黃浩華
黃浩華（英文：Wong Ho Wa，1987年—）係一個軟件工程師、數據科學家、香港泛民主派政治人，祖籍廣東清遠。佢係 g0vhk（香港零時政府）創辦人、資訊科技界政團 IT Vision 成員。2020年香港立法會選舉，佢代表泛民主派參選資訊科技界功能界別。
| 黃浩華 | |
|---|---|
| 出生日 | 1987年  |
| 母校 | 香港科技大學、TWGHs Kap Yan Directors' College、St. Francis of Assisi's College |
| 職業 | 數據科學家、軟件工程師、政治人 |
| 政黨 | IT Vision |
| 網站 | howawong |
[改維基數據] | |
早年生涯
編輯黃浩華喺公共屋邨長大，中學讀北區嘅東華三院甲寅年總理中學同聖芳濟各書院，喺香港電腦奧林匹克贏過幾次獎[1][2]。佢中學時期經歷2003年反對《基本法廿三條》草案運動，並且參與七一大遊行，佢話呢件事係佢嘅政治啓蒙[3][4]。
佢喺香港科技大學畢業，畢業之後入行做軟件工程師，喺北京做過一年半嘢[5]。2014年，佢搬返香港冇耐就發生雨傘運動，佢決定留喺香港執業，做數據科學家，同時支持社會運動[4]。
提倡開放數據
編輯2016年，黃浩華創立g0vhk（香港零時政府），參考臺灣零時政府運動，建立網上平台同埋資訊科技業界網絡，推動開放數據[4]。2016年香港立法會選舉，佢整咗個 g0vhk 開放政治資訊網站，整合香港立法會議員出席記錄、表決記錄，同埋候選人資料，俾選民喺投票嘅時候參考[6]。同一年年尾，佢加入香港泛民主派資訊科技界政團 IT Vision，參選2016年香港選舉委員會界別分組選舉，喺全票制、業界選民普遍支持民主派之下，IT Vision 名單全員當選[7][8]。
黃浩華認爲推動開放數據有兩個層面，首先係公共機構肯公開啲內容俾人睇，滿足公衆知情權；跟住，公開嘅資訊內容要可以用機器處理，否則左一個 PDF 右一張圖片，就「得個睇字」。佢提倡香港設立《檔案法》，監管公共機構保存檔案同埋公開資訊，因爲既有嘅《公開資料守則》雖然有個機制俾公民索取政府資訊，但冇監管要點畀資訊，亦冇執法權力[4][9]。
佢認爲開放數據需要喺公衆知情權同埋個人私隱之間做好平衡。佢批評香港政府嘅保守態度，成日匿埋喺私隱原則後面唔肯公開資訊，例如警察喺邊度放催淚彈、拉咗幾多人呢啲資料應該要盡快公開，免得傳媒、公衆亂咁猜測[9]。另一方面，佢反對香港政府使用可以影到人樣嘅「智慧燈柱」，因爲就算政府保證唔會用人面辨識，都唔保燈柱影片會唔會洩漏，甚至變成中國社會信用評級系統嘅一部分[10]。2019年反逃犯條例修訂運動期間，有示威者破壞智能燈柱；黃浩華代表資訊科技界出席民間記者會嘅時候提出，噉係因爲示威者質疑智慧燈柱嘅用途，而科技發展嘅前提係互信，如果香港政府唔應承五大訴求，建立唔返政府誠信，講乜科技政策都嘥氣[11][12]。
2019年香港區議會選舉，佢帶領 g0vhk 社羣建立《Vote 4 Hong Kong》（網址、簡稱：Vote4.hk；直譯「投票爲香港」），整理候選人資料，製作投票指南[13][9]。雖然非建制派喺2019年大選由建制派手上贏走大部分區議會嘅主導權，但係黃浩華表示新一屆區議會喺數據開放方面仍然落後，例如好多工程撥款數據好難搵到，有啲財政文件公開咗出嚟竟然係打印完再掃描返嘅紙本文件，令到市民好難監察議會[14]。
2020年武漢肺炎大流行，香港疫情爆發初期抗疫資訊好混亂。黃浩華同 Vote4.hk 拍檔梁逸風、黃漢斌就用兩日時間揼咗個《武漢肺炎民間資訊》網站出嚟，收集確診人數、高危地點、口罩價格等等抗疫資訊俾公衆睇。民間資訊團隊後來擴展到有大概廿個義工，用網絡爬蟲工具配合人手更新，定期更新資訊[15]。黃浩華認爲搞呢個網站最辛苦嘅係，調查黑心口罩同口罩炒家要搵人核實（fact check），需要好多有心義工投入支持[16]。佢又話政府官方網站上載疫症統計數據慢手慢腳，衛生防護中心開完每日記者會之後幾個鐘先更新網站數據，要追得貼最新數據只能夠靠義工人手更新[17]。不過，黃浩華亦讚賞香港政府之前幾年喺開放數據方面一路進步緊，有啲數據已經有得機讀，只不過仍然輸俾上海、臺灣，相比《開放數據指數》嘅標準仍然有唔少改善空間[18][19]。
參選立法會同埋後續事件
編輯2020年7月頭，時任香港立法會資訊科技界議員莫乃光宣佈唔會競逐連任，因爲希望推舉新人接棒[20]。莫乃光接受訪問嘅時候話，佢本來係爲咗應付呢屆立法會選舉政府可能大規模 DQ（取消資格）民主派現任議員，所以要搵定 Plan B（後備），搵下搵下就發現不如俾新人做 Plan A（首選）仲好，所以提名期臨開始先決定唔尋求連任[21]。
7月19號，提名期開始，黃浩華開記者會宣佈，會喺2020年香港立法會選舉參選資訊科技界功能組別。黃浩華表示自己向來追求自由民主，資訊科技界亦最注重資訊自由，而香港國家安全法威脅到香港嘅網絡自由，「中國嘅防火長城已經殺到埋嚟」。佢希望用資訊科技嘅專業技能實踐資訊自由、開放政府、公民參與嘅理念[3][22]。黃浩華參選除咗有莫乃光同 IT Vision 全體支持，仲有「滑鼠娘娘」鄺頌晴、九龍城區議員鄺葆賢醫生等等廿幾人幫佢站台[5][22]。
評論多數將黃浩華歸入泛民主派入面嘅溫和派。佢話會簽選舉事務處嘅《確認書》，確認擁護《香港基本法》。而佢自己就話好難界定自己嘅政治派系，因爲業界嘅光譜好闊[23][22]。
不過，選舉因為第三波疫情延期一年，而佢創辦嘅香港零時政府亦响2021年6月30號摺埋。
參考
編輯- ↑ "Results of HKOI 2004". Hong Kong Olympiad in Informatics (美國英文). 喺2020-07-25搵到.
