富豪超級奧林比安
富豪超級奧林比安（Volvo Super Olympian；又譯成富豪超級奧林匹克），又叫富豪B10TL（Volvo B10TL），係瑞典富豪出嘅一款三軸低地台雙層巴士。
| 富豪超級奧林比安 Volvo Super Olympian | |
|---|---|
 香港九龍巴士一架Volgren CR223LD車身版富豪超級奧林比安  香港九龍巴士一架10.6米版富豪超級奧林比安  新加坡新捷運嘅富豪超級奧林比安，配康福德高工程私人有限公司車身 | |
| 製造廠 | 富豪 |
| 邊道出 | 蘇格蘭Irvine 波蘭Wrocław |
| 取代咗 | 富豪奧林比安（三軸版） |
| 製造年份 | 1998年—2004年 |
| 後繼產品 | 富豪B9TL |
| 主要對手 | 丹尼士三叉戟3型 猛獅24.310/24.350 Neoplan Centroliner N4026/3, N4426/3 |
| 規格 | |
| 長 | 10.6米、12米 |
| 闊 | 2.5米、2.55米 |
| 高 | 4.4米 |
| 引擎 | 富豪D10A-285 |
| 波箱 | Voith DIWA ZF Ecomat |
設計
編輯富豪超級奧林比安嘅設計係源自富豪奧林比安。佢嘅前部分經重新設計，前軸用獨立避震；而後面就用返奧林比安嘅設計，不過奧林比安原有嘅中軸同步輔助轉向系統就因為唔夠位而冇裝。
架車嘅散熱水箱因為要遷就低地台設計，而搬咗去右邊、前軸同埋中軸之間，而油缸亦喺前軸同埋中軸之間，分成兩個。喺12米版，大部分風缸係擺喺右前轆上面，長方形嘅散熱水箱係緊貼右前轆，而油缸係緊貼中軸車轆，兼且兩個大細相若；而喺10.6米版，外形接近正方形嘅散熱水箱緊貼中軸右邊車轆，一個細油缸係緊貼右前轆，另一個大油缸係緊貼中軸左邊車轆，上面有幾個風缸。另外富豪亦有11.3米長嘅超級奧林比安可以揀，但最終都冇出過。
超級奧林比安係用富豪D10A-285引擎，配ZF或者Voith波箱。
香港
編輯九龍巴士
編輯九龍巴士（九巴）喺1999年引入首批共61架12米超級奧林比安巴士，配亞歷山大ALX500車身，其中一架車隊編號3ASV3嘅係樣辦車。其後九巴喺2000至2001年引入兩批加埋共80架同款車，但路線牌由膠牌改為電子牌，而最後一架車嘅引擎俾九巴改裝成符合歐盟三型廢氣排放標準，成為香港第一架歐盟三型專利巴士。
其後九巴喺2001至2002年再分幾批引入351架配歐盟三型引擎嘅12米超級奧林比安，前軸用咗美國鋁業造嘅車轆。其中21架喺2002年出嘅12米超級奧林比安巴士係配Volgren CR223LD車身。
另外，九巴喺2001年引入49架10.6米超級奧林比安，配亞歷山大ALX500車身，前軸用咗美國鋁業造嘅車轆。其後九巴喺2002年底再引入1架10.6米超級奧林比安。後來九巴再引入50架配歐盟三型引擎嘅10.6米超級奧林比安，其中24架喺2003年出，其餘26架完成車身裝嵌之後擺咗成年幾，去到2004年底至2005年初至出。
2003年初，九巴引入配直樓梯嘅12米超級奧林比安巴士，配Wright Explorer車身（後來Explorer呢個型號名冇咗），車身闊度由舊款巴士嘅2.5米加至2.55米，前軸依然係用美國鋁業造嘅車轆。第一批共50架巴士喺2003至2004年出，而第二批共50架巴士喺2004至2005年出。
2008年夏天，九巴有3架喺同年3月31號天水圍車廠火警中焚燬嘅超級奧林比安報廢，有兩架配亞歷山大ALX500車身，一架配Wright車身。2011年9月13號有一架配亞歷山大ALX500車身嘅超級奧林比安喺慈雲山（南）巴士總站被懷疑縱火，一個月後報廢（另有一架同款車燒咗，喺冇幾耐之後出返）。2012年2月1號，有一架配亞歷山大ALX500車身嘅超級奧林比安喺將軍澳燒咗，兩個月後報廢。其餘嘅就因車齡關係，由2017年開始退役。
新世界第一巴士
編輯新世界第一巴士（新巴）喺1998至2000年引入、取代前中巴冇冷氣車嘅500架新車之中，有40架係12米超級奧林比安，配亞歷山大ALX500車身，1999年出。新巴喺2000至2001年再引入20架同款車。
2001年，新巴引入19架配歐盟三型引擎嘅12米超級奧林比安，前軸用咗美國鋁業造嘅車轆。其後新巴喺2001至2002年再引入兩批加埋共24架同款車。
因車齡關係，新巴嘅超級奧林比安喺2017至2019年退役。2018年開始，新巴安排最後24架超級奧林比安去城巴非專利部（21架）或者做訓練巴士（3架），去取代俾政府強制退役嘅歐盟二型引擎巴士，直到2020至2021年因為運輸署唔再畀佢哋續牌而退役。
新加坡
編輯新加坡巴士公司（家下嘅新捷運）喺1999年底接收咗一架配澳洲Volgren車身嘅12米富豪超級奧林比安樣辦車，車牌SBS9888Y。架車喺2010年宏茂橋車廠火警焚燬報廢。
後來新捷運引入多51架12米超級奧林比安，佢哋係富豪唯一一批用Voith波箱嘅超級奧林比安，其中50架係配Volgren CR223LD車身，其中車牌SBS9800A嘅喺2002年初出，車牌SBS9801Y-SBS9849K嘅喺2003年初出；另外一架係配新加坡康福德高工程私人有限公司（ComfortDelGro Engineering）車身，2005年初出，車牌SBS9889U。Volgren車身嗰50架喺2019至2020年退役。
停產
編輯富豪超級奧林比安喺2004年完成九巴嘅訂單之後停產，俾富豪B9TL取代。
