富豪B9TL(Volvo B9TL;富豪巴士官方網頁一度稱之為Volvo Olympian)係瑞典富豪出嘅一款低地台雙層巴士,2002年起生產。佢首先取代富豪超級奧林比安,之後取代埋富豪B7TL

富豪B9TL
Volvo B9TL

香港九龍巴士一架富豪B9TL三軸巴士,配Wright車身

英國一架富豪B9TL兩軸巴士,配東蘭開夏Olympus車身

法國巴黎一架富豪B9TL觀光巴士,配Unvi Urbis 2.5 DD Sightseeing車身
製造廠富豪
邊道出瑞典
取代咗富豪超級奧林比安
富豪B7TL
製造年份2002年—2017年
後繼產品富豪B5TL(兩軸)
富豪B8L(三軸)
主要對手丹尼士三叉戟2型(Enviro 400)
丹尼士Trident E500(Enviro 500)
Optare Olympus
Scania K310UD
Scania N230UD/N270UD
Scania OmniCity
Wright Gemini 2 DL
規格
10.1米—12.8米
2.5米、2.55米
引擎富豪D9A/D9B
波箱Voith DIWA
ZF Ecomat/EcoLife

設計 編輯

富豪B9TL嘅設計同B7TL差唔多,散熱水箱都係擺喺引擎室右邊,有別於超級奧林比安擺喺右邊中間。B9TL喺推出初期只係得三軸版,有可以調校升降嘅前獨立避震,引擎係富豪D9A歐盟三型(最大輸出馬力300匹或340匹),由雷諾貨車設計,容量9.36升。而波箱係Voith DIWA或ZF Ecomat。

2006年開始,B9TL改配富豪D9B歐盟四型/歐盟五型/EEV引擎(最大輸出馬力260匹或310匹),而波箱係Voith DIWA或者新嘅ZF EcoLife。同時B9TL嘅前獨立避震取消咗,另外亦出埋兩軸版,以取代B7TL。

三軸版B9TL可以喺前軸或者全部三條車軸用美國鋁業(Alcoa)車轆。

香港 編輯

九龍巴士 編輯

首架B9TL樣辦巴士喺2003年7月運到香港,用嚟測試九巴嘅「全環保巴士驅動系統」(Eco-driveline)。架車配澳洲Volgren車身,用曲樓梯、富豪D9A引擎(300匹)同埋ZF六前速波箱。巴士喺2004年3月完成首次登記,車隊冧巴係AVD1,同年4月投入服務。初期行西隧巴士線905,其後改行42C及30X線。

AVD1個車牌喺同年12月15號到期之後,12月21號運去澳洲。2005年8月,AVD1帶住一副富豪D9B歐盟四型引擎(310匹)同埋AdBlue缸返香港。巴士喺2006年2月重新登記,5月同同樣配符合歐盟四型環保標準引擎嘅亞歷山大丹尼士Enviro 500一齊投入服務。

2004年初一架配改咗車嘴設計嘅TransBus Enviro 500嘅B9TL樣辦巴士到港(後來成為唯一一架配其他廠商底盤嘅TransBus Enviro系列巴士),同年稍後一架配改咗車尾設計嘅Wright車身嘅B9TL樣辦巴士到港。兩架巴士都係用富豪D9A引擎(300匹)同埋直樓梯,並喺2005年1月完成首次登記,2月8號晚投入服務。

九巴喺2005年初訂購25架Wright車身B9TL巴士,其中兩架係配樣辦車底盤,另外有一架喺英國參加完EFE Showbus 2005先至付運香港。巴士喺同年10月至2006年5月投入服務。

2005年底九巴再訂多88架B9TL巴士,其中38架配Wright車身,另外50架配亞歷山大丹尼士Enviro 500車身。配Wright車身嘅巴士喺2006年6月至11月投入服務,而配亞歷山大丹尼士車身嘅巴士喺2006年11月至2007年7月投入服務,後者嘅其中幾架喺投入服務前裝咗行李架。

2007年中九巴再引入35架配亞歷山大丹尼士Enviro 500車身嘅B9TL巴士,全部喺車尾冷氣槽位有倒車閉路電視。巴士喺2007年8月至2008年3月投入服務。

2009年5月九巴訂購60架配歐盟五型引擎嘅B9TL巴士,全部配Wright Eclipse Gemini 2車身[1],冇耐之後再訂多115架,2010年又再訂多115架。全部共290架喺2010至2012年出。

九巴喺2010年引入1架配Wright Eclipse Gemini 2車身嘅兩軸B9TL巴士,架車喺2010年8月到港,之後因為太重等原因而要做修改,去到同年12月尾至攞牌。