- ↑ "Results of HKOI 2006". Hong Kong Olympiad in Informatics (美國英文). 喺2020-07-25搵到.
- ↑ 3.0 3.1 〈立法會選舉｜黃浩華宣布參選資訊科技界 稱會簽署確認書 (14:45) - 20200719 - 港聞〉。《明報新聞》 (繁體中文)。2020-07-19。喺2020-07-25搵到。
{{cite web}}: CS1 maint: url-status (link) - ↑ 4.0 4.1 4.2 4.3 鄭祉愉 (2016-09-17)。〈檔案法 民間 VS 政府資訊戰〉。《明報周刊》: 054–085。
- ↑ 5.0 5.1 〈黃浩華競逐IT界 關兆倫出戰建測〉。《香港蘋果日報》 (香港中文)。2020-07-20。原著喺2020-07-25歸檔。喺2020-07-25搵到。
- ↑ 〈【g0v雙年會特別報導】借鏡臺灣g0v經驗，不管多困難都要堅持開放香港數據〉。iThome (繁體中文)。喺2020-07-25搵到。
- ↑ 〈【選委戰果】業界大團結！民主派全取IT界30席〉。《香港蘋果日報》。2016-12-12。
{{cite news}}: CS1 maint: url-status (link) - ↑ 〈【選委選舉】資訊科技界３０席全由泛民取得，包括單仲偕等人〉。《經濟通》。2016-12-12。
- ↑ 9.0 9.1 9.2 〈未來城市：政府開放數據 公眾更知情？〉 (繁體中文)。明報。2019-10-13。喺2020-07-25搵到。
- ↑ 〈【數碼監控】走訪觀塘解構智慧燈柱 人臉辨識+高清鏡頭監控交通定市民？IT人憂為社會信用系統鋪路〉 (香港中文)。Apple Daily 蘋果日報。2019-08-12。原著喺2020-07-25歸檔。喺2020-07-25搵到。
- ↑ 黃詠榆 (2019-10-17)。〈【民間記者會】林鄭稱部分訴求不符法治 發言人斥不提法治合理性〉 (香港中文)。香港01。喺2020-07-25搵到。
- ↑ 〈民間記招斥未提5訴求 批強推置業斷錯症〉。《明報》。2019-10-18。
{{cite news}}: CS1 maint: url-status (link) - ↑ 〈藥房一周狂加價三成 網站揭炒罩黑店 民間團隊：政府疫情數據不足〉。《香港蘋果日報》。2020-04-11。
{{cite news}}: CS1 maint: url-status (link) - ↑ 〈招標公告公屋輪候數據未開放 業界促改善〉。《明報》。2020-05-15。
- ↑ 〈【IT人●抗疫】無酬自設「武漢肺炎民間資訊」網站 政府開放數據慢又亂要靠人肉更新〉 (香港中文)。Apple Daily 蘋果日報。2020-02-14。原著喺2020-07-25歸檔。喺2020-07-25搵到。
- ↑ 陳嘉慧 (2020-02-01)。〈【武漢肺炎】 民間製自救資訊網站 開發者亦為口罩惆悵〉。《香港01》 (香港中文)。喺2020-07-25搵到。
- ↑ 〈【政府開放數據落後】IT人和義工自製互動網抗疫：官方上載Data應早過張竹君〉 (中文)。眾新聞。2020-05-02。原著喺2020-07-25歸檔。喺2020-07-25搵到。
- ↑ 〈香港開放數據進展欠佳〉。《信報》。2020-05-15。
- ↑ 歐陽德浩 (2020-05-14)。〈香港開放數據發展落後 協會籲借鑑上海設公眾平台〉 (香港中文)。香港01。喺2020-07-25搵到。
- ↑ 〈「個人決定」 莫乃光不爭連任 稱發現更有能力年輕人 「非和某大佬傾好」〉 (繁體中文)。明報。2020-07-16。喺2020-07-25搵到。
- ↑ 〈莫乃光不連任：搵Plan B時發現佢地做Plan A仲好〉。香港獨立媒體網。2020-07-16。喺2020-07-25搵到。
- ↑ 22.0 22.1 22.2 〈立法會選舉｜黃浩華宣布參選資訊科技界 稱會簽署確認書〉 (繁體中文)。明報。2020-07-19。喺2020-07-25搵到。
- ↑ Shum, Michael (2020-07-20). "Pan-dem duo get back to basics in Legco race". The Standard (Hong Kong). 喺2020-07-25搵到.
{{cite news}}: CS1 maint: url-status (link)