戲份,預計2020年頭播;《牛》劇本嚟安排重拍,但因演員檔期等因素唔成事,後來順延至2019年10月播映,冇明顯刪剪黃心穎戲份。《堅》順延至2019年12 月開播;《丫》就改喺海外翡翠台播映,香港唔播。
  • 無綫劇集《愛·回家之開心速遞》主題曲本嚟係黃心穎主唱嘅《在心中》,電視台喺事件第二日(香港翡翠台播出嘅第558集起,海外版第562起)決定喺香港翡翠台改成純音樂版[10]
  • 無綫旅遊節目《懿想得到》,黃心穎亦有份參與,電視台安排將涉及佢嘅部份刪走,再揾另一位藝員楊明到馬來西亞補拍。
  • 無綫綜藝節目《我愛香港》重播第15集之後(油麻地對深水埗)之後腰斬,改重播《快樂聯盟》。

蘋果日報 編輯

香港《蘋果日報》網站同流動平台喺2019年4月10號改行強制登記制,冇登記就冇得睇,本嚟令讀者數量減少,但佢獨家爆咗呢單新聞後,同日夜晚《蘋果日報》宣佈登記用戶已經過咗220萬[11]

全城熱話 編輯

喺香港Google Trend 統計當中,搜尋「黃心穎」呢個詞語超過100萬次,超出同期發生嘅國際新聞聖母院火燭關鍵詞「巴黎聖母院」接近十倍[12]

的士佬收錢爆料 編輯

有消息講,爆料嘅蘋果日報畀咗拍片嘅的士佬150萬港紙,買起安心喺的士偷食嘅三條片[13]。的士業議會主席熊永達就鬧呢個司機係害群之馬,覺得條片嘅當事人有權索償[14]

疑似陳煒錄音 編輯

事件曝光之後,網上流傳疑似藝人陳煒嘅錄音,話黃心穎拍《東坡家事》嗰陣,主動勾引同佢一齊做戲嘅藝人王浩信,並拖住佢隻手一齊行,仲講一早知道黃心穎係「Wet妹」,遲早同馬國明分手,肯同馬拍拖只係貪馬國明係傻更更。不過,陳煒唔認錄音嘅人係佢;王浩信就話因佢哋喺劇中做兩公婆,先至被同事誤會[15]

私隱問題爭議 編輯

因為相關片段喺的士車廂裏面嘅攝錄鏡頭拍攝,所以的士內嘅乘客私隱亦成為事件嘅熱議焦點。香港個人資料私隱專員公署回應傳媒問到嗰陣咁樣建議:

如果要喺的士裏面裝攝錄系統,一定要貼清晰嘅告示,司機亦應該及時口頭提示乘客,等乘客知道呢架的士裝咗攝錄系統同攝錄系統裝嘅位,同埋乘客可唔可以要求停止被影,等乘客可以揀係唔係搭嗰架的士[16][17]

參考 編輯

  1. 出軌首開腔!黃心穎:我對唔住馬國明
  2. 心偷食心穎IG發165字道歉聲明:我無法面對自己. Apple Daily 蘋果日報. 原著喺2019-04-17歸檔. 喺2019-04-17搵到.
  3. . on.cc東網 (香港中文). 喺2019-04-17搵到.
  4. . 原著喺2019年4月17號歸檔. 喺2019年4月18號搵到.
  5. 對黃心穎印象普通 馬國明母爆阿仔在家睇波
  6. 黃梓恒 (2019-04-17). 心穎許志安國明微笑現身 稍後見記者交代事件. 港01 (香港中文). 喺2019-04-17搵到.
  7. 馬國明回應足本睇片》(TVB娛樂新聞,2019年4月17日)
  8. 馬國明稱心穎知錯 未有回應兩人現時關係》(TVB娛樂新聞,2019年4月17日)
  9. 黃心穎拖累張振朗 《堅離地愛堅離地》抽起改播《婚姻合伙人》
  10. 黃心穎許志安激吻事件形象插水 《開心速遞》主題曲被抽起
  11. 220萬人成功登記 蘋果免費註冊攻略話你知. 原著喺2019年4月17號歸檔. 喺2019年4月17號搵到.
  12. 【安心偷食】藝人偷食吸引過古蹟盡毀 黃心穎Google搜尋破百萬》(晴報,2019年4月17日)
  13. 士佬150萬賣出"許志安偷食"片段!市民:擔心隱私會被侵犯!. 原著喺2019年4月19號歸檔. 喺2019年4月19號搵到.
  14. 熊永達斥涉事司機「害群之馬」 倡強制所有的士裝記錄器保障司機乘客
  15. 疑似陳煒聲帶流出爆心穎是Wet妹溝人夫 王浩信:我諗嗰位同事誤會咗
  16. 件 私隱公署:的士攝錄乘客侵私隱. 原著喺2019年4月18號歸檔. 喺2019年4月18號搵到.
  17. 許志安黃心穎出軌偷食影片流出 私隱專員公署:本質上已屬侵犯私隱