2012年九巴訂多50架配Wright Eclipse Gemini 2車身嘅B9TL巴士,改用同亞歷山大丹尼士Enviro 500MMC一樣嘅方樓梯設計。其中一架喺英國嵌車身,其餘49架嘅車身以散件形式運去珠海嘅廣通客車嵌。批車喺2013年8月至2014年8月出。

其後九巴再訂購60架Wright車身嘅B9TL三軸巴士,車身由廣通客車嵌。頭兩架係全長12.8米嘅樣辦車,但係首架巴士喺第一次做傾側測試時向右翻,整爛咗車窗[2],去到2014年8月至攞到牌並開始路試。另外58架就係12米版,連同其後訂購嘅25架同樣規格、但改由馬來西亞Masdef嵌車身嘅B9TL三軸巴士,喺2014年8月至2015年12月出。

2016年開始,九巴再分五批引入25架、220架、80架同埋24架Wright車身嘅B9TL三軸巴士,全部係12米版,車身繼續由馬來西亞嘅Masdef嵌,2016年11月至2018年8月出,2017年6月之後出嘅巴士,大部分改用新嘅「城市脈搏」車身規格。

2018年9月,九巴引入3架改配順豐客車車身嘅B9TL三軸巴士,都係採用「城市脈搏」車身規格[3]

龍運巴士 編輯

龍運巴士喺2007年中引入10架B9TL巴士,全部配ZF波箱同埋下層有行李架,其中9架係配普通座椅,1架係配客車座椅。巴士喺2007年7月至2008年3月投入服務。

唯一配客車座椅嘅龍運富豪B9TL巴士,喺2016年改用普通座椅。

2020年,由於武漢肺炎國際疫情令往返赤鱲角機場嘅巴士需求減少,龍運其中8架B9TL巴士喺8月被借去九巴,去頂替九巴退役巴士嘅位置,到同年12月8架車都賣嗮畀九巴。

城巴 編輯

城巴喺2010年引入1架配Wright Eclipse Gemini 2車身嘅10.6米兩軸B9TL巴士,架車喺2010年7月尾到港[4],但因為架車太重等原因而要做修改,去到同年11月尾至攞牌,12月中開始載客。

2014年城巴訂咗1架12.8米B9TL三軸巴士同埋30架11.3米B9TL三軸巴士,個Wright Eclipse Gemini 2車身喺馬來西亞由Masdef嵌,12.8米巴士喺2015年3月出,11.3米巴士喺2015年9至12月出。

其後城巴再訂多30架11.3米版B9TL,喺2016年1至5月出。

新世界第一巴士 編輯

2014年新世界第一巴士訂咗20架11.3米B9TL三軸巴士,個Wright Eclipse Gemini 2車身喺馬來西亞由Masdef嵌,2015年5至11月出。

其後新巴再訂多10架11.3米版同埋25架12米版B9TL,11.3米版喺2015年12月至2016年2月出,12米版喺2016年9月開始出。

愉景灣巴士 編輯

愉景灣交通服務有限公司喺2015年中引入6架12米B9TL三軸巴士,個Wright Eclipse Gemini 2車身喺馬來西亞由Masdef嵌。

港鐵巴士 編輯

港鐵巴士喺2014年訂咗62架11.3米B9TL三軸巴士,都係配Wright Eclipse Gemini 2車身[5],2015年訂多6架,2016至2017年出。

英國 編輯

英國Weavaway Travel率先喺2004年底訂購6架配單門版東蘭開夏Nordic車身嘅三軸版B9TL巴士,巴士喺2005年4至5月投入服務。

2006年7月,一架配Wright Eclipse Gemini車身嘅兩軸版B9TL樣辦巴士加入倫敦嘅London General巴士公司試行(已經喺2009年左右調走)。英國首批兩軸版B9TL巴士係由Delaine Buses訂購,為數兩架,配全新嘅東蘭開夏Olympus車身,其中首架巴士連同一架配亞歷山大丹尼士Enviro 400車身嘅兩軸版B9TL樣辦巴士(油咗Arriva色)一齊喺2006年11月搞嘅Euro Bus Expo車展展出。

2007年起,有更多兩軸版B9TL巴士喺英國投入服務,其中第一集團同埋Lothian Buses買得多啲。不過B9TL喺倫敦就因為散熱水箱噪音等問題而俾管理倫敦交通嘅Transport for London禁止用嚟行倫敦合約巴士線(去到2009年先至完),因此初時喺倫敦行嘅B9TL唔多,兼且多數都係行觀光線,去到2009年底先至多返。

英國嘅兩軸版B9TL巴士主要配Wright Eclipse Gemini或者Wright Eclipse Gemini 2車身,亦有啲係用亞歷山大丹尼士Enviro 400、東蘭開夏/Darwen/Optare出嘅Olympus/Visionaire(後者係開篷車身,兩隻車身都喺2011年停產)、MCV DD103同埋Unvi Urbis 2.5 DD Sightseeing(開篷)車身。而三軸版最初配單門版東蘭開夏Nordic車身,其後改用Darwen/Optare Olympus或Optare Visionaire車身。

英國最後嘅B9TL巴士喺2015年投入服務。

愛爾蘭 編輯

愛爾蘭都柏林嘅Dublin Bus喺2005年訂購20架配Enviro 500車身嘅富豪B9TL巴士,巴士喺2005年12月至2006年初投入服務。

後來都柏林巴士公司訂購50架配Enviro 400車身嘅兩軸版B9TL巴士同埋50架配Enviro 500車身嘅三軸版B9TL巴士,2007年/2008年付運。大部分兩軸版B9TL巴士喺2007年下半年投入服務,而三軸版B9TL巴士喺2007年12月至2008年投入服務。後來都柏林巴士公司再引入100架兩軸版B9TL巴士,50架配Enviro 400車身,另外50架配Wright Eclipse Gemini車身,巴士喺2008年底至2009年初投入服務。2012至2013年,都柏林巴士公司再引入160架兩軸版B9TL巴士,佢哋改配Wright Eclipse Gemini 2車身,但繼續用舊款Eclipse Gemini嘅車頭設計。

Bus Éireann喺2008年底引入10架配Wright Eclipse Gemini車身嘅兩軸版B9TL巴士,2012年引入10架改配Wright Eclipse Gemini 2車身嘅同款車。

另外亦有幾間小規模巴士公司買入兩軸版B9TL巴士。

新加坡 編輯

 
新加坡一架Wright車身富豪B9TL

新加坡嘅新捷運訂咗200架配富豪D9A引擎同埋新加坡康福德高工程私人有限公司(ComfortDelGro Engineering)車身嘅B9TL巴士,佢哋亦係新捷運首批可以畀輪椅上落嘅巴士。首架新車喺2006年2月公開亮相,新車喺2006年6月至2007年投入服務。

新捷運喺2009年8月宣佈訂150架配D9B歐盟五型引擎同埋Wright車身嘅B9TL巴士,2010年訂多300架同款車[6],2012年再加訂550架(其後加多15架),2014年再加訂415架。由2012年第二批Wright車身B9TL開始,有啲巴士俾新加坡政府買咗,用嚟推行Bus Service Enhancement Programme,但都係由新捷運營運,2015年底第四批Wright車身B9TL開始,俾政府買咗嘅巴士就被投放到經Bus Contracting Model招標營運嘅巴士線,由新捷運、SMRT或者新嘅Tower Transit Singapore同埋Go-Ahead Singapore營運。之後新加坡政府引入嘅最後一批共176架同款巴士都有同樣安排。全部Wright車身嘅B9TL巴士喺2010年9月至2017年出。

2014年1月新捷運引入1架順豐車身嘅B9TL巴士。

歐洲大陸 編輯

有多架兩軸版B9TL開篷巴士已經賣咗去歐洲大陸多個城市作觀光用途。而西班牙嘅Unvi同埋Castrosua公司亦有為B9TL設計單層巴士車身。

澳洲 編輯

澳洲嘅ComfortDelGro Cabcharge(CDC)喺2015年引入一架配Volgren Optimus車身嘅富豪B9TL三軸巴士,原訂係畀旗下喺新南威爾士嘅Hillsbus公司用。不過因為架車喺新南威爾士屬於超重,而調咗去載重冇咁嚴嘅維多利亞州,喺墨爾本一帶行。另外三架喺馬來西亞嵌Volgren Optimus車身嘅富豪B9TL三軸巴士嘅合約就未有被履行,其中兩架喺2017年賣咗去昆士蘭。

後繼產品 編輯

富豪並冇為B9TL研製歐盟六型引擎,因此自2013年底開始富豪向歐洲市場供應富豪B5TL去取代佢。喺2016年,預定取代三軸版B9TL嘅富豪B8L三軸巴士亮相。B9TL最終喺2017年停產。

參考 編輯

  1. Volvo Buses - Order for 100 Volvo buses in Hong Kong
  2. 傾斜測試 超長九巴撼毀,東方日報,2014年6月19號
  3. 巴士迷注意!紅巴2.0年中開駛 新設備搶先睇,香港蘋果日報,2018年4月15號
  4. [1]
  5. 《香港巴士年鑑2015》
  6. "Order for 300 Volvo double-deck buses in Singapore - Volvo Buses,2010年9月6號". 原著喺2010年12月5號歸檔. 喺2010年9月6號搵到.

出面網頁 編輯